រថយន្តឡិចស៊ីស RX330 មួយគ្រឿងបានបោះពួយចូលទៅបុកតូបលក់ដូរនៅជាប់ចិញ្ចើមថ្នល់ មួយកន្លែង កាលពីវេលាម៉ោង ៤ល្ងាច ថ្ងៃទី២១ វិច្ឆិកា ២០១៥ នៅចំណុចមុខវត្តក្រាំងដូង ស្ថិតក្នុងភូមិក្រាំងដូង ឃុំសំរោងក្រោម ស្រុកបន្ទាយមាស ខេត្តកំពត ។
ប្រភពពីនគរបាលចរាចរណ៍ស្រុកបន្ទាយមាសដែលបានចុះដល់កន្លែងកើតហេតុបានឲ្យដឹងថា រថយន្តបង្កម៉ាកឡិចស៊ីស RX 330 ពណ៌ស អត់ស្លាកលេខ មានអ្នកបើកបរឈ្មោះ ត្រាន់ ផាន់ណា ភេទប្រុស អាយុ២៨ឆ្នាំ រស់នៅស្រុកអង្គស្នួល ខេត្តកណ្ដាល ។ មុនពេលកើតហេតុគាត់បានបើករថយន្ត ក្នុងទិសដៅពីជើងទៅត្បូង លុះមកដល់ចំណុចមុខវត្តក្រាំងដូងក៏បាន បើកគេចម៉ូតូហើយក៏ ជ្រុលចង្កូតទៅបុកតូបលក់ដូរនៅខាងឆ្វេងដៃ ដែលមានម្ចាស់ឈ្មោះ ង៉ែត ទិត ភេទប្រុស អាយុ៤៧ឆ្នាំ បណ្ដាលឲ្យម្ចាស់តូបរងរបួសស្រាល ។
ប្រភពពីលោក ង៉ែត ទិត ម្ចាស់តូបបានឲ្យដឹងថា មុនពេលកើតហេតុគាត់កំពុងតែដេកអង្រឹងលេង ស្រាប់តែសន្ធឹក សំឡេងរថយន្តមកបុកតូបប្រាវបណ្ដាលរលំតូប ខូចខាតម៉ូតូ និងសម្ភារលក់ដូរមួយចំនួន រីឯរថយន្តបានជាប់នៅក្នុងតូប ។
ប្រភពពីម្ចាស់រថយន្តបានឲ្យសមត្ថកិច្ចនគរបាលដឹងថា មូលហេតុដែលរថយន្តរបស់គាត់ទៅបុកតូបលក់ដូរនោះ គឺមកពីគេចម៉ូតូ១គ្រឿង ហើយបួងចង្កូត ខ្លាំងជ្រុលទៅបុក តូបលក់ដូរតែម្តង ។
ក្រោយពេលកើតហេតុបន្ទាប់ពីធ្វើការវាស់វែងរួច ម្ចាស់រថយន្តក៏ព្រមសងការខូចខាតចំនួន៦៥០ដុល្លារដើម្បីបញ្ចប់រឿង ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
