នារីវ័យក្មេងម្នាក់បានស្លាប់ភ្លាមៗនៅនឹងកន្លែង ឯ២នាក់ទៀតរងរបួសធ្ងន់ និងស្រាល ខណៈពេលដែលពួកគេជិះម៉ូតូឌុបមួយគ្រឿងប៉ះដៃចង្កូតគ្នាជាមួយម៉ូតូមួយគ្រឿងទៀតដែលធ្វើដំណើរស្របទិសគ្នា បណ្តាលឱ្យដួលខ្ទាតចូលទៅក្រោមកង់រថយន្តដឹកដីកិនស្លាប់ និងរបួស កាលពីវេលាម៉ោង៧និង៤៥នាទីព្រឹកថ្ងៃទី១២ សីហា ២០១២ លើកំណាត់ផ្លូវជាតិលេខ៤ត្រង់ចំណុចភូមិអង្គកែវ សង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះដែលត្រូវរថយន្តដឹកដីកិនស្លាប់នោះឈ្មោះសុវ៉ាត់ ភេទស្រី អាយុ១៦ឆ្នាំ ជាកម្មការិនីរោងចក្រកាត់ដេរមានទីលំនៅភូមិត្បួងក្រពើ ឃុំកកោះ ស្រុកសន្ទុក ខេត្តកំពង់ធំ ស្នាក់នៅផ្ទះជួលភូមិវាល សង្កាត់កន្ទោក ខណ្ឌពោធិ៍សែនជ័យ ។ ចំណែកស្ត្រីម្នាក់ទៀតរងរបួសស្រាលឈ្មោះធី និត អាយុជិត២០ឆ្នាំ មានទីលំនៅ និងស្នាក់នៅជាមួយគ្នា ។ ពួកនាងបានជិះម៉ូតូឌុបមួយគ្រឿងម៉ាកឌ្រីមសេ១២៥ ពណ៌ខ្មៅ បើកដោយបុរសម្នាក់ឈ្មោះយាក ចៀន អាយុ៤០ឆ្នាំ មានទីលំនៅភូមិវាល សង្កាត់កន្ទោក រងរបួសធ្ងន់ ។ ដោយឡែករថយន្តដឹកដីដែលបើកកិនមនុស្សស្លាប់ ហើយព្យាយាមបើករត់នោះម៉ាកហ៊ីណូ ពណ៌ខៀវ បើកដោយបុរសម្នាក់ឈ្មោះខាត់ ពន្លក អាយុ២៥ឆ្នាំ មានទីលំនៅភូមិស្លែងគង់ ឃុំដើមឫស ស្រុកកណ្តាលស្ទឹង ខេត្តកណ្តាល ត្រូវបានប៉ូលិសប៉ុស្តិ៍ចោមចៅចាប់ឃាត់ខ្លួនបានប្រគល់ទៅឱ្យប៉ូលិសចរាចរខណ្ឌពោធិ៍សែនជ័យ ដើម្បីកសាងសំណុំរឿង ។
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
