រឿងពិតនៃជីវិតកម្មករសំណង់ម្នាក់ដែលធ្លាក់ខ្លួនទៅជាជនពិការដៃទាំង២ ធ្វើការងារអ្វីលែងកើតនោះ ពេលនេះសល់តែទឹកភ្នែករៀបរាប់ប្រាប់កោះសន្តិភាពថា ប្រពន្ធបានសុំលែងព្រោះតែខ្លួនអស់លទ្ធភាពរកប្រាក់ចិញ្ចឹមប្រពន្ធកូន ។ កម្មករសំណង់រូបនេះឈ្មោះយុន សុខលាភ អាយុ២១ឆ្នាំ រស់នៅភូមិត្រាពាំងវែង សង្កាត់ស្រយ៉ូវ ក្រុងស្ទឹងសែន ។
កម្មករសំណង់យុន សុខលាភ និយាយទាំងទឹកមុខស្រងូតស្រងាត់និងទឹកភ្នែកហូររហាមថា ជីវភាពក្នុងគ្រួសាររបស់គេទាំងឪពុកម្តាយ និងកូន គ្មានអ្វីក្រៅពីដើរស៊ីឈ្នួលគេទេ។ ដើមឡើយដីស្រែមានតិចតួចនឹងគេដែរ ប៉ុន្តែដោយជំងឺរុករាន និងខ្វះខាតក្នុងជីវភាពគ្រួសារផងក៏លក់អស់ទៅ រហូតដល់សព្វថ្ងៃទាំងឪពុកម្តាយនិងកូនៗព្រាត់ប្រាសនិរាសគ្នា ខ្លះទៅធ្វើការជាកម្មករសំណង់ ខ្លះបេះបន្លែផ្លែឈើលក់ ខ្លះស៊ីឈ្នួលចាំចម្ការឱ្យគេ ។ នៅឆ្នាំ២០០៧ ខ្លួនពេញវ័យអាយុ១៩ឆ្នាំ ត្រូវបានឪពុកម្តាយផ្សំផ្គុំឱ្យមានគូស្រករជាមួយនាងពិន ស៊ីនិត នៅភូមិបល្ល័ង្កកើត សង្កាត់ដំរីជាន់ខ្លា ក្រុងស្ទឹងសែន ។
ចំណងអាពាហ៍ពិពាហ៍រវាងរូបគេនិងនាង ពិន ស៊ីនិត មានភាពល្អូកល្អឺននឹងគ្នាណាស់ បើទោះបីជាជីវភាពគ្រួសារពួកគេក្រីក្រក៏ដោយក៏មិនដែលចេះរកាំរកូសនឹងគ្នាឡើយ ។ ជីវិតអាពាហ៍ពិពាហ៍រំលងតែ១ឆ្នាំ ពួកគបានកូនប្រុសម្នាក់នៅក្នុងឆ្នាំ២០០៨ ដែលមកដល់ពេលនេះកូនប្រុសមានអាយុជាង៣ឆ្នាំហើយ ។
យុន សុខលាភ បានបន្តថា ពេលប្រពន្ធសម្រាលកូនបានប្រហែល៣ខែ ខ្លួនក៏ចាកចេញពីផ្ទះមកភ្នំពេញដើម្បីរកការងារធ្វើជាកម្មករសំណង់ដើម្បីបានប្រាក់យកទៅផ្គត់ផ្គង់ប្រពន្ធកូនខ្ចី តែកម្មអកុសល ធ្វើកម្មករសំណង់ទើបបាន១ខែនៅម្តុំអូរបែកក្អម រាជរាជធានីភ្នំពេញ ក៏ត្រូវខ្សែភ្លើងឆក់ធ្លាក់ពីលើការដ្ឋានបណ្តាលឱ្យរងរបួសយ៉ាងធ្ងន់ ត្រូវបានសាច់ញាតិដឹកទៅសង្គ្រោះនៅមន្ទីរពេទ្យព្រះកុសុមៈ ហើយភរិយាបានទៅកំដរមើលថែរហូតដល់ជាសះស្បើយ ។ ប៉ុន្តែអ្វីដែលប្រឈមនោះគឺដៃខាងស្តាំត្រូវកាត់ត្រឹមកំភួនដៃ និងដៃខាងឆ្វេងពិការទាំងស្រុង បើទោះបីគ្រូពេទ្យមិនកាត់ចោលក៏ដោយ ។
គ្រោះថា្នក់នេះ បានរួចផុតពីសេចក្តីស្លាប់ក៏ពិតមែន តែដៃទាំងទ្វេលែងប្រើប្រាស់អ្វីបានទាំងអស់ សូម្បីតែកាន់ស្លាបព្រាហូបបាយទឹកក៏មិនកើត ដូច្នេះជីវិតគេពិតជារស់គ្មានន័យ ហើយកាន់តែគ្មានន័យទៀតនោះគឺពេលនេះប្រពន្ធសុំលែង ។ ពេលរបួសជាសះស្បើយ រូបគេក៏បានវិលត្រឡប់ទៅរស់នៅឯផ្ទះខាងប្រពន្ធវិញ និងត្រូវបាត់បង់ការងារធ្លាក់ខ្លួនពិការនៅតែផ្ទះមើលកូនហើយចាត់ទុកថាជាព្រហ្មលិខិតបានកំណត់ឬក៏ជាបាបកម្មពីអតីតជាតិ ។ រូបគេអាណិតប្រពន្ធវិញទេ ដែលនាងជាស្រ្តីមានប្តីមានកូនហើយបែរជាយកខ្លួនខំដើររកការងារធ្វើស៊ីឈ្នួលបោកគក់ខោអាវឱ្យគេដើម្បីបានប្រាក់មកចិញ្ចឹមប្តីនិងកូននោះ ។
