ក្រុមហ៊ុន គូបូតា (ខេមបូឌា) សហការជាមួយ វិទ្យាស្ថានបច្ចេកវិទ្យា បាត់ដំបង ផ្តល់ការបណ្តុះបណ្តាល បច្ចេកទេសវិជ្ជាជីវៈ ដើម្បីរួមចំណែក អភិវឌ្ឍការអប់រំ បច្ចេកទេសវិជ្ជាជីវៈ ដល់សិក្ខាកាម ក្នុងប្រទេសកម្ពុជា
ភ្នំពេញ៖ គូបូតា (ខេមបូឌា) បានសហការជាមួយ វិទ្យាស្ថានបច្ចេកវិទ្យាបាត់ដំបង ដើម្បីអភិវឌ្ឍ និងបង្កើតកម្មវិធីពិសេសមួយ សម្រាប់យន្តការី ដែលមានឈ្មោះថា “កម្មវិធីបណ្តុះបណ្តាល បច្ចេកទេសវិជ្ជាជីវៈ ក្នុងភាពជាដៃគូ ក្នុងតំបន់ គូបូតា” ដើម្បីបង្កើនឱកាស ដល់សិក្ខាកាម ក្នុងការទទួលបានចំណេះ និងជំនាញសម្រាប់ការជួសជុល ថែទាំ ក៏ដូចជាសេវាកម្ម ក្រោយពេលលក់ សម្រាប់គ្រឿងយន្តកសិកម្ម។
លោក សមសាក់ ម៉ៅថន ប្រធានផ្នែកគ្រប់គ្រង គម្រោងរបស់ក្រុមហ៊ុន ស្យាម គូបូតា បានឱ្យដឹងថា គូបូតា (ខេមបូឌា) ដែលជាក្រុមហ៊ុនបុត្រសម្ព័ន្ធមួយ របស់ ស្យាម គូបូតា កាលពីពេលថ្មីៗនេះ ទើបបានចុះហត្ថលេខា លើកិច្ចព្រមព្រៀងមួយ ជាមួយវិទ្យាស្ថានបច្ចេកវិទ្យាបាត់ដំបង ដើម្បីបង្កើត “កម្មវិធីបណ្តុះបណ្តាល បច្ចេកទេសវិជ្ជាជីវៈក្នុងភាពជាដៃគូ ក្នុងតំបន់ គូបូតា” ដែលបង្កើតប្រព័ន្ធទ្វេភាគី ពាក់ព័ន្ធនឹងសកម្មភាព នៃការអភិវឌ្ឍ និងបង្កើតធនធានប្រជាជនល្អៗ និងប្រកបដោយជំនាញ ដើម្បីបម្រើដល់វិស័យកសិកម្ម។ សិក្ខាកាមបច្ចេកទេសវិជ្ជាជីវៈ ដែលមានឯកទេស ក្នុងវិស័យនេះ ដូចជា ផ្នែកយានយន្ត និងផ្នែកទូទៅជាដើម នៅវិទ្យាស្ថាន នឹងត្រូវផ្តល់ឱកាសឱ្យចូលហ្វឹកហាត់ការងារ នៅក្រុមហ៊ុនពាក់ព័ន្ធណាមួយ ដើម្បីទទួលបានបទពិសោធន៍ ក៏ដូចជាដើម្បីអភិវឌ្ឍជំនាញរបស់ខ្លួន នៅក្នុងការជួសជុល និងថែទាំគ្រឿងយន្តកសិកម្ម រួមជាមួយសេវាកម្ម ក្រោយពេលលក់។ ក្រៅពីការសិក្សាដោយផ្ទាល់ ពីអ្នកជំនាញក្នុងបរិស្ថានការងារជាក់ស្តែង សិក្ខាកាមនឹងអាច យកបទពិសោធន៍នេះ មកប្រើប្រាស់ នៅថ្ងៃអនាគត។ ស្របទៅតាមកម្មវិធីបណ្តុះបណ្តាល សិក្ខាកាមដែលត្រូវបានវាយតម្លៃ ថាមានសក្តានុពលសម្រាប់ក្រុមហ៊ុន នឹងមានឱកាសក្លាយជា បុគ្គលិកពេញសិទ្ធិតែម្តង។
