រាជធានីភ្នំពេញ ៖ រថយន្តកាមរីហាយប្រ៊ីត ពណ៌ទឹកប្រាក់ បត់ឆ្វេងទៅបុកម៉ូតូធុនធំស៊េរីទំនើបមួយគ្រឿង បណ្តាលឱ្យបែកកាទែរម៉ាស៊ីន តែសំណាងល្អ អ្នកបើកខ្ទាតចេញពីម៉ូតូផុតមិនមានរងរបួស ចំណែករថយន្តបានបន្ថែមល្បឿនបើករត់បាត់ ។ គ្រោះថ្នាក់នេះកើតឡើងកាលពីវេលាម៉ោង១០និង១០នាទីយប់ ថ្ងៃទី១០ សីហា ចំណុចស្តុបទួលទំពូង តាមមហាវិថីម៉ៅសេទុង ក្នុងសង្កាត់ទួលទំពូងទី២ ខណ្ឌចំការមន ។
ប្រភពព័ត៌មានពីមន្ត្រីកងរាជអាវុធហត្ថប្រចាំគោលដៅនៅកន្លែងកើតហេតុ បានឱ្យដឹងថា មុនពេលកើតហេតុ រថយន្តកាមរីហាប្រ៊ីត ពណ៌ទឹកប្រាក់ មួយគ្រឿង បើកបរដោយបុរសម្នាក់តាមមហាវិថីម៉ៅសេទុង ពីត្បូងទៅជើង ចំណែកម៉ូតូធុនធំស៊េរីទំនើប ពណ៌ខៀវ បើកបរដោយបុរសម្នាក់ពីជើងទៅត្បូង ក្នុងទិសដៅបញ្រ្ចាសគ្នា ខណៈមកដល់ចំណុចកើតហេតុស្រាប់តែរថយន្តបត់ឆ្វេងលឿនស្លេវទៅបុកចំពាក់កណ្តាលត្រូវម៉ាស៊ីនម៉ូតូបណ្តាលឱ្យដួលខ្ទាតទៅបោកនឹងបង្គោលទូរស័ព្ទសាធារណៈនៅមុខផ្ទះលក់គ្រឿងទេស ធ្វើឱ្យម៉ូតូបែកកាទែរហូរប្រេង តែសំណាងល្អអ្នកបើកម៉ូតូផ្លោងចេញពីម៉ូតូមិនមានរងរបួសទេ ដោយឡែករថយន្តបានបន្ថែមល្បឿនគេចបាត់ស្រមោល ។
ក្រោយពេលកើតហេតុ កម្លាំងកងរាជអាវុធហត្ថែដលឈរជើងនៅជិតកន្លែងកើតហេតុ និងម្ចាស់ម៉ូតូរងគ្រោះបានជិះដេញតាមរថយន្ត តែតាមមិនទាន់ក៏ត្រឡប់មកកន្លែងដើមវិញ ស្រាប់តែអ្នកនៅកន្លែងកើតហេតុរើសបានស្លាកលេខរថយន្តជ្រុះនៅកន្លែងកើតហេតុ ក៏យកមកប្រគល់ឱ្យម្ចាស់ម៉ូតូដើម្បីយកទៅដាក់ពាក្យបណ្តឹងនៅខណ្ឌចំការមន តាមស្រាវជ្រាវចាប់រថយន្តនោះ ។ ចំណែកម្ចាស់ម៉ូតូធុនធំនោះបានបង្ហើបថា ម៉ូតូរបស់គាត់ទើបនឹងទិញតម្លៃជិតមួយម៉ឺនដុល្លារ ហើយការខូចខាតនេះមិនតិចជាងរាប់ពាន់ដុល្លារទេ ។
ការខូចខាតបង្គោលស្លាកលេខទូរស័ព្ទសាធារណៈនោះម្ចាស់គេក៏មិនបានទាមទារឱ្យម្ចាស់ម៉ូតូសងដែរ ដោយសារតែមិនមានចេតនាបុកគឺរថយន្តជាអ្នកបង្ក ហើយរត់គេចបាត់ ។ ស្លាកលេខរថយន្តដែលជ្រុះក្រោយពេលបុកនោះគឺម្ចាស់ផ្ទះរើសបាននៅកន្លែងកើតហេតុយកទៅប្រគល់ឱ្យម្ចាស់ម៉ូតូ ដើម្បីជាស្តុតាងសម្រាប់ដាក់ពាក្យប្តឹង ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]