ប៉ូលិសខណ្ឌចំការមន សហការជាមួយប៉ូលិសព្រហ្មទណ្ឌកម្រិតស្រាលនៃស្នងការដ្ឋានរាជធានីភ្នំពេញ បានចេញប្រតិបត្តិការឃាត់ខ្លួនជនសង្ស័យ៨នាក់ដែលជាប់ចោទបីបទប្រើប្រាស់និងជួញដូរគ្រឿងញៀន និងសង្ស័យអាចពាក់ព័ន្ធនឹងករណីប្លន់កន្លងមកនៅក្នុងរាជធានីផងដែរ ។ ប្រតិបត្តិការនេះបានធ្វើឡើងកាលពីព្រឹកថ្ងៃទី៧ សីហា នៅផ្ទះសំណាក់យីហោ ហ្គោលហោស៍ស្ថិតនៅតាមបណ្តោយផ្លូវលេខ២៧១ ក្នុងសង្កាត់ទួលទំពូងទី២ ខណ្ឌចំការមន ។
ជនសង្ស័យទាំង៨នាក់ដែលត្រូវប៉ូលិសឃាត់ខ្លួនមាន ១-ឈ្មោះ សែម វិបុល ភេទប្រុស អាយុ២៣ឆ្នាំ ស្នាក់នៅក្នុងសង្កាត់ទំនប់ទឹក ខណ្ឌចំការមន ២-ឈ្មោះសែម សំរុង ភេទប្រុស ស្នាក់នៅផ្ទះលេខ៣ ផ្លូវលេខ១៧៧ សង្កាត់ទំនប់ទឹក ខណ្ឌចំការមន ៣-ឈ្មោះ សែម រតនៈ ភេទប្រុស អាយុ១៦ឆ្នាំ ស្នាក់នៅជាមួយឈ្មោះ សែម សំរុង ៤-ឈ្មោះ ណុប គន្ធា ភេទប្រុស អាយុ២៦ឆ្នាំ ស្នាក់នៅផ្ទះជួលក្នុងសង្កាត់បឹងទំពុន ខណ្ឌមានជ័យ ៥-ឈ្មោះ ប៊ុត វាសនា ភេទប្រុស អាយុ៣០ឆ្នាំ ស្នាក់នៅផ្ទះលេខ៣៩៤ ផ្លូវលេខ២៧១ សង្កាត់ទំនប់ទឹក ខណ្ឌចំការមន ៦-ឈ្មោះ មាស លីនណា ភេទស្រី អាយុ២៤ឆ្នាំ ៧-ឈ្មោះ ធី កា ភេទប្រុស អាយុ២១ឆ្នាំ និង៨-ឈ្មោះ អ៊ីម សុខសំបូរ ភេទប្រុស អាយុ២៧ឆ្នាំ ស្នាក់នៅផ្ទះគ្មានលេខ ផ្លូវលេខ២៧១ សង្កាត់ ទួលទំពូងទី២ ខណ្ឌចំការមន ។
មន្ត្រីប៉ូលិសខណ្ឌចំការមនបានឱ្យដឹងថា មុនពេលឈានដល់ការឃាត់ខ្លួនជនសង្ស័យខាងលើ នេះ ប៉ូលិសព្រហ្មទណ្ឌខណ្ឌបានសហការជាមួយប៉ូលិសព្រហ្មទណ្ឌកម្រិតស្រាលរាជធានីភ្នំពេញ ស្រាវជ្រាវតាមចាប់ខ្លួនជនសង្ស័យដែលជាប់ពាក់ព័ន្ធនឹងករណីប្លន់កាលពីពេលកន្លងមក ។ ខណៈប៉ូលិសកំពុងប្រមាញ់តាមចាប់ខ្លួនក្រុមជនល្មើសនោះ ហើយមានការសង្ស័យនៅក្នុងផ្ទះសំណាក់យីហោហ្គោលហោស៍ក៏សុំការអនុញ្ញាតនិងសហការជាមួយម្ចាស់ផ្ទះសំណាក់ដើម្បីចូលឆែកឆេរមើលនៅតាមបន្ទប់នីមួយៗក្នុងផ្ទះសំណាក់ ។ ពេលឆែកឆេរនោះ សមត្ថកិច្ចបានឃាត់ខ្លួនជនសង្ស័យបីនាក់ នៅក្នុងបន្ទប់លេខ១៥ សង្ស័យពាក់ព័ន្ធនឹងបទល្មើសប្លន់ និងបានឆែកឆេរបន្ទប់ ផ្សេងៗទៀត ឈានដល់ការឃាត់ខ្លួនបានប្រាំនាក់ទៀត ដែលជាប់ពាក់ព័ន្ធនឹងការប្រើប្រាស់និងជួញដូរគ្រឿញៀន ថែមទាំងរកឃើញឧបករណ៍ប្រើប្រាស់ថ្នាំញៀន និងថ្នាំញៀនមួយចំនួនតូច សម្ភារជាច្រើនទៀត ។
បន្ទាប់ពីឃាត់ខ្លួនជនសង្ស័យទាំង៨នាក់នេះ ប៉ូលិសខណ្ឌចំការមនក៏បានប្រគល់ទៅឱ្យប៉ូលិសព្រហ្មទណ្ឌកម្រិតស្រាលរាជធានី ដើម្បីយកទៅសាកសួរតាមចាប់បក្សពួកគេបន្តទៀត ។ ទោះជាយ៉ាងណា ទាក់ទិននឹងការឃាត់ខ្លួនជនសង្ស័យខាងលើនេះ សមត្ថកិច្ចមិនទាន់អាចប្រាប់បានថា មានអ្នកពាក់ព័ន្ធនឹងករណីប្លន់ប៉ុន្មាននាក់នោះទេ ព្រោះកំពុងស្ថិតក្នុងការសាកសួរតាមនីតិវិធី ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]