រៀងរាល់ថ្ងៃសុក្រ ខ្មែរឡូត នឹងធ្វើការដកស្រង់ ព័ត៌មានសំខាន់ៗ មួយចំនួន ពីប្រភពសារព័ត៌មាននានា អំពីដំណើរវិវឌ្ឍន៍នយោបាយ នៅក្នុងប្រទេសកម្ពុជា យកមកចែករំលែក ជូនដល់ប្រិយមិត្តបានជ្រាប ជាដំណឹង។ នៅក្នុងសប្តាហ៍នេះ មានប្រធានបទ គួរឲ្យចាប់អារម្មណ៍ ដែលនឹងមានខ្លឹមសារត្រួសៗ ដូចខាងក្រោម៖
សម្ដេច ហ៊ុន សែន នៅតែតូចចិត្តនឹងអាមេរិក ដែលថាកម្ពុជាងាកទៅរកចិន
សម្ដេច ហ៊ុន សែន បានប្រកាសថា កម្ពុជានៅតែរក្សាជំហរនយោបាយការបរទេស ដោយមានភាពអព្យាក្រឹត្យ អធិបតេយ្យ និងឯករាជ្យ ដោយមិនងាកទៅទោទន់រកអាមេរិក ឬក៏ចិនឡើយ។ នាយករដ្ឋមន្ត្រី ហ៊ុន សែន ក៏បានរំឭកពីជំនួបរវាងលោក និងលោក ចន ឃេរី រដ្ឋមន្ត្រីក្រសួងការបរទេសអាមេរិក កាលពីពេលថ្មីៗនេះដែរថា លោកតូចចិត្តនិងអាមេរិក ដែលចោទប្រកាន់កម្ពុជាថា មានភាពលម្អៀងទៅរកចិន ទើបមិនអាចចេញសេចក្តីថ្លែងការណ៍រួម ដែលពាក់ព័ន្ធនឹង COC (ក្រមប្រតិបត្តិដើម្បីដោះស្រាយបញ្ហាជម្លោះដែនអធិបតេយ្យនៅក្នុងសមុទ្រចិនខាងត្បូង) ក្នុងពេលកម្ពុជាធ្វើជាម្ចាស់ផ្ទះនៃកិច្ចប្រជុំកំពូលអាស៊ានកាលពីចុងឆ្នាំ២០១២ ។ ប្រមុខរដ្ឋាភិបាលបានប្រាប់លោក ចន ឃេរី ថា មិនមែនមានតែកម្ពុជាទេ ដែលមិនអាចចេញសេចក្តីថ្លែងការណ៍រួមដែលពាក់ព័ន្ធនឹង COC នេះ ពោលគឺពេលប្រជុំនៅ ឥណ្ឌូនេស៊ី វៀតណាម ព្រុយណេ ម៉ាឡេស៊ី មីយ៉ាន់ម៉ា ក៏មិនអាចសម្រេចបាននូវ COC ដូចគ្នាដែរ។ លោកនាយករដ្ឋមន្ត្រី ហ៊ុន សែន ប្រាប់លោក ចន ឃេរី ទៀតថា ប្រទេសដែលចោទកម្ពុជាពីការបរាជ័យមិនអាចសម្រេចបាននូវ COC នេះ គួរតែសុំទោសកម្ពុជាវិញ។ ប្រភព៖ ThmeyThmey
ឯកឧត្តម សម រង្ស៊ី៖«លោក ទេព នីថា ពីមុន និងលោក ទេព នីថា ក្រោយនេះ ខុសគ្នា»
គ្មានបញ្ហាទេសម្រាប់ឯកឧត្តមប្រធានគណបក្សសង្គ្រោះជាតិ ចំពោះការបន្តតំណែងជាអគ្គលេខាធិការគណៈកម្មាធិការជាតិរៀបចំការបោះឆ្នោតជាថ្មីម្តងទៀតរបស់លោក ទេព នីថា។ នៅក្នុងវិធី Hello VOA កាលពីយប់ថ្ងៃពុធ ឯកឧត្តម សម រង្ស៊ី បានថ្លែងការពារថា វត្តមានរបស់លោក ទេព នីថា ពេលនេះ មិនអាចឲ្យលោក ទេព នីថា ធ្វើអ្វីតាមចិត្តដូចកាលពីអាណត្តិមុនៗឡើយ។ លោកបញ្ជាក់ថា នៅក្នុងស្ថាប័នគ.ជ.