រាជធានីភ្នំពេញ ៖ ជនជាតិខ្មែរអ៊ិស្លាមម្នាក់បានយកប្រាក់ដុល្លារក្លែងក្លាយចំនួន៤០០ដុល្លារទៅផឹកស៊ីច្រៀងលេងកម្សាន្តនៅហាងខារ៉ាអូខេឌីយ៉ាម៉ង់ ស្ថិតនៅផ្លូវភ្លោះសង្កាត់ជ្រោយចង្វា ខណ្ឌឫស្សីកែវ ហើយត្រូវគេដឹងនៅពេលដូរសន្លឹកទី២ និងត្រូវចាប់ខ្លួនកាលពីវេលាម៉ោង២រំលងអធ្រាត្រឈានចូលថ្ងៃទី១៣ សីហា ២០១២ ។
ជនដែលចាយប្រាក់ក្លែងក្លាយនោះឈ្មោះហ្វា គ្រីយ៉ា ភេទប្រុស អាយុ២៤ឆ្នាំ មានលំនៅភូមិថ្នល់កែង ឃុំសេដា ស្រុកតំបែរ ខេត្តកំពង់ចាម ។ នៅពេលចាប់ខ្លួនសមត្ថកិច្ចដកហូតបានប្រាក់ដុល្លារក្លែងក្លាយក្រដាស់១០០ចំនួន៤សន្លឹក។ តាមមន្ត្រីប៉ូលិសបានឱ្យដឹងថា នៅវេលាម៉ោងប្រមាណ១០យប់ថ្ងៃទី១២ សីហា ជនសង្ស័យបានចូលទៅផឹកស៊ី និងច្រៀងលេងកម្សាន្តនៅហាងខារ៉ាអូខេឌីយ៉ាម៉ង់ ស្ថិតនៅផ្លូវភ្លោះសង្កាត់ជ្រោយចង្វាតែម្នាក់ឯង ។ ពេលច្រៀងចប់ក៏បានគិតប្រាក់អស់៤០ដុល្លារឱ្យក្រដាស់១០០ត្រូវគេអាប់មកវិញ៦០ដុល្លារ លុះក្រោយមកទៀតបានឱ្យប្រាក់១០០ដុល្លារទៀតដូរ ដើម្បីឱ្យធិបនារីបម្រើការងារ។ ដោយមានការសង្ស័យអ្នកគិតលុយបានត្រួតពិនិត្យ ទើបដឹងថា ដុល្លារនោះក្លែងក្លាយហើយពិនិត្យមើលក្រដាស់ប្រាក់១០០ដុល្លារដែលអាប់លើកមុន គឺសុទ្ធតែក្លែងក្លាយ ទើបប្តឹងប៉ូលិសប៉ុស្តិ៍ឃាត់ត្រួតពិនិត្យក្នុងខ្លួនរកឃើញប្រាក់ក្លែងក្លាយទាំងអស់៤០០ដុល្លារ មាន៤សន្លឹក រួចចាប់បញ្ជូនទៅកាន់អធិការដ្ឋានខណ្ឌឫស្សីកែវ ដើម្បីសួរនាំ ។
នៅចំពោះមុខសមត្ថកិច្ចជននោះបានសារភាពថា ប្រាក់នោះខ្លួនពុំបានដឹងថា ជាប្រាក់ក្លែងក្លាយនោះទេ គឺគេឱ្យថ្លៃលក់ម៉ូតូហើយធ្វើដំណើរមកស៊ីចាយនៅភ្នំពេញ ស្រាប់តែគេថាក្លែងក្លាយ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
