ខេត្តសៀមរាប ៖ សៀមរាប គឺ ជាខេត្តមួយរបស់ព្រះរាជាណាចក្រ កម្ពុជា ដែលសំបូរដោយប្រាង្គប្រាសាទបុរាណរបស់ខ្មែរ ជាពិសេសប្រាសាទអង្គរវត្ត ដែលបាននិងកំពុងទាក់ទាញភ្ញៀវទេសចរជាតិ និងអន្តរជាតិចូលមកទស្សនាកម្សាន្តយ៉ាងច្រើនរាប់លាននាក់ក្នុងមួយឆ្នាំៗ។ «តទៅទំព័រទី១៩»ខេត្តសៀមរាប ៖ សៀមរាប គឺ ជាខេត្តមួយរបស់ព្រះរាជាណាចក្រ កម្ពុជា ដែលសំបូរដោយប្រាង្គប្រាសាទបុរាណរបស់ខ្មែរ ជាពិសេសប្រាសាទអង្គរវត្ត ដែលបាននិងកំពុងទាក់ទាញភ្ញៀវទេសចរជាតិ និងអន្តរជាតិចូលមកទស្សនាកម្សាន្តយ៉ាងច្រើនរាប់លាននាក់ក្នុងមួយឆ្នាំៗ។
ក្រៅពីប្រាង្គប្រាសាទបុរាណរាប់រយ សៀមរាប ក៏នៅមានតំបន់ទេសចរណ៍បែបធម្មជាតិ ដូចជាបារាយណ៍ទឹកថ្លា និងតំបន់ជាច្រើនទៀត។ យ៉ាងណាមិញតំបន់ចុងឃ្នៀស ដែលស្ថិតនៅលើផ្ទៃបឹងទន្លេសាបក្នុងសង្កាត់ចុងឃ្នៀសក្រុងសៀមរាប មានចម្ងាយប្រមាណ១៤គីឡូម៉ែត្រពីក្រុងសៀមរាប បច្ចុប្បន្នក៏បាននិងកំពុងទាក់ទាញភ្ញៀវទេសចរយ៉ាងច្រើនចូលមកទស្សនាកម្សាន្ត មើលទេសភាពថ្ងៃលិចដ៏ស្រស់ត្រកាលនៅលើផ្ទៃបឹងទន្លេសាប ដែលល្បីខាងសម្បូរត្រីទឹកសាបក្នុងតំបន់ និងពិភពលោក។ ពិសេសអ្នកទេសចរនឹងបានពិនិត្យមើលពីជីវភាពរស់នៅរបស់ប្រជាពលរដ្ឋនៅលើផ្ទៃទឹកបឹងទន្លេសាប ដែលគេនិយមហៅជាទូទៅថា ផ្ទះបណ្តែតទឹក ឬអ្នកភូមិបណ្តែតទឹកនោះ ។
ផ្តល់បទសម្ភាសន៍ខ្លីជាមួយអ្នកឆ្លើយឆ្លងព័ត៌មានកោះសន្តិភាព លោកសែម វុទ្ធី មគ្គុទេសក៍ទេសចរណ៍នៅតំបន់សៀមរាបអង្គរ ដែលកំពុងតែជូនដំណើរ និងរ៉ាយរ៉ាប់ប្រាប់ភ្ញៀវទេសចរជនជាតិថៃទៅកម្សាន្តនៅតំបន់ចុងឃ្នៀសនោះឲ្យដឹងថា ភ្ងៀវទេសចរអន្តរជាតិភាគច្រើនដែលមកលេងនៅទីនេះ គឺចង់ឃើញនូវទិដ្ឋភាព ក៏ដូចជាការរស់នៅរបស់ប្រជាពលរដ្ឋនៅទីនោះប្រកបរបរអ្វី? ព្រមទំាងទស្សនាផ្ទៃបឹងទន្លេសាបមានសភាពដ៏ស្រស់ស្អាតនេះ។ លោកបាន បន្តថា ភ្ងៀវទេសចរកាន់តែច្រើនឡើងៗ ជា ពិសេសភ្ញៀវជនជាតិអឺរ៉ុបបានចូកមកកម្សាន្តនៅទីនេះ ព្រោះជាបឹងទឹកសាបដ៏ធំ ហើយមានតំបន់ព្រៃលិចទឹកដុះព័ទ្ធជុំវិញគួរឲ្យគយគន់ពន់ពេក ។
