ខេត្តព្រះវិហារ ៖ ជនជាប់ចោទឈ្មោះគួន ខឿត អាយុ៣២ឆ្នាំ រស់នៅភូមិស្ទឹង ឃុំរអាង ស្រុកសង្គមថ្មី ត្រូវបានសាលាដំបូងចេញដីកាឃុំខ្លួន ក្នុងករណីមនុស្សឃាត ដោយអចេតនា ដោយប្រើប្រាស់កាំភ្លើងនៅចំណុចព្រៃបន្ទាយ ក្នុងភូមិសាស្ត្រឃុំស្តៅ ស្រុកសង្គមថ្មី ខណៈដេញបាញ់សត្វស្វា បណ្តាលឱ្យត្រូវក្មេងប្រុសម្នាក់ឈ្មោះផន សុភី អាយុ១៤ឆ្នាំ ដែលកំពុងបេះផ្លែឈើបណ្តាលឱ្យស្លាប់ ។
លោកវរសេនីយ៍ឯក កែ ចំរើន ស្នងការរងនគរបាលខេត្ត ទទួលបន្ទុកកណ្តាលយុត្តិធម៌ បានឱ្យដឹងថា ចំពោះមន្ត្រីនគរបាលម្នាក់ឈ្មោះវណ្ណា រ៉េត ហៅក្តាមដែលពាក់ព័ន្ធនឹងការចោទប្រកាន់ពីក្រុមគ្រួសារជនរងគ្រោះថា បានផ្តល់អាវុធដល់ឈ្មោះគួន ខឿតនោះ ពេលនេះស្នងការដ្ឋានខេត្ត បាននាំខ្លួនមកធ្វើការដាក់វិន័យនៅ ក្នុងស្នងការដ្ឋានខេត្ត ហើយនិងរង់ចាំនីតិវិធីរបស់តុលាការផងដែរ ។
សូមរំឮកថា កាលពីថ្ងៃទី៧ សីហា ក្មេងប្រុសជំទង់អាយុ១៤ឆ្នាំម្នាក់ឈ្មោះផន សុភី រស់នៅភូមិខ្នារ ឃុំរអាង ស្រុកសង្គមថ្មី បានត្រូវជនម្នាក់បាញ់ប្រហារស្លាប់ក្នុងថ្លុកឈាម នៅក្នុងចម្ការចម្ងាយពីភូមិខាងលើប្រហែល២០គីឡូម៉ែត្រ ។ បើតាមស្ត្រីជាម្តាយឈ្មោះសៀម ពេត អាយុ៤៨ឆ្នាំ និយាយថា នៅថ្ងៃទី៧ សីហា នោះវេលាម៉ោងប្រហែល១១ព្រឹករូបគាត់រួមជាមួយប្តី និងកូនបានទៅធ្វើចម្ការនៅចម្ងាយពីភូមិខ្នារ ប្រហែល២០គីឡូម៉ែត្រ ។ នៅព្រឹកនោះដែរឈ្មោះគួន ខឿត បានលីកាំភ្លើងអាកាស្វ័យបត់១ដើម ដើរចូលទៅក្នុងខ្ទមចម្ការរបស់គាត់ រួចសួរគាត់ជាម្តាយថា នៅទីនេះមានសត្វដែរឬទេ ? ឯគាត់ឆ្លើយថា គ្មានទេ ។
ពេលនោះឈ្មោះគួន ខឿត បានដើរទៅទិសខាងត្បូងខ្ទម ហើយដោយខ្លាចមានការភាន់ច្រឡំបរបាញ់សត្វព្រៃអាចបាញ់ត្រូវមនុស្ស គាត់ក៏បានប្រាប់ជននេះថា កុំទៅចំណុចនោះអី ព្រោះកូនគាត់ពីរនាក់កំពុងបេះផ្លែសាវម៉ាវព្រៃនៅចម្ងាយពីខ្ទម ប្រហែល១០០ម៉ែត្រ នាំតែកូនគាត់ភ័យ តែជននោះនៅតែដើរតម្រង់ទៅ ។ ស្រាប់តែប្រហែល១០នាទីក្រោយមក គាត់ជាម្តាយបានឮសូរកាំភ្លើងផ្ទុះឡើង១គ្រាប់ហើយប្រហែល៥នាទីក្រោយមកទៀតក៏ឃើញកូនប្អូនរត់មកប្រាប់ថា បងត្រូវគេបាញ់ស្លាប់ហើយ។
ប្រភពដដែលបន្តទៀតថា ខណៈឮបែបនេះពួកគាត់ជាឪពុកម្តាយរត់ទៅមើលក៏ឃើញកូនស្លាប់បាត់ទៅហើយ និងបានសួរជននោះថា ហេតុអីបានជាបាញ់សម្លាប់កូនគាត់ តែឈ្មោះគួន ខឿត មិននិយាយហើយទាញកាំភ្លើងស្ពាយរត់ចេញទៅបាត់ទៅ ។
ទាក់ទិននឹងកាំភ្លើងអាកាដែលឈ្មោះគួន ខឿត យកទៅបាញ់សត្វ តែបែរជាត្រូវមនុស្សស្លាប់ នេះត្រូវបានឱ្យដឹងថា កាំភ្លើងនោះពាក់ព័ន្ធនឹងមន្ត្រីនគរបាលឈ្មោះវណ្ណា រ៉េត ហៅក្តាមដែលផ្តល់ឱ្យសម្រាប់ប្រមាញ់ស្វាក្នុងព្រៃ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
