រាជធានីភ្នំពេញ ៖ កញ្ញាឈិន សុធារី និងតារាសម្តែងលោកសុវណ្ណ មករា បានលាតត្រដាងការណ៍ពិតហើយ បន្ទាប់ពីបិទបាំងចំណងស្នេហ៍ជាយូរមក ។
ក្រោយលេចឮរឿងរ៉ាវស្នេហាក្រៅឆាកអស់រយៈពេលជាច្រើនឆ្នាំ ពេលនេះអតីតារាសម្តែងលោកសុវណ្ណ មករា និងអតីតពិធីការិនីកញ្ញាឈិន សុធារី សម្រេចចិត្តប្រើប្រាស់ជីវិតរួមគ្នាដោយចូលរោងការនៅថ្ងៃនេះទី២១ តុលា ២០១៥ ។ ទោះជាយ៉ាងណាក្តី មង្គលការនេះនឹងមានវត្តមានភ្ញៀវ ពិសេសអ្នកសិល្បៈចូលរួមមិនច្រើនប៉ុន្មានទេ ។
អតីតពិធីការិនីកម្មវិធី «តារាមាសតន្ត្រី» របស់ស្ថានីយទូរទស្សន៍ប៉ុស្តិ៍លេខ៥ កញ្ញាឈិន សុធារី ហាក់មិនទាន់រកទ្រនំការងារបានជ្រកទេ ក្រោយបាត់បង់តំណែងជាច្រើនឆ្នាំ ។ ក្រោយផ្តាច់ពាក្យពីគូដណ្តឹងអ្នកជំនួញវ័យក្មេងមក កញ្ញាឈិន សុធារី ត្រូវបានលួងលោមប្រលោមស្នេហ៍ដោយបុរសពោះម៉ាយសុវណ្ណ មករា ធ្វើឱ្យបេះដូងនាងកក់ក្តៅជាថ្មី ។ ទោះបីជាកន្លងមកចំណងស្នេហ៍អ្នកទាំងពីរត្រូវគេទម្លាយថាលេចចេញភាពរកាំរកូសច្រើនក្តី ប៉ុន្តែអាពាហ៍ពិពាហ៍តាមទំនៀមទម្លាប់របស់ពួកគេនឹងកើតឡើងនៅថ្ងៃនេះ ។
ពិធីមង្គលការដែលនឹងរៀបចំនៅប៉ុន្មានថ្ងៃខាងមុខនេះមិនអាចទទួលបានការបញ្ជាក់ពីកញ្ញាឈិន សុធារីទេ ប៉ុន្តែដំណឹងនេះត្រូវអនាគតស្វាមីនាងទទួលស្គាល់ថា ជាការណ៍ពិត ។ សុវណ្ណ មករា លើកឡើងដោយខ្លីថា មិនមានវត្តមានភ្ញៀវច្រើនចូលរួមទេ ពោលគឺភាគីទាំងសងខាងមានត្រឹមតែ៣០០នាក់ប៉ុណ្ណោះ ។ ពិធីមង្គលការនេះធ្វើឡើងនៅគេហដ្ឋានខាងស្រី ហើយល្ងាចថ្ងៃទី២១ខែតុលារៀបចំពិធីជប់លៀងទទួលភ្ញៀវ នៅសណ្ឋាគារកាំបូឌីយ៉ាណា ។ វត្តមានភ្ញៀវចូលរួមនាឱកាសនោះ គឺមានតែអ្នកជិតដិតខ្លាំងបំផុត ហើយហេតុដែលមិនអញ្ជើញអ្នកសិល្បៈចូលរួមច្រើន ព្រោះខ្លាចរំខាន ។
អ្នកសិល្បៈមួយចំនួនបានលើកឡើងថា មង្គលការនេះនឹងមិនមានវត្តមានអ្នកសិល្បៈចូលរួមច្រើនដូចមង្គលការសិល្បករដទៃទេ ព្រោះតែអ្នកទាំងពីរហាក់មិនភ្ជាប់ការទាក់ទងច្រើនជាមួយអ្នកសិល្បៈ ខណៈដែលដែលពួកគេផ្អាកការងារសិល្បៈ រៀងៗខ្លួនយូរមកហើយ ។ លោកសុវណ្ណ មករា មិនភ្ជាប់ខ្លួនជាមួយអាជីពសិល្បៈដូចមុនទេ ព្រោះតែបច្ចុប្បន្នលោកអាចមានតំណែងណាមួយក្នុងក្រុមហ៊ុនរបស់អ្នកឧកញ៉ាគិត ម៉េង ហើយក៏ជាមនុស្សជំនិតរបស់ភរិយាអ្នកឧកញ៉ាផងដែរ ។
មានការលើកឡើងថា ក្រោយរៀបការរួចលោកសុវណ្ណ មករា និងកញ្ញាឈិន សុធារី អាចនឹងឈោងចាប់យកជំនួញណាមួយសម្រាប់កសាងក្រុមគ្រួសារ ។
សម្រាប់ពិធីជប់លៀងមង្គលការរបស់អតីតអ្នកសិល្បៈទាំង២នាក់ដែលធ្វើឡើងនៅសណ្ឋាគារលំដាប់ផ្កាយប្រាំនេះទំនងជាមានការជ្រោមជ្រែងជួយពីលោកឧកញ៉ា និងភរិយាដែលជាចៅហ្វាយ ។
កញ្ញាឈិន សុធារី ជាមនុស្សម្នាក់ស្ថិតក្នុងត្រកូល«ឈិន» ដែលពុះពារក្នុងអាជីពសិល្បៈ ពិសេសបន្ទាប់ពីបងស្រីរបស់នាងឈិន សុរ៉ាវី បានទទួលមរណភាពទៅ ចំណែកបងប្រុសនាងលោកឈិន កុសល ស្ងប់ស្ងាត់ពីអាជីពសិល្បៈទៅហើយ ។ សុធារីបានបែកបាក់ពីគូដណ្តឹងដែលស្រឡាញ់គ្នាជាង១០ឆ្នាំ ព្រមទាំងរឹតតែស្រងូតស្រងាត់ថែមទៀត ព្រោះតែតំណែងពិធីការិនីនៅស្ថានីយទូរទស្សន៍ប៉ុស្តិ៍លេខ៥ របូតព្រមគ្នា ។ គាប់ជួនពេលនោះលោកសុវណ្ណ មករា លែងលះប្រពន្ធនៅអាមេរិក ក៏ដើរតួនាទីយ៉ាងសំខាន់ក្នុងការលួងលោម ព្យាបាលបេះដូងសុធារី ឱ្យមានកម្តៅសាជាថ្មី ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
