រៀងរាល់ថ្ងៃសុក្រ ខ្មែរឡូត នឹងធ្វើការដកស្រង់ ព័ត៌មានសំខាន់ៗ មួយចំនួន ពីប្រភពសារព័ត៌មាននានា អំពីដំណើរវិវឌ្ឍន៍នយោបាយ នៅក្នុងប្រទេសកម្ពុជា យកមកចែករំលែក ជូនដល់ប្រិយមិត្តបានជ្រាប ជាដំណឹង។ នៅក្នុងសប្តាហ៍នេះ មានប្រធានបទ គួរឲ្យចាប់អារម្មណ៍ ដែលនឹងមានខ្លឹមសារត្រួសៗ ដូចខាងក្រោម៖
នាយករដ្ឋមន្ត្រីប្រាប់ពលរដ្ឋ ឈប់ខ្វល់រឿងបណ្ណបើកបរម៉ូតូ
នៅថ្ងៃទី៧ មករានេះ សម្តេចនាយករដ្ឋមន្ត្រី ហ៊ុន សែន បានបញ្ជាក់ម្តងទៀតពីការឈប់ផាកពិន័យ បណ្ណបើកបរម៉ូតូកម្លាំង ១២៥cc ចុះក្រាម ស្របពេលសមត្ថកិច្ច ចុះអនុវត្តន៍ច្បាប់ស្តីពី ចរាចរណ៍ផ្លូវគោកថ្មី រយៈពេល ៧ថ្ងៃរហូតមកនេះ។ សម្តេចមានប្រសាសន៍យ៉ាងដូច្នេះថា៖«ចាប់ពីពេលនេះតទៅ អស់កម្មអស់ពារហើយ ទៅលើបញ្ហាម៉ូតូដែលមានកម្លាំង ១២៥ cc ចុះក្រាម។ ហើយសូមកុំឆ្ងល់លើរឿងនេះទៀត ប្រសិនបើអាជ្ញាធរណារារាំង ទៅលើបញ្ហានេះ អ្នកនោះ គឺប្រឆាំងជាមួយនឹងផលប្រយោជន៍ស្របច្បាប់ របស់ប្រជាជនដែលនាយករដ្ឋមន្ត្រី នៃព្រះរាជាណាចក្រកម្ពុជា ផ្តល់ជូនប្រជាពលរដ្ឋ ដើម្បីដោះស្រាយការលំបាក បញ្ចប់ការលំបាក របស់ប្រជាជន»។ ប្រភព៖ ថ្មីៗ
លោក សម រង្ស៊ី ថា៧មករាជាឆាកល្ខោន របស់វៀតណាម តែលោក ហ៊ុន សែន ថាអ្នកប្រឆាំង៧មករាគឺសម្ព័ន្ធមិត្តប៉ុលពត
លោក សម រង្ស៊ី បានធ្វើការកត់សម្គាល់ដូចនេះ តាមរយៈសាររបស់លោក លើទំព័របណ្ដាញសង្គមហ្វេសប៊ុក។ សាររបស់លោកបានរៀបរាប់ ដូចនេះថា៖ “គេថាគេមករំដោះយើងពីខ្មែរក្រហម តែបើអត់មានយួនកុំម្មុយនីស្ដពីដើមទី ក៏អត់មានខ្មែរក្រហមដែរ។ ឥឡូវនេះគេថា បើគ្មានថ្ងៃ៧ មករា ១៩៧៩ ក៏គ្មានអ្វីៗដែលយើងមានសព្វថ្ងៃដែរ។ តែបើគ្មានថ្ងៃ ១៧ មេសា ១៩៧៥ (ថ្ងៃខ្មែរក្រហមឡើងកាន់អំណាច) ក៏គ្មានថ្ងៃ៧ មករា ១៩៧៩ ដែរ”។ ប្រធានគណបក្សប្រឆាំងរូបនេះបន្តទៀតថា៖ “បើគ្មានពួកកុំម្មុយនីស្ដយួនជួយពួកខ្មែរក្រហម ក្នុងដើមទសវត្សរ៍ ឆ្នាំ១៩៧០ ក៏គ្មានថ្ងៃ ១៧ មេសា ១៩៧៥ដែរ។ ដូច្នេះ មួយផ្នែកធំនៃរឿងរ៉ាវក្នុងរយៈពេល ជិត ៥០ឆ្នាំកន្លងមកនេះ គឺមានការរៀបចំយ៉ាងសកម្មដោយយួនកុំម្មុយនីស្ដ ដើម្បីបំភ័ន្ដភ្នែកប្រជារាស្ដ្រខ្មែរ”។ លោក ហ៊ុន សែន មានប្រសាសន៍ដូចនេះថា៖ “៧ មករា មានសត្រូវតែមួយប៉ុណ្ណោះ គឺរបបប្រល័យពូជសសាសន៍ប៉ុល ពត គឺមានអ្នកស្រឡាញ់របបប្រល័យពូជសសាសន៍ ប៉ុណ្ណោះដែលប្រឆាំង៧ មករា ទោះបី នៅមានក្រុមអ្នកនយោបាយ និងមជ្ឈដ្ឋានអគតិមួយចំនួនព្យាយាមមួលបង្កាច់ឥតឈប់ឈរនូវអត្តន័យ ជាប្រវត្តិសាស្ត្រ នៃថ្ងៃ៧មករាយ៉ាងណាក្ដី ក៏ពួកគេពុំអាចធ្វើឱ្យសភាពការណ៍កម្ពុជាផ្លាស់ប្ដូរបានឡើយ ព្រោះ ថា ៧មករាគឺជារបស់ប្រជាជន ហើយអ្វីៗដែលពួកគេបានធ្វើគឺផ្ទុយពីឆន្ទៈ និងផលប្រយោជន៍របស់ប្រជាជន ហើយក្រុមប្រឆាំងថ្ងៃ៧មករាជាសម្ព័ន្ធមិត្តប៉ុលពល"។ ប្រភព៖ VOD
រដ្ឋមន្ត្រីក្រសួងការបរទេស និងពាណិជ្ជកម្មហុងគ្រី មកបំពេញទស្សនកិច្ច នៅកម្ពុជាសប្ដាហ៍ក្រោយ
ក្រសួងការបរទេសកម្ពុជាឲ្យដឹងថា រដ្ឋមន្ត្រីក្រសួងការបរទេស និងពាណិជ្ជកម្មនៃប្រទេសហុងគ្រីលោក ពិទ័រ ហ្ស៊ីហ្សារតូ (Péter Szijjártó) នឹងដឹកនាំគណៈប្រតិភូមកបំពេញទស្សនកិច្ចផ្លូវការនៅប្រទេសកម្ពុជាចាប់ពីថ្ងៃទី១៣ ដល់ថ្ងៃទី១៤ ខែមករា ដើម្បីពង្រឹង និងពង្រីកបន្ថែមទំនាក់ទំនងរវាងប្រទេសទាំងពីរ។ សេចក្តីជូនដំណឹងរបស់ក្រសួងការបរទេសដែលចេញផ្សាយនៅថ្ងៃសុក្រនេះ ឲ្យដឹងថា ដំណើរទស្សនកិច្ចរបស់រដ្ឋមន្ត្រីការបរទេស និងពាណិជ្ជកម្មនៃប្រទេសហុងគ្រី ធ្វើឡើងតាមការអញ្ជើញរបស់លោក ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា។ ប្រភព៖ VOD
លោក ស ខេង ថាវៀតណាម ព្រមឈប់ជួលដីខ្មែរ នៅតាមព្រំដែន
