ខេត្តព្រៃវែង ៖ រថយន្ត៣គ្រឿងបានបុកគ្នាជាបន្តបន្ទាប់បើកបរក្នុងទិសដៅស្របគ្នាពីកើតទៅលិច បណ្តាលឱ្យរងការខូចខាតរៀងៗខ្លួន ។ គ្រោះថ្នាក់ចរាចរណ៍នេះបណ្តាលឱ្យមនុស្សមួយចំនួនជិះក្នុងរថយន្តក្រឡុករបួសស្រាល ។ រថយន្តទាំងបីគ្រឿងនោះ១-ម៉ាកវីហ្គោ ពណ៌ខ្មៅ បើកមុខគេផុងគូទខ្ទេច ២-រថយន្តបើកកណ្តាល ប្រភេទរថយន្តទេសចរណ៍ផ្ទុកអ្នកដំណើរពេញ តែគ្មានអ្នកដំណើរណាម្នាក់រងគ្រោះថ្នាក់ទេ ឯរថយន្តត្រូវខ្ទេចក្បាលផង ខ្ទេចគូទផង និង៣-រថយន្តបើកក្រោយគេជាប្រភេទរថយន្តទេសចរណ៍ ផ្ទុកអ្នកដំណើរពេញពុំមានអ្នកដំណើរណាម្នាក់រងរបួសធ្ងន់ទេ តែត្រូវរថយន្តក្រឡុកឱ្យរងរបួសស្រាលគ្រប់ៗគ្នា ។
ហេតុការណ៍នេះបានកើតឡើងកាលពីថ្ងៃទី១១ សីហា វេលាម៉ោង១១និង៣០នាទីព្រឹកលើកំណាត់ផ្លូវជាតិលេខ១ត្រង់ចំណុចក្បាលថ្មតាគោក ស្ថិតក្នុងភូមិល្វា ឃុំល្វា ស្រុកព្រះស្តេច ។ ប្រភពព័ត៌មាននៅកន្លែងកើតហេតុបានឱ្យដឹងថា រថយន្ត៣គ្រឿងបានបើកបន្តបន្ទាប់គ្នាពីកើតទៅលិច លុះមកដល់ចំណុចកើតហេតុរថយន្តវីហ្គោពណ៌ខ្មៅដែលបើកនៅមុខជាន់ហ្វ្រាំងបន្ថយល្បឿន គោរពទៅតាមស្លាកសញ្ញាចរាចរណ៍ តែរថយន្ត២គ្រឿងទៀតដែលបើកប្រដេញគ្នាពីក្រោយពុំបានបន្ថយល្បឿនទេ ឬពុំបានមើលស្លាកសញ្ញាចរាចរណ៍នៅខាងមុខ ទើបបណ្តាលឱ្យជ្រុលល្បឿនទៅបុកគូទរថយន្តខាងមុខ ហើយក៏បុកបន្តបន្តាប់គ្នាតែម្តង ។
មន្ត្រីប៉ូលិសចរាចរបានជួយអន្តរាគមន៍វាស់វែង និងបានយករថយន្តទាំង៣គ្រឿងទៅរក្សាទុកនៅប៉ុស្តិ៍រដ្ឋបាលឃុំល្វា កសាងសំណុំរឿងដើម្បីដោះស្រាយតាមផ្លូវច្បាប់ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