ប បច្ចុប្បន្ន មិនសំខាន់លើបុគ្គលម្នាក់ទេ តែសំខាន់គឺយន្តការ និងរបៀបធ្វើការរបស់ស្ថាប័ននេះ។ «លោក ទេព នីថា មុន និងលោកទេព នីថា ក្រោយ ខុសគ្នា ព្រោះ(លោក ទេព នីថា) ត្រូវធ្វើការក្នុងបរិបទ ក្នុងក្របខណ្ឌ របៀបធ្វើសេចក្តីសម្រេចចិត្ត របៀបចាត់ចែងខុសគ្នា។ ពីមុនបុគ្គលតែមួយធ្វើអ្វីបានស្រេចចិត្ត ព្រោះបក្សគេតែមួយ ឃុបឃិតគ្នា តែឥឡូវ(ស្ថាប័ននេះ) មានវិន័យ មានយន្តការ មានការតាមដានគ្នាទៅវិញទៅមក»។ នេះជាការបកស្រាយរបស់ឯកឧត្តម សម រង្ស៊ី។ ប្រភព៖ ThmeyThmey
លោក សម រង្ស៊ី រំឭកគូប្រកួតឲ្យផ្ទេរអំណាច ដោយសន្តិវិធីដូចភូមាបើចាញ់ឆ្នោត
មេបក្សប្រឆាំងដែលកំពុងនិរទេសខ្លួនរូបនោះយល់ថាកម្ពុជាគួរយកគំរូនេះមកអនុវត្តដែលលោកថាដើម្បីជំរុញការដឹកនាំមួយ ឆ្លើយតបតាមឆន្ទះ របស់ម្ចាស់ឆ្នោត។ លោកបន្តថា៖ “គំរូដែលល្អគឺគណបក្សទាំងពីរគេនិយាយគ្នាគណបក្សប្រឆាំងគណបក្សកាន់អំណាចគេនិយាយគ្នាមុនថ្ងៃបោះឆ្នោតគេនិយាយគ្នាថ្ងៃបោះឆ្នោតគេនិយាយគ្នាឥឡូវបោះឆ្នោតហើយគេនូវនិយាយគ្នា។ គេនិយាយគ្នាថាធ្វើម៉េចកុំឲ្យបែកបាក់គ្នា ធ្វើម៉េចឲ្យរក្សាបាននូវឯកភាពជាតិ ធ្វើម៉េចឲ្យគណបក្សទាំងសងខាងហ្នឹងចេះគោរពគ្នាទៅវិញទៅមកជៀសវៀងអំពើហិង្សា ហើយល្អជាងនេះទៅទៀតចេះធ្វើការជាមួយគ្នា។ អញ្ចឹងហើយបានជាប្រទេសកម្ពុជាយើងគួរតែយកគំរូតាមប្រទេសភូមាទោះជាគណបក្សណាឈ្នះមិនសំខាន់ប៉ុន្មានទេធ្វើម៉េចឲ្យរក្សាការឯកភាពគ្នា ហើយធ្វើតាមបំណងប្រជារាស្ត្រ”។ ប្រភព៖ VOD
សម្តេចក្រុមព្រះរកកិច្ចការពារសន្តិសុខ ខណៈជម្លោះកាន់តែខ្លាំងជាមួយលោក ញឹក ប៊ុនឆៃ
សម្តេចក្រុមព្រះ នរោត្តម រណឬទ្ធិ ស្វែងរកកិច្ចអន្តរាគមន៍ការពារសន្តិសុខពីរដ្ឋាភិបាលបន្ទាប់ពីមានជម្លោះជាថ្មីទៀតជាមួយលោក ញឹក ប៊ុនឆៃ រហូតបែកបាក់គណបក្សហ្វ៊ុនស៊ិនប៉ិចជាពីរ។ ការរកអន្តរាគមន៍នេះគឺតាមរយៈលិខិតមួយច្បាប់របស់សម្តេចក្រុមព្រះដាក់ទៅរដ្ឋមន្រ្តីក្រសួងមហាផ្ទៃនិងចម្លងជូនខុទ្ទកាល័យលោកនាយករដ្ឋមន្រ្តី ហ៊ុន សែន ដោយស្នើឲ្យជួយការពារសន្តិសុខ។ នៅក្នុងលិខិតផ្ញើទៅរដ្ឋមន្ត្រីក្រសួងមហាផ្ទៃលោក ស ខេង សម្ដេចក្រុមព្រះលើកឡើងថា “ក្នុងឋានៈទ្រង់ជាប្រធានគណបក្សហ្វ៊ុនស៊ិនប៉ិច ទ្រង់មិនបានអនុញ្ញាតឲ្យបុគ្គលណាឬក្រុមណារៀបចំសមាជបង្កើតគណបក្សមួយថ្មីជំនួសគណបក្សហ្វ៊ុនស៊ិនប៉ិចបច្ចុប្បន្នឡើយ”។ ប្រភព៖ VOD