ការរស់នៅក្នុងស្ថានភាពគ្រួសារបែបនេះ មានរយៈពេលជាង៤ឆ្នាំមកហើយ ហើយបើទោះបីជាលំបាកវេទនាយ៉ាងណាក៏ពួកគេមានសេចក្តីសុខដែរ ។ ស្រាប់តែមកដល់ក្នុងអំឡុងខែឧសភា និងមិថុនា ២០១២ ប្រពន្ធចេះតែទទូចសុំគេលែង ។ គ្រាន់តែឮពាក្យប្រពន្ធថាសុំលែង គេធ្លាក់ថ្លើមនិងស្ទើរតែមិនចង់ជឿ ព្រោះតាំងពីរូបគេចាប់ដៃគ្នាជាប្តីប្រពន្ធក្រលំបាកវេទនាស៊ីអត់ស៊ីឃ្លានរហូតដល់មានកូនម្នាក់ទៀតនោះមិនដែលជួបរឿងបែបនេះទេ ។ ប្រពន្ធបានបញ្ជាក់ថា យើងទាំងពីរនាក់អស់កម្មអស់ពៀរនឹងគ្នាត្រឹមនេះចុះ ដើម្បីទុកពេលឱ្យគេរកអនាគតថ្មី។ បន្ទាប់ពីទទួលបានពាក្យសុំលែងដែលនឹកស្មានមិនដល់នោះ គេក៏មិនជំទាស់ដែរហើយបានវេចបង្វេចចុះ ដោយគ្មានយកអ្វីក្រៅតែពីសម្លៀកបំពាក់ផ្ទាល់ខ្លួនប៉ុណ្ណោះ ព្រោះគេបានយល់ឃើញថា ការរស់នៅជាប្តីប្រពន្ធរបៀបនេះវាពិតជាខាងស្រីពិបាកពេកហើយ ហើយអនាគតពិតជាមិនអាចងើបផុតពីភាពក្រតោកយ៉ាកដូចសព្វថ្ងៃនេះឡើយ ។
យុន សុខលាភ បន្តថា ការស្ពាយបង្វេចចុះចេញពីផ្ទះខាងស្រីមិនធ្ងន់ធ្ងរទេ តែអាណិតកូនដែលមិនទាន់ដឹងក្តីសោះនោះ គេរស់ក្នុងភាពនិរាសឪពុក ។ ក្រោយពីស្ពាយបង្វេចមកដល់ផ្ទះ ឪពុកម្តាយវិញអារម្មណ៍របស់គេហាក់ដូចជាមានភាពប្រែប្រួល ពោលគឺមិនចង់រស់ទាល់តែសោះ ហើយតែងតែព្យាយាមរកវិធីសម្លាប់ខ្លួន តែការប៉ុនប៉ងនោះត្រូវបានសាច់ញាតិតាមរារាំងនិងអង្វរករលួងលោមហើយក៏នឹកឃើញអាណិតកូននិងឪពុកម្តាយដែលខំបីបាច់ថែរក្សាតាំងពីតូចមក ។ ពេលនេះទោះបីធ្លាក់ខ្លួនពិការ ប្រពន្ធសុំលែងយ៉ាងនេះក៏ដោយ ក៏គេបានជ្រើសរើសយកផ្លូវមួយ គឺទៅនៅបម្រើព្រះសង្ឃក្នុងទីអារាមរៀនធម៌វិន័យ ដើម្បីបន្តរស់គ្រាន់ឱ្យបានកូនឃើញមុខ ។ ចំពោះការមកនៅបម្រើព្រះសង្ឃ គ្មានអ្វីក្រៅពីការងារយួរទឹកពីស្រះដាក់ពាងនិងស្រោចដំណាំក្នុងវត្តនោះទេ តាមរយៈដៃកំបុតខាងស្តាំ ព្រោះដៃខាងឆ្វេងប្រើប្រាស់លែងកើត ។
យុន សុខលាភ និយាយទៀតថា យ៉ាងណាក៏ដោយការស្នាក់នៅជាមួយព្រះធម៌នេះ មិនអាចជួយដោះស្រាយដល់ជីវភាពកូនប្រុសម្នាក់ដែលកំព្រាឪពុកហើយនោះទេ ពេលនេះគេចង់ចាកចេញពីវត្តដើម្បីរកការងារធ្វើតាមដែលខ្លួនមានលទ្ធភាពអាចធ្វើទៅបាន ។ ការងារដែលគេសង្ឃឹមនិងជឿជាក់ថាអាចធ្វើទៅបាននោះមានតែមជ្ឈមណ្ឌលជនពិការរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីទេ ដែលជាកន្លែងសម្រាប់ផ្តល់អនាគតដល់ជនពិការ ។ គេក៏បានអំពាវនាវផងដែរថា មានតែសម្តេចតេជោទេដែលអាចជួយប្រោះព្រំដល់ជីវិតជនពិការដូចជារូបគេបាន ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]