រាជធានីភ្នំពេញ ៖ ក្រោយពីប្រឡូកក្នុងពិភពសិល្បៈបានប្រមាណ២ឆ្នាំ និងទើបតែបញ្ចប់ការសម្តែងជាតួឯកលើកដំបូងក្នុងខ្សែភាពយន្តរឿង«ផ្ការីកក្នុងចិត្ត» ស្រីស្រស់សាច់សខ្ចីសាត រស្មី បានសម្រេចចិត្តដើរចេញពីពិភពសិល្បៈដោយសារតែរងគំនាបពីឪពុកម្តាយ ។
ការសម្រេចចិត្តដ៏តក់ក្រហល់របស់តារាសម្តែងរូបនេះត្រូវទស្សនិកជនដែលធ្លាប់គាំទ្រការសម្តែងរបស់នាងខកចិត្ត និងសម្តែងការភ្ញាក់ផ្អើលព្រោះនាងកំពុងតែបោះជំហានបានយ៉ាងល្អក្នុងវិស័យសិល្បៈ តែបែរជាត្រូវបោះបង់ទៅវិញ។ អ្នកក្នុងរង្វង់សិល្បៈមួយចំនួនលើកឡើងថា ការឈានជើងដើរចេញពីអាជីពសិល្បៈរបស់ សាត រស្មី នាពេលនេះទំនងមកពីនាងត្រូវអាណាព្យាបាលរៀបចំឱ្យមានស្វាមី ទើបបានជាពួកគាត់មិនចង់ឱ្យនាងចូលប្រឡូកសិល្បៈ ជាពិសេសឈុតឱបថើបក្នុងពេលសម្តែង ។ ម្យ៉ាងទៀតប្រហែលជាឪពុកម្តាយរបស់តារារូបនេះត្រៀមរៀបចំផ្សំផ្គុំនាងជាមួយបុរសដែលមានមុខមាត់ម្នាក់ ហើយបុរសរូបនោះអាចដាក់គំនាបដ៏តឹងតែងមួយនេះ ។
ជុំវិញបញ្ហានេះនៅថ្ងៃទី៦ សីហា ឆ្នាំ២០១២ កោះសន្តិភាពបានទាក់ទងសុំការបញ្ជាក់ពីកញ្ញា សាត រស្មី ប៉ុន្តែទូរស័ព្ទរបស់នាងត្រូវនារីម្នាក់ជាអ្នកលើកដោយអះអាងថា ជាប្អូនស្រីរបស់នាង។ នារីជាប្អូនបញ្ជាក់ថា នាងសាត រស្មី ពិតជាសម្រចចិត្តបោះបង់ចោលសិល្បៈមែន ដោយសារគំនាបរបស់ម្តាយ ពោលគឺមិនមែនដូចបញ្ហាអ្វីដែលគេនិយាយទេ ។ នាងបញ្ជាក់ថា «បងស្រីរបស់នាងខ្ញុំបានឈប់ពីសិល្បៈហើយ ដោយសារតែម៉ាក់និងប៉ា មិនចង់ឱ្យគាត់ចាប់យកអាជីពនេះឡើយ ព្រោះតែពួកគាត់ខ្លាចមានរឿងអាស្រូវផ្សេងៗ និងការនិយាយមិនល្អពីបងស្រីរបស់ខ្ញុំ ហើយមានចុះផ្សាយរឿងនេះក្នុងទំព័រសារព័ត៌មាន ។ កាលដើមឡើយម៉ាក់ ប៉ាខ្ញុំមិនចូលចិត្តឱ្យកូនប្រឡូកក្នុងសិល្បៈឡើយ តែដោយសារតែបងស្រីខ្ញុំគាត់ស្រឡាញ់ ហើយចេះតែទៅលួចថត» ។
ក្រោយពីបោះបង់ចោលសិល្បៈហើយ តាមនារីជាប្អូនរូបនោះបញ្ជាក់ថា នាងសាត រស្មី ទៅធ្វើការងាររាជការជាមួយម្តាយវិញ ។
កញ្ញា សាត រស្មី ចូលប្រឡូកសិល្បៈក្នុងអំឡុងឆ្នាំ២០០៩ ប៉ុន្តែនាងមិនសូវមានសកម្មភាពលេចធ្លោទេ គឺក្រៅពីថតខារ៉ាអូខេបានប្រមាណ២០បទ នាងទើបតែចាប់បានតំណែងតួឯកមួយរឿងប៉ុណ្ណោះ គឺរឿង«ផ្ការីកក្នុងចិត្ត»ដែលបញ្ចាំងលើកញ្ចក់ទូរទស្សន៍ ស៊ី ធី អិន នាពេលថ្មីៗនេះ ។
មិនមែនតែកញ្ញា សាត រស្មី មួយទេដែលខណៈអាជីពសិល្បៈកំពុងតែលេចធ្លោស្រាប់តែបោះបង់ទៅវិញ គឺកន្លងមកមានដូចជាកញ្ញា ដួង ម៉ាណា ពិធីការិនីស្ថានីយទូរទស្សន៍ប៉ុស្តិ៍លេខ៥ និងជាតួឯកក្នុងរឿងសេដ្ឋីស្រុកស្រែជាដើម ។កញ្ញា សាត រស្មី កំពុងតែមានរស្មីក្នុងពិភពសិល្បៈស្រាប់តែរលត់ទៅវិញ ព្រោះតែឪពុកម្តាយមិនចង់ឱ្យនាងប្រឡូកក្នុងវិស័យនេះ ។ នាងត្រូវរស់ក្នុងភាពសាមញ្ញវិញ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]