រាជធានីភ្នំពេញ ៖ រនាំងដែកចែកទ្រូងផ្លូវដែលសាលារាជធានីភ្នំពេញរៀបចំ ឡើងសម្រាប់កាត់បន្ថយគ្រោះថ្នាក់ចរាចរណ៍ និងសម្រាប់សោភ័ណភាពតាមផ្លូវសាធាណៈនោះ បែរជាត្រូវរងគ្រោះស្ទើរតែរាល់យប់ថ្ងៃ ដោយត្រូវគេបើករថយន្ត ឬម៉ូតូបុកឱ្យបាក់ខូចខាតដែលបណ្តាលមកពីអ្នកបញ្ជាយាន យន្តមិនគោរពច្បាប់ចរាចរណ៍ ពិសេសអ្នកស្រវឹងតែម្តង ។ ជាក់ស្តែងយុវវ័យ១គូស្រវឹងជោក ជិះរថយន្តកូរ៉ូឡា១គ្រឿង បើកបុករះរនាំងដែកពុះចែកទ្រូងផ្លូវបាក់អស់៥ផ្ទាំង កាលពីវេលាម៉ោង៦និង២០នាទីព្រឹកថ្ងៃទី២ សីហា នៅលើកំណាត់មហាវិថីសហព័ន្ធរុស្ស៊ីត្រង់ចំណុចភូមិតាងួន សង្កាត់កាកាប ខណ្ឌពោធិ៍សែនជ័យ ។
តាមការអះអាងពីសមត្ថកិច្ចឱ្យដឹងថា រថយន្តម៉ាកកូរ៉ូឡា ពណ៌ខ្មៅ ១គ្រឿង បើកបរដោយបុរសម្នាក់ឈ្មោះ ធុច វ៉ាន់ថា អាយុ២៥ឆ្នាំ ជាបុគ្គលិកក្លិបឌីស្កូទ្រីម៉ាត មានទីលំនៅផ្ទះលេខ១៩ ផ្លូវលេខ៥៥៤ សង្កាត់ទឹកល្អក់២ ខណ្ឌទួលគោក ។ អ្នកបើកបរស្រវឹងធ្លាក់ភ្នែករួមដំណើរដោយស្រីស្នេហ៍ ម្នាក់ក៏ស្រវឹងធ្លាក់ភ្នែកដេកលក់អត់ដឹងខ្លួនផងដែរ ។
ប្រភពព័ត៌មានពីមន្ត្រីសមត្ថកិច្ចបានឱ្យ ដឹងថា អ្នកបើកបររថយន្តរូបនោះ ធ្វើការពេលយប់នៅក្នុងក្លិបខាងលើ ហើយមិនទាន់បានដេកពួនទេបានបើករថយន្តជូនសង្សារចេញពី កន្លែងធ្វើការត្រឡប់ទៅផ្ទះនៅក្នុងភូមិសាស្រ្តសង្កាត់ ចោមចៅ តែមិនបានទៅផ្ទះភ្លាមទេ បែរជាបន្តទៅលេងផ្ទះមិត្តភក្តិរួចបានជិះរថយន្តត្រឡប់ មកវិញ ។ ពេលកំពុងបើកបរក្នុងទិសដៅពីលិចទៅកើត ក្នុងល្បឿនលឿនគួរសមដោយសារតែអត់បានដេកពេញមួយយប់និង ស្រវឹងផងនោះ លុះដល់ចំណុចកើតហេតុអ្នកបើកបរបានងោកមួយភាំងក៏ជ្រុល ចង្កូតទៅបុករះរនាំងដែកពុះ ចែកទ្រូងផ្លូវពេញទំហឹងបណ្តាលឱ្យបាក់អស់៥ផ្ទាំង ចំណែករថយន្តបានរងការខូចខាតផ្នែកខាងមុខយ៉ាងដំណំ តែសំណាងល្អមិនបណ្តាលឱ្យអ្នកបើកបរ និងស្រីស្នេហ៍រងរបួស ។
ក្រោយពេលកើតហេតុ អ្នកបើកបរត្រូវប៉ូលិសចរាចរខណ្ឌពោធិ៍សែនជ័យ ពិនិត្យជាតិអាកុល បន្ទាប់មកបញ្ជូនទាំងមនុស្សនិងរថយន្តទៅកាន់ការិយាល័យ ចរាចរណ៍ផ្លូវគោករាជធានីភ្នំពេញ ចាត់ការតាមផ្លូវច្បាប់ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