យ៉ាងណាក៏ដោយ ជាមួយនឹងមោទនភាពនៃការកើនឡើងនូវចំនួនភ្ញៀវទេសចរនៅតំបន់ចុងឃ្នៀសនេះ លោកសែម វុទ្ធី ក៏បានសំណូមពរទៅដល់អាជ្ញាធរមានសមត្ថកិច្ចមេត្តាជួយទប់ស្កាត់ដល់ក្មេងៗសុំទាននៅទីនោះកុំឱ្យមានតទៅទៀត ពីព្រោះបញ្ហានេះ បានធ្វើឱ្យប៉ះពាល់ដល់អារម្មណ៍ភ្ញៀវទេសចរធ្វើឲ្យភ្ញៀវទំាងនោះ មិនសប្បាយចិត្ត និងមើលងាយមើលថោកដល់ពលរដ្ឋខ្មែរថែមទៀត ។
ដោយឡែកម្ចាស់ផែមួយនៅតំបន់ចុងឃ្នាស អ្នកស្រី លីបានឲ្យដឹងថា គាត់ប្រកបរបរដឹកជញ្ជូនភ្ញៀវនេះរយៈពេល២០ឆ្នាំហើយ តែក្រៅពីរបរដឹកជញ្ជូនភ្ញៀវ នៅលើផែរបស់គាត់ ក៏មានដាក់លក់នូវវត្ថុអនុស្សាវរីយ៍ ម្ហូបអារហារ និងចិញ្ចឹមសត្វគ្រប់ប្រភេទគ្រាន់ឲ្យភ្ងៀវទេសចរទស្សនាផងដែរ។ គាត់បញ្ជាក់ថា ទំនិញដែលលក់នៅលើផែរបស់គាត់ គឺមានតម្លៃសមរម្យ ហើយមិនមានការឡើងចុះនោះទេទោះជាចំថ្ងៃបុណ្យផ្សេងៗក៏ដោយ ។ អ្នកស្រីបានសំណូមពរឲ្យរាជរដ្ឋាភិបាលជួយផ្សព្វផ្សាយយ៉ាងណា ដើម្បីឲ្យភ្ងៀវទេសចរទំាងជាតិ និងអន្តរជាតិ ចូលមកកម្សាន្តនៅតំបន់ចុងឃ្នៀសឲ្យបានច្រើន ព្រោះនៅទីនេះសំបូរទិដ្ឋភាពប្លែកៗ សម្រាប់ភ្ញៀវកម្សាន្ត និងទស្សនា។
ប្រធានគ្រប់គ្រងទីផ្សារសមាគមទូកសម្រាប់ដឹកភ្ងៀវទេសចរលោកគឹម សុផានី បានប្រាប់កោះសន្តិភាពឲ្យដឹងថា ចំនួនភ្ងៀវទេសចរមកលេងនៅទីនេះជាពិសេសក្នុងខែឧសភា ដែលគេហៅថាជាខែឡូនេះ គឺមិនសូវជាសម្បូរភ្ងៀវមកកម្សាន្តទេ ។ ភ្ញៀវភាគច្រើនមានជនជាតិកូរ៉េ ចិន និងជនជាតិវៀតណាម ដោយក្នុងមួយថ្ងៃប្រហែលជា៥០០ ទៅ១០០០នាក់ ប៉ុណ្ណោះ។ លោកប្រធានគ្រប់គ្រងទីផ្សារសមាគមទូកសម្រាប់ដឹកភ្ញៀវទេសចរបានប្រាប់បន្តថា ចំនួនទូកទេសចរណ៍មានជាង៣០០ទូក សម្រាប់បម្រើសេវា ហើយនៅលើទូកគឺមានការរៀបចំចំតុបតែងឲ្យមានសោភ័ណភាពស្រស់ស្អាត ក្រៅពីនោះក៏មាន អាវពោងសម្រាប់ពាក់ការពារសុវត្ថិភាពដល់ភ្ញៀវ និងមានសរសរពាក្យស្លោកផ្សេងៗដូចជា សូមឲ្យការធ្វើដំណើរលោកអ្នកប្រកបដោយសុវត្ថិភាពជាដើម ។
