ខេត្តក្រចេះ ៖ ប្រជាពលរដ្ឋ និងអាជីវករនៅក្រុងក្រចេះ បានត្អូញត្អែរអំពីតម្លៃភ្លើងអគ្គិសនីរបស់វៀតណាម ដែលអាជ្ញាធរតភ្ជាប់សម្រាប់ប្រើប្រាស់សព្វថ្ងៃថា មានតម្លៃថ្លៃ និងផ្គត់ផ្គង់ការប្រើប្រាស់មិនគ្រប់គ្រាន់ ហើយការដាច់ចរន្តតែងតែកើតមានឡើងជារៀងរាល់ថ្ងៃ ។ក្រុមអាជីវករ និងប្រជាពលរដ្ឋនិយាយថា ក្នុងរយៈពេលប៉ុន្មានខែចុងក្រោយនេះ បន្ទាប់ពីអាជ្ញាធរបានតភ្ជាប់ចរន្តអគ្គិសនីពីប្រទេសវៀតណាម មក គឺពួកគាត់ជួបប្រទះការលំបាកយ៉ាងខ្លាំងសម្រាប់ការប្រើប្រាស់ ជាពិសេសអ្នកប្រកបរបរអាជីវកម្មដែលពឹងផ្អែកទៅលើចរន្ត អគ្គិសនី ខណៈដែលការដាច់ចរន្តតែងតែកើតមានជាបន្តបន្ទាប់ស្ទើរតែទាំង យប់ទាំងថ្ងៃនោះ ។
ពួកគាត់និយាយថា មិនត្រឹមតែអគ្គិសនី ដែលផ្គត់ផ្គង់ឱ្យពួកគាត់ប្រើមិនគ្រប់គ្រាន់នោះទេ សូម្បីតែតម្លៃភ្លើងក៏នៅតែខ្ពស់ គឺថ្លៃ១.៧០០រៀលក្នុងមួយគីឡូវ៉ាត់ម៉ោង ខ្ពស់ជាងតំបន់ដទៃទៀត ដែលប្រើប្រាស់ភ្លើងវៀតណាមដូចគ្នា ។ ជាការឆ្លើយតប អាជ្ញាធរបានអះអាងប្រាប់ថា នេះគ្រាន់តែជាការសាកល្បងឱ្យប្រើប្រាស់បណ្តោះអាសន្នប៉ុណ្ណោះ ។ ម្ចាស់សិប្បកម្មផ្សារដែកមួយរូបនៅខេត្តក្រចេះ ដែលសុំមិនបញ្ចេញឈ្មោះនិយាយថា សព្វថ្ងៃមុខរបរអាជីវកម្មរបស់គាត់កំពុងមានការធ្លាក់ចុះ ខណៈដែលរបររកស៊ីរបស់គាត់ គឺពឹងផ្អែកទាំងស្រុងទៅលើការប្រើប្រាស់ភ្លើងអគ្គិសនីរដ្ឋ ។ បច្ចុប្បន្នចរន្តអគ្គិសនី ដែលគាត់ប្រើគឺនៅមានតម្លៃខ្ពស់ និងថែមទាំងរអាក់រអួលដាច់ចរន្តជារៀងរាល់ថ្ងៃទៀត ធ្វើឱ្យគាត់បាត់បង់ប្រាក់ចំណូលស្ទើតែរកលុយបង់ថ្លៃផ្ទះជួល មិនបានផង។
នៅក្នុងការប្រារព្ធកម្មវិធីវេទិកាសាធារណៈ ដែលបានធ្វើឡើងកាលពីព្រឹកថ្ងៃទី៦ សីហា ក្នុងសង្កាត់រកាកណ្តាល ក្រុងក្រចេះ ប្រជាពលរដ្ឋបានដាក់សំណួរទៅកាន់អាជ្ញាធរខេត្ត ក្រុង ពាក់ព័ន្ធជុំវិញតម្លៃភ្លើងអគ្គិសនីខេត្ត ជាពិសេសការផ្គត់ផ្គង់ភ្លើងប្រើមិនគ្រប់គ្រាន់ដែលតែងតែដាច់ ចរន្តជាញឹកញាប់ ។ ការឆ្លើយតបទៅនឹងការចោទសួររបស់ប្រជាពលរដ្ឋ នាពេលនោះលោកវ៉ា ថន អភិបាលរងខេត្ត បានមានប្រសាសន៍ថា ដោយសារចំនួនប្រជាពលរដ្ឋដែលប្រើប្រាស់ភ្លើងអគ្គិសនីក្នុងខេត្ត កាន់តែកើនឡើងទើបធ្វើឱ្យការផ្គង់ផ្គង់ភ្លើងអគ្គិសនីមិន គ្រប់គ្រាន់ខណៈដែលកុងត្រាតម្លៃភ្លើងពីអាជ្ញាធរប្រទេស វៀតណាមក្នុងឆ្នាំដំបូង គឺវៀតណាមបានផ្តល់ភ្លើងសម្រាប់ខេត្តក្រចេះតែត្រឹម១មេហ្គា វ៉ាត់ប៉ុណ្ណោះ ។
លោកអភិបាលរងខេត្ត បានអះអាងថា ជាមួយនឹងការឱ្យប្រើប្រាស់អគ្គិសនីវៀតណាម សាកល្បងនេះ និងតបទៅតាមកុងត្រារវាងអាជ្ញាធរប្រទេសទាំងពីរ នៅដើមឆ្នាំ២០១៣ គឺអាជ្ញាធរខេត្តបានស្នើឱ្យវៀតណាមតបណ្តាញភ្លើងចេញពីអនុស្ថានីយ របស់គេ ដោយផ្តល់បានទំហំ៤មេហ្គាវ៉ាត់ ទើបខេត្តអាចប្រើប្រាស់ភ្លើងបានគ្រប់គ្រាន់តាមតម្រូវការ ។ ជាមួយគ្នានេះ អាជ្ញាធរក៏នឹងមានវិធានការរិះរកឱ្យមានការបញ្ចុះតម្លៃឱ្យ សមស្របផងដែរ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
