រៀងរាល់ថ្ងៃសុក្រ ខ្មែរឡូត នឹងធ្វើការដកស្រង់ ព័ត៌មានសំខាន់ៗ មួយចំនួន ពីប្រភពសារព័ត៌មាននានា អំពីដំណើរវិវឌ្ឍន៍នយោបាយ នៅក្នុងប្រទេសកម្ពុជា យកមកចែករំលែក ជូនដល់ប្រិយមិត្តបានជ្រាប ជាដំណឹង។ នៅក្នុងសប្តាហ៍នេះ មានប្រធានបទ គួរឲ្យចាប់អារម្មណ៍ ដែលនឹងមានខ្លឹមសារត្រួសៗ ដូចខាងក្រោម៖
ក្រោយឯកឧត្តម កឹម សុខា ជួបសម្តេច CNRP អំពាវនាវឲ្យមន្ត្រីរក្សាភាពថ្លៃថ្នូរ និងឈប់ជេរប្រមាថ
ជាង ៦ ម៉ោងក្រោយពីឯកឧត្តម កឹម សុខា ជជែកគ្នាជាមួយសម្តេចនាយករដ្ឋមន្ត្រី ហ៊ុន សែន នៅក្នុងកិច្ចប្រជុំពេញអង្គរដ្ឋសភា កាលពីព្រឹកថ្ងៃពុធ គណបក្សសង្គ្រោះជាតិនៅល្ងាចថ្ងៃដដែលនោះ បានសម្រេចចេញសេចក្តីអំពាវនាវជាសាធារណៈឲ្យមេដឹកនាំ និងអ្នកគាំទ្រគណបក្សនេះ កុំប្រើសម្តីជេរប្រមាថនាំឲ្យបែកបាក់ជាតិ និងត្រូវរក្សាភាពថ្លៃថ្នូរ។ ក្រោយពីសង្កេតឃើញថា នាពេលបច្ចុប្បនេះ មានការរិះគន់ដែលមានលក្ខណៈអសីលធម៌ ការជេរប្រមាថ ដែលនាំឲ្យសង្គមខ្មែរបែកបាក់គ្នានោះ គណបក្សសង្គ្រោះជាតិ បានអំពាវនាវឲ្យមន្ត្រី និងអ្នកគាំទ្រខ្លួនយ៉ាងនេះថា៖ «គណបក្សសង្គ្រោះជាតិ សូមអំពាវនាវដល់ថ្នាក់ដឹកនាំ សកម្មជន អ្នកគាំទ្រគណបក្សសង្គ្រោះជាតិទាំងអស់ រក្សានូវភាពថ្លៃថ្នូរ និងសីលធម៌ខ្ពស់ ដោយមិនជេរប្រមាថ និងមិនប្រើរូបភាពប្រមាថ ក្នុងការបញ្ចេញមតិយោបល់ និងការរិះគន់តាមប្រព័ន្ធផ្សព្វផ្សាយនានា ដើម្បីស្វែងរកនូវការផ្សះផ្សារជាតិ និងឯកភាពជាតិ»។ ប្រភព៖ ថ្មីៗ
លោក ហ៊ុន សែន ណែនាំអ្នកជំនាន់ក្រោយ ឲ្យដាក់ខ្លួនបម្រើពលរដ្ឋ ពេលមានឋានៈខ្ពស់
នៅចំថ្ងៃខួប ៣១ឆ្នាំ នៃការលើងកាន់អំណាចរបស់លោក ហ៊ុន សែន លោកនាយករដ្ឋមន្ត្រីចាស់វស្សារូបនេះបានសរសេររៀបរាប់នៅលើទំព័រហ្វេសប៊ុក (Facebook) របស់លោករម្លឹកពីប្រវត្តិដែលលោកត្រូវបានបក្សជ្រើសរើសឲ្យដឹកនាំប្រទេស។ លោកថា លោកត្រូវបានបោះឆ្នោតជ្រើសរើសដោយគ្មានសំឡេងប្រឆាំង សូម្បីមួយសំឡេងឡើយ។ ប្រការនេះ លោកថា គឺខុសពីនាយករដ្ឋមន្ត្រី ២រូបមុនលោក គឺលោក ប៉ែន សុវណ្ណ និងលោក ចាន់ ស៊ី ដែលទទួលបានសំឡេងប្រឆាំងមិនតិចជាង ៥សំឡេងនោះឡើយក្នុងពេលបោះឆ្នោតជ្រើសរើសធ្វើជានាយករដ្ឋមន្ត្រី។ លោក ហ៊ុន សែន ក៏មិនភ្លេចលើកឡើងនូវទ្រឹស្ដីរបស់លោកដែលថា មិនត្រូវទុកឲ្យប្រជាជនណាម្នាក់ស្លាប់ដោយអត់បាយដោយរដ្ឋាភិបាលមិនបានដឹង មិនបានដោះស្រាយនោះឡើយ។ ក្រៅពីនេះ លោក ហ៊ុន សែន ដែលពេលនេះមានអាយុ ៦៣ឆ្នាំទៅហើយនោះ បានរៀបរាប់ច្រើនពីជីវិតគ្រួសារ និងការលំបាករបស់លោកក្នុងពេលលោកដឹកនាំប្រទេសផង និងមើលថែទាំកូនចៅតូចៗក្នុងបន្ទុកផងនោះ។ នៅចុងបញ្ចប់នៃសាររបស់លោក ហ៊ុន សែន បានផ្ដាំផ្ញើមនុស្សជំនាន់ក្រោយត្រូវដាក់ខ្លួនបម្រើប្រជាជនពេលមានឋានៈខ្ពស់ និងមិនត្រូវវាយឫកខុសរបៀបឡើយ។ ប្រភព៖ RFA
