ខេត្តប៉ៃលិន ៖ សពបុរស-ស្រ្តីពីរនាក់ប្តីប្រពន្ធត្រូវបានគេប្រទះឃើញដេកស្លាប់ក្បែរគ្នា យ៉ាងអាណោចអាធ័ម នៅក្នុងចម្ការពោតមួយកន្លែង ដោយត្រូវជនមិនស្គាល់មុខមានគ្នាយ៉ាងតិច៥នាក់វាយសម្លាប់ ដែលហេតុការណ៍នេះបង្កឱ្យមានការភ្ញាក់ផ្អើល កាលពីវេលាម៉ោង៦និង៣៥នាទីព្រឹកថ្ងៃទី២ សីហា ២០១២ ត្រង់ចំណុចក្បាលឡាន ស្ថិតក្នុងភូមិភ្នំស្ពង់ ឃុំសាលាក្រៅ ស្រុកសាលាក្រៅ។
ជនរងគ្រោះទាំង២នាក់ប្តីប្រពន្ធដែលត្រូវឃាតករវាយ សម្ចាប់ដោយមិនញញើតដៃនេះប្តីឈ្មោះរដ្ឋ មី អាយុ៥១ឆ្នាំ ប្រពន្ធឈ្មោះគង់ ហូរ អាយុ៣៩ឆ្នាំ អ្នកទាំងពីរមានស្រុកកំណើតនៅភូមិបឹង ឃុំរបៀប ស្រុករវៀង ខេត្តព្រះវិហារ ។ បច្ចុប្បន្នមកសុំរោងចាំចម្ការរបស់គេស្នាក់នៅធ្វើការ ក្នុងភូមិកើតហេតុខាងលើ។ ប្រភពព័ត៌មានឱ្យដឹងថា ជនរងគ្រោះទាំងពីរនាក់ប្តីប្រពន្ធត្រូវជនដៃដល់មិនស្គាល់ អត្តសញ្ញាណមានគ្នាយ៉ាងតិច៥នាក់វាយកាប់សម្លាប់នឹងកាំបិតខ្វែវដង វែងមួយនឹងដំបងប្រវែងជាងកន្លះម៉ែត្រចំនួន៥ដើម បណ្តាលឲ្យរបួសសុសពេញខ្លួនដេកស្លាប់ក្នុងថ្លុកឈាម ខណៈកំពុងដេកនៅក្នុងខ្ទមចាំចម្ការនៅពេលយប់ ។
លោកឆម វ៉ាន់ធី នាយការិយាល័យព្រហ្មទណ្ឌកម្រិតធ្ងន់បានឲ្យដឹងថា តាមការសន្និដ្ឋានជនដៃដល់មានគ្នាយ៉ាងតិចពី៤ទៅ៥នាក់បានធ្វើសកម្ម ភាពកាប់ប្រហារទៅលើជនរងគ្រោះ ព្រោះនៅកន្លែងកើតហេតុឃើញអាវុធជនល្មើសមានកាំបិតខ្វែវដងវែងមួយ ដើម និងដំបងឈើប្រវែងជាងកន្លះម៉ែត្រចំនួន៥កំណាត់ទៀត នៅរាយក្បែរសពជនរងគ្រោះទាំង២នាក់។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
