ខេត្តរតនគិរី ៖ មណ្ឌលសុខភាពសង្កាត់កាចាញក្នុងខេត្តរតនគិរី រងការចោទប្រកាន់ពីប្រជាពលរដ្ឋថា មិនមានអ្នកប្រចាំការទទួលអ្នកជំងឺ និងមិនរវល់អើពើទុកឱ្យស្ត្រីម្នាក់ឆ្លងទន្លេនៅលើកៅអីរង់ចាំខាងមុខ ខណៈដែលស្ត្រីរូបនោះទៅដល់មណ្ឌលសុខភាពហើយ រង់ចាំពុំមានឃើញពេទ្យសួរនាំឡើយ ។
ស្ត្រីម្នាក់ឆ្លងទន្លេលើកៅអីរង់ចាំនៅមុខមណ្ឌលសុខភាព កាលពីវេលាម៉ោង០៥ព្រឹកថ្ងៃទី២៩ វិច្ឆិកា ២០១៥ ស្ថិតនៅភូមិ៤ សង្កាត់ កាចាញ ក្រុងបានលុង ខេត្តរតនគីរី ខណៈដែលប្ដីមិននៅ អ្នកជិតខាងជួយដឹកយកទៅដល់មណ្ឌលសុខភាព ។ ស្ត្រីរូបនោះឈ្មោះ វ៉ាត់ វាត អាយុ២៤ឆ្នាំ ជនជាតិខ្មែរ មានលំនៅក្នុងភូមិ១ សង្កាត់កាចាញ ក្រុងបានលុង ខេត្តរតនគីរី មានប្ដីឈ្មោះណែត រិទ្ធ អាយុ ២៤ឆ្នាំ មុខរបរជាកម្មករចៀរជ័រកៅស៊ូ នៅស្រុកលំផាត់ ។
បើតាមការឱ្យដឹងពីស្ត្រីឆ្លងទន្លេឈ្មោះវ៉ាត់ វាត នោះថា កូនដែលកើតមកនេះ បានកូនស្រីដែលជាកូនទី៣ ។ ពេលដែលគាត់ឈឺពោះ ប្ដីគាត់មិននៅទេ ទៅចៀរជ័រឱ្យគេនៅស្រុកលំផាត់នៅតែម្ដាយ តែបានអ្នកជិតខាងជួយដឹកទៅមណ្ឌលសុខភាព ។ ពេលដែលទៅដល់ពេទ្យនោះម៉ោងជិត៥ពេលព្រឹកទៅហើយ មិនឃើញមានពេទ្យប្រចាំការទេ ទូរស័ព្ទទៅពេទ្យចូលហើយមិនមានអ្នកលើកទៀត ខណៈនោះគាត់ឆ្លងទន្លេតែម្ដង ។
ស្ត្រីម្នាក់ទៀតនៅជិតខាងនោះបាននិយាយថា កាលពី៥ខែកន្លងទៅនេះ គាត់ក៏បានឈឺពោះឆ្លងទន្លេដែរ ហើយទៅដល់មណ្ឌលសុខភាពនៅវេលាម៉ោង៣យប់ ពេលទៅមណ្ឌលសុខភាពខាងលើនេះ ប្រធានមណ្ឌលសុខភាពនោះថា ចាំដល់ម៉ោងទៅ ពីព្រោះពេទ្យឆ្មបមិននៅទេ គាត់ទៅដល់មុខមន្ទីរពេទ្យបង្អែកខេត្ត ក៏ឆ្លងទន្លេនៅមុខពេទ្យតែម្ដង។
ជុំវិញករណីខាងលើនេះ លោកកឹង សាវ៉ាត ប្រធានមណ្ឌលសុខភាព បានឱ្យដឹងតាមទូរស័ព្ទកាលពីថ្ងៃទី៣០ វិច្ឆិកា ២០១៥ នេះថា រឿងពុំមានអ្នកប្រចាំការអាចមានម្ដងម្កាល ជារឿងចៃដន្យពេលម៉ោង៤ និង៣០ទៅម៉ោង៥ភ្លឺ នៅពេលដែលដូរវេនអ្នកប្រចាំការ តែពុំមែនជារៀងរាល់ថ្ងៃនោះទេ ។
លោកទន់ ពៅ ចៅសង្កាត់កាចាញ ក៏បានឲ្យដឹងតាមទូរស័ព្ទនៅថ្ងៃនេះដែរថា បញ្ហានេះជារឿងចៃដន្យ ពីព្រោះស្ត្រីរូបនោះទៅដល់មណ្ឌលសុខភាពភ្លាម ក៏ឆ្លងទន្លេភ្លាម ក៏ប៉ុន្តែបញ្ហានេះ កាលពីមុនក៏ធ្លាប់មានម្ដងមកហើយៗ លោកក៏បានហៅប្រធានមណ្ឌលសុខភាពមកណែនាំម្ដងរួចមកហើយដែរ ។
ទោះជាយ៉ាងណា មណ្ឌលសុខភាពសង្កាត់កាចាញ មានបុគ្គលិកតិច ពុំមានបុគ្គលិកគ្រប់គ្រាន់ តែងតែជួបប្រទះនូវបញ្ហាបម្រើសេវាអ្នកជំងឺ និងអ្នកឆ្លងទន្លេនេះជាញឹកញាប់ ហើយប្រជាពលរដ្ឋ តែងតែរិះគន់ជារឿយៗផងដែរថា សូម្បីតែពាក្យសម្តី ក៏មានការអសុរោះមកលើអ្នកជំងឺដែរ ហេតុនេះហើយសូមឱ្យប្រធានពេទ្យជួយណែនាំដល់បុគ្គលិកពេទ្យ ដែលបម្រើការងារជូនប្រជាពលរដ្ឋ ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]