ដ្ឋមន្ត្រីក្រសួងមហាផ្ទៃ លោក ស ខេង ថ្លែងនៅថ្ងៃទី៦ មករា នេះថា ចាប់ពីពេលនេះតទៅ វៀតណាម នឹងឈប់ជួលដី និងពិចារណាលើការជួលដីទាំងអស់តាមបណ្ដោយព្រំដែននៃប្រទេសទាំងពីរ។ លោក ស ខេង ថ្លែងដូច្នេះ បន្ទាប់ពីកិច្ចប្រជុំការងារជាមួយនឹងមន្ត្រីពន្ធនាគារនាក្រសួងមហាផ្ទៃ ដោយអះអាងថា រដ្ឋាភិបាលវៀតណាម បានសម្រេចឈប់ឲ្យពលរដ្ឋគេជួលដីខ្មែរតាមព្រំដែន ហើយនឹងប្រគល់ដីនោះមកកម្ពុជា វិញ។ កាលពីពេលថ្មីៗនេះ ប្រមុខរដ្ឋាភិបាលកម្ពុជា បានស្នើដល់ភាគីវៀតណាម ឈប់ជួលដីខ្មែរនៅតាមព្រំដែន ព្រោះការជួលដីនោះ មិនបានផ្ដល់ផលប្រយោជន៍ដល់ពលរដ្ឋកម្ពុជា នៅតាមព្រំដែនឡើយ។ ប្រភព៖ RFA
គណបក្សប្រឆាំងថាបក្សកាន់អំណាចខ្លាចលោក សម រង្ស៊ី ចូលរួមប្រកួតប្រជែងបោះឆ្នោត
មន្ត្រីជាន់ខ្ពស់គណបក្សសង្គ្រោះជាតិ លើកឡើងថា លោក សម រង្ស៊ី មិនខ្វល់នឹងដីកាចាប់ខ្លួនលោកជាបន្តបន្ទាប់នោះទេ។ ផ្ទុយទៅវិញ ការចេញដីកាចាប់ខ្លួនជាបន្តបន្ទាប់នេះ គឺបង្ហាញថា ដោយសារគណបក្សកាន់អំណាចខ្លាចវត្តមានរបស់ លោក សម រង្ស៊ី ឬគណបក្សសង្គ្រោះជាតិ ដោយសារតែគណបក្សកាន់អំណាច បានដឹកនាំប្រទេសជាង ៣០ឆ្នាំមក មានរឿងអយុត្តិធម៌ ជាច្រើន កើតឡើងនៅក្នុងសង្គម ដែលគណបក្សនេះគ្មានសមត្ថភាពដោះស្រាយ។ មន្ត្រីជាន់ខ្ពស់គណបក្សសង្គ្រោះជាតិ ថ្លែងមិនចាប់អារម្មណ៍នឹងដីកាមួយថ្មីទៀតរបស់តុលាការ បង្គាប់ឲ្យចាប់ខ្លួន លោក សម រង្ស៊ី នោះឡើយ ដោយអះអាងថា គណបក្សកាន់អំណាចមានបំណងមិនឲ្យ លោក សម រង្ស៊ី ចូលរួមក្នុងការបោះឆ្នោតនៅពេលខាងមុខ។ លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បញ្ចេញប្រតិកម្មនៅថ្ងៃទី៦ មករា ថា សំណុំរឿងរបស់ លោក សម រង្ស៊ី ដែលតុលាការចេញដីកា ឲ្យចូលខ្លួនបំភ្លឺ និងដីកាបង្គាប់ឲ្យចាប់ខ្លួនផងនោះ គឺជាហេតុផលនយោបាយ មិនមែនជារឿងអ្វីផ្សេងនោះឡើយ៖ «ដោយបញ្ហាគាត់ដោះមិនចេញ ដូចជាបញ្ហាពុករលួយ រំលោភសិទ្ធិមនុស្ស ដីធ្លី ក្រីក្រ សេវាសាធារណៈផ្ដល់ជូនប្រជាពលរដ្ឋមិនល្អគ្មានគុណភាព»។ ប្រភព៖ RFA
ខ្មែរឡូត
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