បើសិនជាភ្ញៀវចង់ទៅទស្សនា គឺធ្វើដំណើរប្រហែលជា៣០នាទី ចាប់ពីកំពង់ផែរហូតដល់តំបន់ចុងឃ្នៀសព្រោះខែនេះជាខែប្រាំងហើយនៅពេលដែលភ្ញៀវទៅ គឺអាចជិះទូកបណ្តើរទស្សនាទេសភាពនៅតាមបឹងទន្លេសាបបណ្តើរ ។ លោកប្រធានគ្រប់គ្រងទីផ្សារសមាគមទូកសម្រាប់ដឹកភ្ញៀវទេសចរ បានបញ្ជាក់ឲ្យដឹងដែរថា ភ្ញៀវមួយចំនួនដែលមកកម្សាន្ត គឺចង់ទស្សនានៅពេលយប់ ព្រោះពេលយប់បងប្អូនអ្នកនេសាទយើងគាត់ចាប់ផ្តើមនេសាទត្រីកញ្ជាញ់ច្រាស់ ដែលប្រជានេសាទបានដាក់ភ្លើងពណ៌ស្រស់ស្អាតផងដែរ ហើយទេសភាពបែបនេះស្រស់ស្អាតមែនទែន ។
យ៉ាងណាក៏ដោយ លោកគឹម សុផានី បានបញ្ជាក់ថា ឆ្នាំមុនដោយសារតែមានទឹកជំនន់ជន់លិច ធ្វើឱ្យចំនួនភ្ញៀវមានការធ្លាក់ចុះ ដោយសារទឹកលិចពិបាកក្នុងការធ្វើដំណើរទៅកាន់តំបន់នោះ។ ប៉ុន្តែចូលដល់ឆ្នាំ២០១២នេះ គឺមានភាពងាយស្រួល ដោយសារមានក្រុមហ៊ុនមួយដែលមានឈ្មោះថា ក្រុមហ៊ុនសូជីង ដែលបានបង្កើតកំពង់ផែនៅទីនេះ បង្កឱ្យមានភាពងាយស្រួលក្នុងការធ្វើដំណើររបស់ភ្ងៀវទេសចរ ។ មិនតែប៉ុណ្ណឹង នៅពេលដែលក្រុមហ៊ុនមកបង្កើតនៅទីនេះធ្វើឱ្យបងប្អូនប្រជាពលរដ្ឋយើង គឺមានការងារធ្វើបានមួយចំនួនធំផងដែរ។
ស្ថិតក្នុងសំលៀកបំពាក់អាវ.កឌុបដៃវែងពណ៌ខៀវ លោកអែល ម៉ាន ជាចៅសង្កាត់ ចុងឃ្នៀស បានឲ្យដឹងថាចំនួនប្រជាជននៅក្នុងសង្កាត់របស់គាត់មានចំនួន១.២២២គ្រួសារ ហើយប្រជាពលរដ្ឋពី៦០ទៅ៦៥% ជាប្រជានេសាទ និងមួយចំនួនជាអ្នកដឹកភ្ញៀវទេសចរ ហើយចំពោះអ្នករស់នៅលើទឹក ក្រៅពីនេសាទគឺពួកគាត់លក់ដូរវត្ថុអនុស្សាវរីយ៍ឲ្យភ្ញៀវទេសចរនៅទីនោះ។ លោកចៅសង្កាត់បន្តថា ការរស់នៅរបស់ប្រជាពលរដ្ឋ គឺមិនទៀងទាត់ទេ ពេលណាមានទឹកជំនន់ គឺបងប្អូនយើងធ្វើផ្ទះបណ្តែតលើផ្ទៃទឹក ហើយប្រជាពលដ្ឋដែលនៅលើគោក បើសិនជាមានទឹកជន់លិច គឺពួកគាត់ផ្លាស់ទីលំនៅទៅនៅក្បែរជើងភ្នំក្រោម។ ដូច្នេះហើយពេលខ្លះ ធ្វើឱ្យចំនួនប្រជាជនមានការផ្លាស់ប្តូរមិនទៀងទាត់។
