ខេត្តព្រះសីហនុ ៖ អាជ្ញាធរខេត្តចេញលិខិតជូនដំណឹងទុករយៈពេល១ខែ ដើម្បីរុះរើសំណង់អាជីវកម្មគ្រប់ប្រភេទចេញពីដីចំណីឆ្នេរចំនួន៣ រួមមាន ឆ្នេរអូត្រេះ ឆ្នេរអូរឈើទាល (ទល់មុខដីក្រុមហ៊ុនសុខាអូតែល អតីតៈដីអារីស្តុន) និងឆ្នេរមុខព្រះរាជដំណាក់ចាស់កំពង់សោម ដើម្បីរៀបចំសោភ័ណភាពឆ្នេរសមុទ្រកម្ពុជា ។
យោងតាមសេចក្តីជូនដំណឹងរបស់គណៈបញ្ជាការឯកភាពខេត្តព្រះសីហនុ លេខ០៦៤/១៦ សជណ ចុះថ្ងៃទី១២ កុម្ភៈ ២០១៦ មានខ្លឹមសារថា គណៈបញ្ជាការឯកភាព រដ្ឋបាលខេត្តព្រះសីហនុ សូមជម្រាបជូនដំណឹងដល់បងប្អូនអាជីវករដែលកំពុងធ្វើអាជីវកម្ម លក់ដូរលើឆ្នេរអូរត្រេះ ឆ្នេរអូឈើទាល (ទល់មុខដីក្រុមហ៊ុន សុខាអូតែល អតីតៈដីអារីស្តុន) និងឆ្នេរមុខព្រះរាជដំណាក់ចាស់កំពង់សោម ជ្រាបថា គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា និងគណៈបញ្ជាការឯកភាពរដ្ឋបាលខេត្តនឹងរៀបចំកែលម្អ និងអភិវឌ្ឍតំបន់ឆ្នេរខ្សាច់ក្នុងក្រុងព្រះសីហនុ ដើម្បីធានាការគ្រប់គ្រង និងរក្សាបរិស្ថានប្រកបដោយនិរន្តរភាពស្របទៅតាមខ្លឹមសារ នៃសារាចរណ៏ណែនាំលេខ០១ សរណន ចុះថ្ងៃទី៣ ខែកុម្ភៈ ឆ្នាំ២០១២ ស្តីពីការអភិវឌ្ឍតំបន់ឆ្នេរសមុទ្រនៃព្រះរាជាណាចក្រកម្ពុជា ។
ដូច្នោះគណៈបញ្ជាការឯកភាពរដ្ឋបាលខេត្តព្រះសីហនុ ស្នើបងប្អូនអាជីវករ ដែលលក់ដូនៅទីតាំងទាំង៣កន្លែងដូចបានជម្រាបជូនខាងលើនេះ ត្រូវរុះរើសំណង់អាជីវកម្ម ទាំងនោះចេញពីលើដីចំណីឆ្នេរ ដោយទុករយៈពេល១ខែ ចាប់ពីថ្ងៃទី១៣ ខែកុម្ភៈ ដល់ថ្ងៃទី១៣ ខែមីនា ឆ្នាំ២០១៦ ជាកំហិត ។ ផុតកំណត់ការបរិច្ឆេទនេះ គណៈបញ្ជាការឯកភាពរដ្ឋបាលខេត្តនឹងចាត់វិធានការចុះរុះរើ ដោយមិនទទួលខុសត្រូវរាល់ការខូចខាតនោះទេ ។
ស្របពេលដែលអាជ្ញាធរខេត្តបានចេញសេចក្តីជូនដំណឹង ក្នុងការុះរើសំណង់នៃទីតាំងត្រង់ចំណុចឆ្នេរទាំង៣ខាងលើនេះ ក្រុមអាជីរករមួយចំនួនបានប្រតិកម្មយ៉ាងខ្លាំង ហើយពួកគេអាចត្រៀមធ្វើការតវ៉ានៅថ្ងៃទី១៥ កុម្ភៈ នៅមុខសាលាខេត្ត ដើម្បីទាមទារតម្លាភាព ក្នុងមុខរបរអាជីវកម្ម តាមតំបន់ឆ្នេរក្នុងខេត្តព្រះសីហនុ ព្រោះតែឆ្នេរជាច្រើនកន្លែងទៀត ដែលមានការពាក់ព័ន្ឋទៅនឹងអ្នកមានអំណាច អាជ្ញាធរហាក់ពុំមានការអើរពើ ដូចជា ឆ្នេរឯករាជ្យ ឆ្នេរលំហែកាយ ឆ្នេរសុខា និងឆ្នេអូរឈើទាល ផ្នែកខាងលិច ទីតាំងកងរាជអាវុធហត្ថចាស់ ជាដើម... ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]