យុវជនម្នាក់ឈ្មោះ មុជ វ៉ិត អាយុ២២ឆ្នាំ រស់នៅភូមិទឹកថ្លា សង្កាត់អូរតាវ៉ៅ ក្រុងប៉ៃលិន ដោយសារតែតូចចិត្តម្តាយស្តីប្រដៅក៏បានផឹកថ្នាំពុលបាញ់ស្មៅប្រភេទទឹកឃ្មុំប៉ងធ្វើអត្តឃាត ។ ហេតុការណ៍នេះបានកើតឡើងកាលពីវេលាម៉ោង១រសៀល ថ្ងៃទី៧ សីហា ក្នុងបន្ទប់ផ្ទះរបស់ខ្លួនក្នុងភូមិខាងលើ ហើយក្រោយពេលផឹករួចក៏ក្អួតចង្អោរ និងមានធុំក្លិនថ្នាំពុល ទើបម្តាយនិងប្អូនស្រីចូលទៅមើលឃើញដឹងនិងដឹកយកទៅសង្គ្រោះនៅមន្ទីរពេទ្យបង្អែកខេត្ត ហើយគ្រូពេទ្យដាក់ទឹកលាងក្រពះជម្រះជាតិពុលរួចផុតពីសេចក្តីស្លាប់ ។
ប្រភពព័ត៌មានបានឱ្យដឹងថា យុវជនដែលប៉ងធ្វើអត្តឃាតនេះ មានបងប្អូនទាំងអស់៣នាក់ (ស្រីម្នាក់) ឯយុវជនរូបនេះជាកូនច្បង និងធ្លាប់បានរៀបការម្តងហើយ កាលពី៣ឆ្នាំមុន តែបន្ទាប់ពីការរួចព្រឹកឡើងប្រពន្ធរត់ចោលបាត់ ។ ជារៀងរាល់ថ្ងៃ យុវជនរូបនេះរស់នៅជាមួយឪពុកម្តាយ និងប្អូនចំនួន២នាក់ទៀត ហើយនៅមុនថ្ងៃកើតហេតុ បានដើរផឹកស៊ីជាមួយមិត្តភក្តិ មិនជួយធ្វើការងារផ្ទះទេ ទើបម្តាយស្តីប្រដៅណែនាំឱ្យកែខ្លួន ខិតខំធ្វើការរកស៊ីជួយជំនួសដៃជើងឪពុកម្តាយ ។ ផ្ទុយទៅវិញ ការស្តីប្រដៅណែនាំបែរជាធ្វើឱ្យយុវជនម្នាក់នេះតូចចិត្តទៅវិញរហូតដល់ថ្ងៃកើតហេតុ ទៅលួចយកថ្នាំពុលបាញ់ស្មៅប្រភេទទឹកឃ្មុំទៅសម្ងំផឹកនៅក្នុងបន្ទប់របស់ខ្លួនអស់មួយកែវ ។ លុះផឹករួចប្រមាណជាកន្លះម៉ោងក្រោយមកស្រាប់តែមានអាការក្អួតចង្អោរ និងធុំក្លិនថ្នាំពុល ទើបម្តាយឈ្មោះ យឿម ភិន អាយុ៤៥ឆ្នាំ និងប្អូនស្រីឈ្មោះ មុជ មុំ អាយុ១៨ឆ្នាំ ចូលទៅមើលឃើញ និងដឹងថា ផឹកថ្នាំពុលក៏ហៅបងប្អូននិងអ្នកជិតខាង ឱ្យជួយដឹកយកទៅសង្គ្រោះនៅមន្ទីរពេទ្យបង្អែកខេត្ត ។
គ្រូពេទ្យបានប្រាប់ឱ្យដឹងថា ប្រជាពលរដ្ឋនៅខេត្តប៉ៃលិនភាគច្រើនធ្វើអត្តឃាតដោយផឹកថ្នាំពុល២ប្រភេទ គឺថ្នាំពុលទឹកខៀវ និងថ្នាំពុលទឹកឃ្មុំ ។ ថ្នាំពុលទាំងពីរប្រភេទនេះមានគ្រោះថ្នាក់ខ្លាំងណាស់គ្មានថ្នាំព្យាបាលទេ កាលណាផឹកចូលដល់ពោះវានឹងរលាកពោះវៀន ក្រពះអាចស្លាប់ ហើយយូរឬឆាប់គឺទៅតាមកម្រិតថ្នាំដែលផឹកចូលទៅនោះ ។ នៅខេត្តប៉ៃលិន ជាតំបន់មួយដែលសម្បូរទៅដោយការធ្វើអត្តឃាតដោយផឹកថ្នាំពុល ព្រោះជាតំបន់ចម្ការហើយទាមទារការបើ្រើថ្នាំបាញ់សម្លាប់ស្មៅ និងបាញ់សម្លាប់សត្វល្អិត ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]