លោកអែល ម៉ាន បានប្រាប់កោះសន្តិភាពបន្តថាចំនួនភ្ងៀវទេសចរដែលមកកម្សាន្តនៅតំបន់ចុងឃ្នៀសនេះ មានចំនួនច្រើនគួរសមដែរ ហើយថាភ្ងៀវភាគច្រើនដែលទៅលេង គឺគេទៅមើលភូមិបណ្តែតទឹក និងព្រៃសហគមន៍ដែលមានសត្វច្រើនប្រភេទសម្រាប់ភ្ញៀវទស្សនា។ យ៉ាងណាក៏ដោយ លោកចៅសង្កាត់ចុងឃ្នៀសបានសំណូមពរដល់រាជរដ្ឋាភិបាលកម្ពុជា សប្បុរសជន ឬអង្គការមិនមែនរដ្ឋាភិបាលនានា ជួយផ្សព្វផ្សាយដល់ភ្ងៀវទេសចរជាតិ និងអន្តរជាតិឱ្យមកលេងនៅតំបន់ចុងឃ្នៀសនេះ ដើម្បីឱ្យប្រជាពលរដ្ឋមានការងារធ្វើ និងរកប្រាក់ចំណូលផ្គត់ផ្គង់ជីវភាពរបស់ពួកគាត់។
ប្រធានមន្ទីរទេសចរណ៍ខេត្តសៀមរាប លោកង៉ូវ សេងកាក់ បានឱ្យដឹងថា តំបន់ទេសចរណ៍នៅបឹងទន្លេសាបមាន៤កន្លែង ដែលភ្ញៀវទេសចរភាគច្រើនចូលចិត្តទៅកម្សាន្តរួមមានតំបន់មេជ្រៃ កំពង់ភ្លក់ កំពង់ឃ្លាំង និងតំបន់ចុងឃ្នៀស ។ ប៉ុន្តែលោកបញ្ជាក់ដែរថា ភ្ញៀវទេសចរភាគច្រើនទៅកម្សាន្តនៅតំបន់ចុងឃ្នៀស ព្រោះសម្បូរដោយទេសភាពស្រស់ស្អាត ជាពិសេសពេលថ្ងៃលិច។ លោកប្រធានមន្ទីរទេសចរណ៍ខេត្តសៀមរាប បានបន្តថា ក្នុងចំណោមភ្ញៀវទេសចរអន្តរជាតិដែលមកលេងក្នុងខេត្តសៀមរាបទំាងអស់ គឺប្រមាណ៤៥ភាគរយទៅកម្សាន្ត និងមើលទេសភាពនៅតំបន់ចុងឃ្នៀសលើផ្ទៃបឹងទន្លេសាប។
បើទោះបីជាមិនទាន់មានតួលេខនៅក្នុងដៃក៏ដោយ ក៏លោកប្រធានមន្ទីរទេសចរណ៍ខេត្តសៀមរាប បានកត់សម្គាល់ឃើញថា ភ្ញៀវទេសចរទំាងជាតិ និងអន្តរជាតិ ដែលមកលេងកម្សាន្តនៅខេត្តសៀមរាបក្នុងឆ្នាំ២០១២នេះ មានការកើនឡើង ហើយថា នៅតំបន់ចុងឃ្នៀសលើផ្ទៃបឹងទន្លេសាបចំនួនភ្ញៀវទេសចរ ក៏មានការកើនឡើងផងដែរ ។
លោកង៉ូវ សេងកាក់ បានបញ្ជាក់ឲ្យដឹងដែរថា ក្នុងពេលបច្ចុប្បន្ននេះ មន្ទីរទេសចរណ៍បាននិងកំពុងរៀបចំសណ្តាប់ធ្នាប់សន្តិសុខឲ្យប្រសើរឡើងថែមទៀត ក៏ដូចជាត្រៀមបើកវគ្គបណ្តុះបណ្តាលមគ្គុទេសក៍ទេសចរណ៍ និងបណ្តុះបណ្តាលភាសាដល់សហគមន៍ទេសចរណ៍តំបន់បឹងទន្លេសាប និងបង្ហាត់បង្រៀនពីរបៀបតុបតែងលម្អសោភ័ណភាពលើទូកទេសចរណ៍ជាដើម ដើម្បីទាក់ទាញភ្ញៀវទេសចរបន្ថែមទៀតឲ្យចូលមកកម្សាន្តនៅតំបន់ចុងឃ្នៀស និងតំបន់ដទៃទៀតក្នុងខេត្តសៀមរាប ៕
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