លោក ហ៊ុន សែន ប្រកាសបញ្ចុះតម្លៃ សេវាសុំបម្រើការងារក្នុងក្របខ័ណ្ឌពេទ្យ
លោកនាយករដ្ឋមន្ត្រី ហ៊ុន សែន ប្រកាសបញ្ចុះតម្លៃសេវាបំពេញបែបបទប្រឡងចូលបម្រើការងារក្នុងក្របខ័ណ្ឌពេទ្យ ពី ៥០ម៉ឺនរៀល មកនៅត្រឹម ១០ម៉ឺនរៀល ហើយមិនចាំបាច់ឲ្យមានបេក្ខជនបម្រុង។ លោកនាយករដ្ឋមន្ត្រីថ្លែងដូច្នេះ នៅក្នុងពិធីចែកសញ្ញាប័ត្រដល់និស្សិតសកលវិទ្យាល័យជាតិគ្រប់គ្រង នៅថ្ងៃទី៥ កុម្ភៈ នាមជ្ឈមណ្ឌលពិព័រណ៍ និងសន្និបាតកោះពេជ្រ រាជធានីភ្នំពេញ។ លោក ហ៊ុន សែន ថ្លែងថា ចំពោះអ្នកដែលជាប់ជាបេក្ខជនបម្រុងក្នុងឆ្នាំនេះ ត្រូវជាប់ចូលបម្រើការងារដោយស្វ័យប្រវត្តិ ហើយចាប់ពីឆ្នាំក្រោយទៅ នឹងលែងឲ្យមានបេក្ខជនបម្រុងទៀតហើយ។ ប្រភព៖ RFA
លោក សម រង្ស៊ី គ្រោងស្នើរដ្ឋសភាធ្វើច្បាប់ ឲ្យពលរដ្ឋខ្មែរនៅបរទេស អាចបោះឆ្នោតបាន
មេដឹកនាំគណបក្សប្រឆាំង លោក សម រង្ស៊ី កំពុងនិរទេសខ្លួននៅក្រៅប្រទេស បានសន្យានៅចំពោះមុខអ្នកគាំទ្រខ្លួននៅប្រទេសកាណាដា (Canada) ថា គណបក្សសង្គ្រោះជាតិ នឹងធ្វើសេចក្ដីព្រាងច្បាប់ផ្ញើទៅសភា ដើម្បីឲ្យជនជាតិខ្មែររស់នៅឯនាយសមុទ្រ មានសិទ្ធិបោះឆ្នោតបានដូចប្រទេសប្រកាន់របបប្រជាធិបតេយ្យមួយចំនួនទៀត។ លោក សម រង្ស៊ី ប្រធានគណបក្សសង្គ្រោះជាតិ ចង់ឲ្យប្រជាពលរដ្ឋខ្មែរនៅឯនាយសមុទ្រ មានសិទ្ធិបោះឆ្នោតដូចប្រជាពលរដ្ឋនៅក្នុងប្រទេសដែរ។ លោក សម រង្ស៊ី ថ្លែងទៅកាន់អ្នកគាំទ្ររបស់ខ្លួននៅប្រទេសកាណាដា កាលពីថ្ងៃទី២ កុម្ភៈ ថា បើគណបក្សប្រជាជនកម្ពុជា ចង់រក្សាវប្បធម៌សន្ទនា គណបក្សសង្គ្រោះជាតិ នឹងប្រើប្រាស់វប្បធម៌សន្ទនាជជែកគ្នា ដើម្បីធ្វើច្បាប់ឲ្យពលរដ្ឋខ្មែរនៅគ្រប់ទិសទី អាចមានសិទ្ធិបោះឆ្នោតបាននៅអាណត្តិទី៦ ខាងមុខ៖ «បើមានតំណាងរដ្ឋាភិបាល លោក ហ៊ុន សែន មកកាណាដា មកចង់ទំនាក់ទំនង បងប្អូនសួរទៅ ថាឥឡូវរៀបចំឲ្យខ្មែរមានសិទ្ធិបោះឆ្នោត អាហ្នឹងចាំយើងនិយាយគ្នា ទទួលស្គាល់តម្លៃជាខ្មែរសិន តែបើមើលងាយយើង ចាត់យើងនៅក្រៅប្រទេសគ្មានសិទ្ធិបោះឆ្នោត ចឹងប្អូនគាំទ្រធ្វើអី? ចាំគេឲ្យតម្លៃសិន ចាំនិយាយគ្នាតទៅទៀត»។ ប្រភព៖ RFA
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]