សពបុរសម្នាក់ដែលគេប្រទះឃើញសល់តែគ្រោងឆ្អឹង កាលពីវេលាម៉ោង៦ល្ងាចថ្ងៃទី២៧ កក្កដា ២០១២ កន្លងទៅនៅចំណុចក្នុងព្រៃរបោះ ស្ថិតក្នុងភូមិត្រពាំងត្របែក ឃុំរុងរឿង ស្រុកថ្ពង ត្រូវបានមន្ត្រីប៉ូលិសមូលដ្ឋានស្រុកថ្ពង សហការជាមួយមន្ត្រីប៉ូលិសព្រហ្មទណ្ឌខេត្ត ធ្វើការស្រាវជ្រាវ និងចាប់ខ្លួនជនល្មើសបាននៅវេលាម៉ោង៩និង៣០នាទីព្រឹកថ្ងៃទី១១ សីហា ២០១២ នៅក្នុងភូមិស្តុក ឃុំតំណាក់រាំង ស្រុកឧដុង្គ បន្ទាប់ពីជននេះនាំមិត្តភក្តិទៅសម្លាប់ប្លន់យកម៉ូតូ ហើយរត់គេចខ្លួនជាង១ខែ ។
នាយរងការិយាល័យកណ្តាលនគរបាលព្រហ្មទណ្ឌកម្រិតធ្ងន់ខេត្ត លោកអនុសេនីយ៍ឯក សម សាក់ ប្រាប់ឱ្យដឹងថា គ្រោងឆ្អឹងសពដែលគេស្គាល់នេះ ឈ្មោះសឿន សំ ភេទប្រុស អាយុ២៣ឆ្នាំ មានប្រពន្ធឈ្មោះអៀម ចាន់រី ទើបសម្រាលបានកូនមួយក្រោយពីបាត់ប្តីជាងកន្លះខែ មានលំនៅភូមិត្រពាំងរុន ឃុំតំណាក់រាំង ស្រុកឧដុង្គ ។ លោកអនុសេនីយ៍ឯក បន្តថា ជនល្មើសដែលនាំមិត្តភក្តិទៅសម្លាប់ប្លន់យកម៉ូតូនោះឈ្មោះទឿន ម៉េង ភេទប្រុស អាយុ២៦ឆ្នាំ មានប្រពន្ធកូនពីរនាក់នៅក្នុងភូមិស្តុក ឃុំតំណាក់រាំង ស្រុកឧដុង្គ ជាកម្មករសំណង់ត្រូវបានកសាងសំណុំរឿងបញ្ជូនទៅសាលាដំបូងខេត្តហើយ ។
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