លោក អ៊ុក ដាវណ្ឌី នាយកវិទ្យាស្ថានបច្ចេកវិទ្យាបាត់ដំបង បានឱ្យដឹងថា កម្មវិធីសម្រាប់យន្តការីកសិកម្មនេះ ត្រូវបានរួមគ្នាបង្កើតឡើង ជាលើកដំបូងដោយ ក្រុមហ៊ុន ស្យាម គូបូតា និងក្រសួងការងារ និងបណ្តុះបណ្តាលវិជ្ជាជីវៈនៃប្រទេសកម្ពុជា ដើម្បីគាំទ្រដល់ ការលូតលាស់ ក្នុងវិស័យកសិកម្មក្នុងប្រទេស។ “យើងរីករាយដែលក្រុមហ៊ុន គូបូតា (ខេមបូឌា) យល់ពីសារសំខាន់ នៃប្រព័ន្ធទ្វេភាគី របស់កម្មវិធីនេះ ដែលអនុញាតឱ្យ សិក្ខាកាមមានឱកាសទទួលការបណ្តុះបណ្តាល ក្នុងបរិស្ថានការងារជាក់ស្តែង ដែលពួកគេនឹងអាច ប្រើប្រាស់ដោយផ្ទាល់ នូវជំនាញក្នុងការជួសជុល និងថែទាំគ្រឿងយន្តកសិកម្ម ព្រមទាំងជំនាញ ក្នុងការបម្រើសេវាកម្ម ក្រោយពេលលក់ផងដែរ។ បទពិសោធន៍ជាក់ស្តែង ដែលទទួលបាន ក្នុងរយៈពេលហ្វឹកហាត់ការងារនេះ អាចនឹងគ្រប់គ្រាន់ សម្រាប់ពួកគេប្រើប្រាស់ ក្នុងអាជីពរបស់គេ នាពេលអនាគត។”
សិក្ខាកាមដែលបានឆ្លងកាត់ វគ្គបណ្តុះបណ្តាល នឹងទទួលបានវិញ្ញាបនប័ត្រ ចំណេះដឹង ជំនាញ និងបទពិសោធន៍ពីការអនុវត្តន៍ជាក់ស្តែង ជាមួយគម្រោងដែលរៀបចំឡើងដោយ គូបូតា (ខេមបូឌា)។ វគ្គដំបូងនឹងចាប់ផ្តើម នៅឆ្នាំក្រោយ ចាប់ពីថ្ងៃទី ១ មេសា រហូតដល់ ១៥ កក្កដា ២០១៦។
លើសពីនេះទៅទៀត ថ្ងៃនេះក្រុមហ៊ុន គូបូតា (ខេមបូឌា) បានឧបត្ថម្ភ ម៉ាស៊ីនស្ទូងស្រូវ និងម៉ាស៊ីនច្រូតស្រូវ គូបូតា សម្រាប់ការអនុវត្តន៍ផ្ទាល់ របស់សិក្ខាកាម នៃវិទ្យាស្ថានបច្ចេកវិទ្យាបាត់ដំបង ផ្នែកយន្តការីកសិកម្ម បន្ថែមលើត្រាក់ទ័រមួយគ្រឿងផ្សេងទៀត ដែលក្រុមហ៊ុនបានឧបត្ថម្ភ កាលពី ខែ មករា ឆ្នាំ ២០១៥។
ក្រុមហ៊ុន ស្យាម គូបូតា បានសហការជាមួយ ក្រសួងការងារ និងបណ្តុះបណ្តាលវិជ្ជាជីវៈ ជាលើកដំបូង កាលពីឆ្នាំ ២០១៤ ដោយជ្រើសរើស វិទ្យាស្ថានបច្ចេកវិទ្យាបាត់ដំបង ជាវិទ្យាស្ថានត្រួសត្រាយផ្លូវ ដែលបានចូលរួមអភិវឌ្ឍកម្មវិធីសម្រាប់យន្តការីកសិកម្ម ហើយជាលទ្ធផល គឺបានបើក មជ្ឈមណ្ឌលអប់រំ បច្ចេកទេស គូបូតា ដើម្បីជួយកសាងគុណភាពយន្តការីកសិកម្ម និងដើម្បីបង្កើនកម្រិត នៃការបណ្តុះបណ្តាលវិជ្ជាជីវៈ ឆ្ពោះទៅកាន់ស្តង់ដាអន្តរជាតិ៕
បញ្ចូលអត្ថបទដោយ ៖ ប៊ី
ខ្មែរឡូត
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]