ខេត្តកំពង់ស្ពឺ ៖ យ៉ាងហោចណាស់ ក្មេងប្រុសម្នាក់បានស្លាប់នៅនឹងកន្លែង និង៥នាក់ទៀតរងរបួសធ្ងន់ស្រាល ខណៈម្តាយដឹកពីសាលាត្រឡប់ទៅផ្ទះ ហើយជួបគ្រោះថ្នាក់ចរាចរណ៍ ដោយឡានដឹកទំនិញបុកពីក្រោយយ៉ាងពេញទំហឹង ។ ក្រោយបង្កហេតុអ្នកបើកបររថយន្តត្រូវបានប្រជាពលរដ្ឋឃាត់ខ្លួនប្រគល់ ឲ្យសមត្ថកិច្ចផងដែរ ។ ករណីគ្រោះថ្នាក់ចរាចរណ៍នេះកើតឡើងកាលពីវេលាម៉ោង៤ និង១២នាទីល្ងាច ថ្ងៃទី៣០ វិច្ឆិកា ២០១៥ លើផ្លូវជាតិលេខ៤ ចន្លោះគីឡូម៉ែត្រលេខ៤០-៤១ ស្ថិតក្នុងភូមិវល្លិ៍ស ឃុំវល្លិ៍ស ស្រុកសំរោងទង ខេត្តកំពង់ស្ពឺ ។
រថយន្តបង្កម៉ាកហ៊ីយ៉ាន់ដាយ(កូរ៉េ) ពណ៌ស ពាក់ស្លាកលេខ ភ្នំពេញ 3C-7153 បើកបរដោយឈ្មោះ ហ៊ន រដ្ឋា ភេទប្រុស អាយុ២៣ឆ្នាំ រស់នៅភូមិខ្លែងពណ៌ ឃុំជ្រៃវៀន ស្រុកព្រៃឈរ ខេត្តកំពង់ចាម ត្រូវបានប្រជាពលរដ្ឋចាប់ខ្លួនភ្លាមៗប្រគល់ឲ្យសមត្ថកិច្ច ។
ប្រភពពីសមត្ថកិច្ចស្រង់សំដីសាក្សីបានឲ្យដឹថា មុនពេលកើតហេតុគេបានឃើញរថយន្តបង្កធ្វើដំណើរមកពីទិសខាងកើតទៅទិស ខាងលិច មកដល់ចំណុចខាងលើបានបុកពីក្រោយម៉ូតូម៉ាក ហុងដា វ៉េវ ពណ៌ខ្មៅ គ្មានស្លាកលេខ បើកបរដោយស្ត្រីម្នាក់ ឌុបក្មេង៥នាក់ បណ្តាលឲ្យដួលរដូករណែលពេញផ្លូវ ។ ប្រភពបន្តថា ក្រោយបុកម៉ូតូបណ្តាលឲ្យមានអ្នកស្លាប់ និងរបួសរួចមក រថយន្តនោះបានរេចង្កូតធ្លាក់ប្រឡាយអមផ្លូវទៅមុខលែងរួច ក៏ត្រូវប្រជាពលរដ្ឋរួមគ្នាចាប់អ្នកបើកបរប្រគល់ឲ្យសមត្ថកិច្ច និងបានសុំអន្តរាគមន៍បញ្ជូនជនរងគ្រោះទៅសង្គ្រោះផងដែរ ។
មន្ត្រីនគរបាលស្រុកសំរោងទងបានឲ្យដឹងថា ស្ត្រីអ្នកបើកម៉ូតូឈ្មោះ ស្រី អាត ភេទស្រី អាយុ៣៤ឆ្នាំ បានរងរបួសធ្ងន់ រស់នៅភូមិចំបក់ ឃុំវល្លិ៍ស ស្រុកសំរោងទង ខេត្តកំពង់ស្ពឺ ឌុបក្មេងចំនួន៥នាក់ ១-ឈ្មោះ ថុង លីហួ ភេទប្រុស អាយុ៨ឆ្នាំ ស្លាប់នៅកន្លែងកើតហេតុ, ២-ឈ្មោះ ថុង ស៊ីហួយ ភេទស្រី អាយុ១១ឆ្នាំ រងរបួសស្រាល, ៣-ឈ្មោះ ថុង បូរ៉ា ភេទប្រុស អាយុ៧ឆ្នាំ រងរបួសធ្ងន់, ៤-ឈ្មោះ ស៊ូ ពិសាល ភេទប្រុស អាយុ៥ឆ្នាំ រងរបួសស្រាល និង ៥-ឈ្មោះ ធឿន វណ្ណ: ភេទប្រុស អាយុ៦ឆ្នាំ រងរបួសស្រាល ទាំងអស់គ្នារស់នៅភូមិ-ឃុំជាមួយគ្នា ។
ប្រភពបន្តថា ចំពោះសពសមត្ថកិច្ចបានប្រគល់ជូនក្រុមគ្រួសារយកទៅធ្វើបុណ្យតាម ប្រពៃណី ចំណែកអ្នករងរបួសបញ្ជូនទៅពេទ្យសម្ភពថ្នល់ទទឹង ។
បច្ចុប្បន្ន វត្ថុតាង និងរថយន្តខូចកំរិតស្រាល ម៉ូតូខូចកម្រិតធ្ងន់ សមត្ថកិច្ចបានយកមករក្សាទុកនៅអធិការដ្ឋាននគរបាលស្រុកសំរោងទង ។ ចំពោះអ្នកបើកបរសមត្ថកិច្ចឃាត់ខ្លួន និងកំពុងធ្វើការសាកសួរតាមនីតិវិធី ។
នៅព្រឹកថ្ងៃទី០១ ធ្នូ ២០១៥នេះដែរ តាមរយៈសមត្ថកិច្ច ថៅកែរថយន្តបង្កបានផ្ញើថវិការមួយចំនួនទៅចូលបុណ្យសពកុមាររងគ្រោះ ដល់ផ្ទះផ្ទាល់ និងយកថវិការមួយចំនួនទៀតជួយដល់អ្នករងរបួសផងដែរ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
