យុវជនញៀនថ្នាំម្នាក់ បានលបឡើងផ្ទះ ដែលម្ចាស់មិននៅព្រោះរវល់ទៅរកស៊ីនៅឯខេត្តសៀមរាប ហើយក៏ដុតឆេះហ្មត់ និងបង្កឱ្យមានការភ្ញាក់ផ្អើលដល់អ្នកជិតខាងទាំងយប់ ។ អំពើបង្កឱ្យខូចខាតលំនៅឋានរបស់អ្នកដទៃនេះ បានកើតឡើងកាលពីវេលាម៉ោង១១និង៣០នាទីយប់ថ្ងៃទី៩ សីហា នៅភូមិព្រហូត សង្កាត់អូរអំបិល ក្រុងសិរីសោភ័ណ។
លោកវរសេនីយ៍ត្រី រ៉ែម វីរៈ អធិការនគរបាលក្រុងសិរីសោភ័ណ បានឱ្យដឹងថា ជនបង្កល្មើសឈ្មោះ ហឿន ហាវ អាយុ២៧ឆ្នាំ នៅភូមិព្រហូត សង្កាត់អូរអំបិល ។ ជននេះជាមនុស្សជាប់សារធាតុញៀន ដែលតែងតែធ្វើសកម្មភាពបង្កឱ្យអ្នកជិតខាងមានការភ័យខ្លាច ។ នៅយប់កើតហេតុ ជននេះបានលបឡើងទៅដុតផ្ទះរបស់ឈ្មោះ ហួន សារ៉ាត់ អាយុ៥៥ឆ្នាំ ប្រពន្ធឈ្មោះ ឈូ កយ អាយុ៥៥ឆ្នាំ នៅភូមិកើតហេតុខាងលើ ខណៈម្ចាស់រវល់ទៅរកស៊ីនៅឯខេត្តសៀមរាបដែលផ្ទះមានទំហំ៨ម៉ែត្រx៩ម៉ែត្រធ្វើពីឈើ ប្រក់ស័ង្កសី រហូតដល់ឆេះ ។ ពេលនោះប្រជាពលរដ្ឋជាអ្នកជិតខាងបានជួយធ្វើអន្តរាគមន៍ពន្លត់ដែរ តែដោយអំណាចភ្លើងឆេះឡើងសន្ធោសន្ធៅទៅហើយ មិនអាចទប់ទល់បាន ផ្ទះនោះក៏ក្លាយជាចំណីព្រះអគ្គីអស់ទាំងស្រុង រួមទាំងអីវ៉ាន់នៅក្នុងផ្ទះផង ។
លោកអធិការនគរបាលក្រុងបានបន្តថា បន្ទាប់ពីធ្វើសកម្មភាពរួចជនឈ្មោះ ហឿន ហាវ ក៏បានរត់គេចខ្លួនបាត់ទាំងយប់ ប៉ុន្តែអគ្គិភ័យនេះមិនបណ្តាលឱ្យឆេះរាលដាលដល់លំនៅឋានអ្នកជិតខាងនោះទេ ។ ផលវិបាកនៃថ្នាំញៀន កំពុងតែបង្កឱ្យមានវិបត្តិក្នុងសង្គមបណ្តើរៗហើយ ដែលមុននេះអ្នកញៀនថ្នាំតែងបង្កបញ្ហាតែក្នុងគ្រួសាររបស់គេប៉ុណ្ណោះ តែពេលនេះក្រុមញៀនថ្នាំបានបង្កឱ្យប៉ះពាល់ដល់សង្គមដូចជា ឆក់ ប្លន់ និងបទល្មើសផ្សេងៗទៀត ដូចជាពេលនេះបែរជាដុតផ្ទះគេឱ្យឆេះលេងទៅវិញ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]