ឯកឧត្តម កឹម សុខា ថា សម្តេច ហេង សំរិន មិនឲ្យខ្លួនបញ្ចេញមតិ ក្នុងកិច្ចប្រជុំរដ្ឋសភា
ប្រធានស្តីទីគណបក្សសង្គ្រោះជាតិ លោក កឹម សុខា បានលើកឡើងថា ប្រធានរដ្ឋសភាសម្តេច ហេង សំរិន មិនអនុញាតឲ្យខ្លួន បានឡើងបញ្ចេញមតិនៅក្នុងកិច្ចប្រជុំសភា កាលពីព្រឹកថ្ងៃទី ១៣ ខែមករា ឡើយ។ ឯកឧត្តម កឹម សុខា អះអាងថា បើទោះជាខ្លួនខំស្នើសុំសម្តេច ហេង សំរិន ម្តងជាពីរដង ដើម្បីឡើងបញ្ចេញមតិនៅក្នុងកិច្ចប្រជុំពេញអង្គកាលពីព្រឹកមិញក្តី ក៏សម្តេចប្រធានរដ្ឋសភា មិនអនុញ្ញាតដល់ខ្លួនដែរ។ នៅលើគណនីហ្វេសប៊ុករបស់ខ្លួននៅមុននេះបន្តិច ឯកឧត្តម កឹម សុខា បានសរសេរយ៉ាងនេះថា៖« ក្នុងកិច្ចប្រជុំពេញអង្គនៃរដ្ឋសភាថ្ងៃនេះ ខ្ញុំ កឹម សុខា បានព្យាយាមស្នើសុំទៅសម្ដេចប្រធានរដ្ឋសភាដើម្បីបញ្ចេញមតិពីរដង តែមិនទទួលបានការផ្ដល់ឱកាសឲ្យខ្ញុំបញ្ចេញមតិនៅក្នុងកិច្ចប្រជុំរដ្ឋសភានេះឡើយ»។ តែយ៉ាងណាប្រធានស្តីទីគណបក្សសង្គ្រោះជាតិ មិនបានចាត់ទុកការព្រងើយកន្តើយរបស់សម្តេច ហេង សំរិន មកលើខ្លួន ថា បែបណានោះទេ។ ប្រភព៖ ថ្មីៗ
លោក ហ៊ុន ម៉ានី នឹងធ្វើជាវាគ្មិនពិភាក្សា អំពីនយោបាយការបរទេស នៅអាមេរិក
តំណាងរាស្ត្រគណបក្សប្រជាជនកម្ពុជា និងជាកូនប្រុសបង្កើតរបស់លោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ានី នឹងធ្វើជាវាគ្មិនពិភាក្សា និងផ្ដល់ទស្សនៈអំពីនយោបាយការបរទេស និងទំនាក់ទំនងជាមួយសហរដ្ឋអាមេរិក កូរ៉េ និងចិន ជាដើម។ កិច្ចពិភាក្សានេះនឹងធ្វើឡើងនៅថ្ងៃពុធ ទី២០ ខែមករា ចាប់ពីម៉ោង ២:៣០នាទី រហូតដល់ម៉ោង ៤:០០រសៀល ដែលរៀបចំឡើងដោយវិទ្យាស្ថានសហរដ្ឋអាមេរិក-កូរ៉េ និងកម្មវិធីសិក្សាផ្នែកអាស៊ីអាគ្នេយ៍នៃវិទ្យាស្ថានសិក្សាជាន់ខ្ពស់អន្តរជាតិ ហ្យន ហប់គិន (Johns Hopkins SAIS)។ លោក ហ៊ុន ម៉ានី ជាតំណាងរាស្ត្រវ័យក្មេងជាងគេនៅកម្ពុជា។ កាលពីខែមុន លោកបានប្រកាសថា លោកមានក្ដីសុបិនមួយ គឺចង់ក្លាយជានាយករដ្ឋមន្ត្រី។ ប្រភព៖ RFA
លោក ហ៊ុន សែន ថាថតរូបSelfie ជាមួយអ្នកនយោបាយម្នាក់នោះ នាំឱ្យលោកស្ដាយក្រោយ
លោកនាយករដ្ឋមន្ត្រី ហ៊ុន សែន សោកស្តាយចំពោះការថតរូបSelfieជាមួយដៃគូសន្ទនានយោបាយរបស់លោកដោយលោកចាត់ទុកថាជាការថតរូបដែលមើលសំបកក្រៅហាក់ដូចជាល្អូកល្អឺនល្អជាមួយគ្នាខ្លាំងណាស់តែការពិតបង្កប់នូវភាពមិនស្មោះត្រង់។ លោក ហ៊ុន សែន បានសរសេរក្នុង Facebook Page របស់លោកដែលមានន័យដូចនេះថា «កន្លងមកខ្ញុំធ្លាប់ សែលហ្វី (Selfie) ជាមួយដៃគូសន្ទនានយោបាយដែលមើលឃើញពីសំបកក្រៅហាក់ដូចជាល្អូកល្អឺនល្អជាមួយគ្នាខ្លាំងណាស់។ តែការពិតនោះគឺជា Selfie ដែលបង្កប់ដោយភាពមិនស្មោះត្រង់ដែលធ្វើអោយខ្ញុំសោកស្តាយបំផុតមកទល់ពេលនេះ»។ ប្រភព៖ VOD
ខ្មែរឡូត
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
