ស្ត្រីជនជាតិវៀតណាមម្នាក់កំពុងអង្គុយលើរទេះម៉ូតូលក់បបរចតនៅចិញ្ចើមផ្លូវ ស្រាប់តែមានរថយន្តកូរ៉េចំណុះ២តោនមួយគ្រឿងអ្នកបើកបរវិលមុខក៏ជ្រុលទៅបុករទេះម៉ូតូលក់បបរ បណ្តាលឱ្យបែកកញ្ចក់ទូ និងធ្លាក់ស្ត្រីនោះពីលើម៉ូតូដួលថ្លោះចង្កេះ កាលពីវេលាម៉ោង២រសៀលថ្ងៃទី៦ សីហា លើកំណាត់ផ្លូវលេខ២៧១ មុខភោជនីដ្ឋានសួនកុលាបភ័ក្រ ក្នុងសង្កាត់ផ្សារដើមថ្កូវ ខណ្ឌចំការមន ។
តាមអ្នកបើកបររថយន្តកូរ៉េចំណុះ២តោន ពណ៌ខៀវ បានឱ្យដឹងថា មុនពេលកើតហេតុរថយន្តរបស់គាត់ដឹកទ្វារដែកពីផ្សារតូចយកទៅឱ្យម៉ូយនៅម្តុំវត្តដំបូកខ្ពស់ បើករថយន្តតាមផ្លូវលេខ២៧១ ក្នុងទិសដៅពីលិចទៅកើត ខណៈមកដល់ចំណុចខាងលើគាត់វិលមុខទើបរេចង្កូតទៅបុករទេះម៉ូតូលក់បបរ ។ ចំណែកបុរសឈ្មោះហ្វុង អាយុ៤៣ឆ្នាំ ជនជាតិវៀតណាម ជាអ្នកលក់បបរតាមរទេះ ស្នាក់នៅផ្ទះជួលម្តុំលូទឹកស្អុយ ក្នុងសង្កាត់ទួលទំពូង២ ខណ្ឌចំការមន បានឱ្យដឹងថា ជារៀងរាល់ថ្ងៃគាត់តែងតែជិះម៉ូតូអូសរទេះលក់បបរពីរនាក់ប្រពន្ធឈ្មោះវ័ង ពិតលាង អាយុ៥៤ឆ្នាំ ។
មុនពេលកើតហេតុគាត់បានឈប់រទេះម៉ូតូបបរនៅលើចិញ្ចើមផ្លូវជាប់ភោជនីយដ្ឋានសួនកុលាបភ័ក្រចំណែករូបគាត់ដើរទៅទិញប៊ីចេង ស្ករ នៅជិតកន្លែងកើតហេតុនោះ ហើយប្រពន្ធ នៅអង្គុយលើម៉ូតូរង់ចាំលក់បបរ ស្របពេលនោះស្រាប់តែមានរថយន្តកូរ៉េ ពណ៌ខៀវ បើកទៅបុករទេះម៉ូតូបបរឮសូរផាំងធ្វើឱ្យប្រពន្ធរបស់គាត់ធ្លាក់ពីលើរទេះថ្លោះចង្កេះ និងរបួសជង្គង់ខាងស្តាំ ព្រមទាំងធ្វើឱ្យបែកកញ្ចក់ទូ និងកំពប់បបរខ្ចាយពេញថ្នល់ ។
ក្រោយពេលកើតហេតុ ស្ត្រីរងគ្រោះត្រូវបានបញ្ជូនទៅព្យាបាលនៅគ្លីនិកឯកជន ចំណែករថយន្តមិនបានបើករត់គេចទេ បានចុះទៅចរចាគ្នាជាមួយម្ចាស់រទេះបបរនោះ បុរសជាប្តីបានទាមទារសំណង២៥០ដុល្លារ យកមកព្យាបាលរបួស និងជួសជុលរទេះ តែខាងរថយន្តសុំសង២១០ដុល្លារ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
