ខេត្តកំពង់ឆ្នាំង ៖ បន្ទាប់ពីចប់ការសម្របសម្រួលទំនាស់ដីធ្លីដ៏រ៉ាំរៃរវាងម្តាយមីង និងក្មួយបង្កើត ដែលមានរយៈពេលជាង១០ឆ្នាំកន្លងទៅនោះ នៅព្រឹកថ្ងៃទី៥ តុលា ២០១៥ ទាំងម្តាយមីង ឪពុកមាជាដើមបណ្តឹង និងជាអ្នកឈ្នះក្តី រួមទាំងក្មួយប្រុសដែលជាចុងចម្លើយ និងជាអ្នកចាញ់ក្តី បានញញឹមញញែមចុះពីសាលាស្រុកបរិបូណ៌វិញ និងបានពោលថា «ចប់ហើយ ពួកយើងត្រូវគ្នាវិញហើយ» ។
លោក កង ហុង មានទីលំនៅភូមិអូរ ឃុំពពេល ស្រុកបរិបូណ៌ ជាគ្រូបង្រៀនសាលាបឋមសិក្សាឃុំឆ្នុងទ្រូ ស្រុកបរិបូណ៌ បានញញឹមដោយក្តីសប្បាយរីករាយថា «រឿងខ្ញុំចប់ហើយ អរគុណណាស់ អាជ្ញាធរមូលដ្ឋាន និងអ្នកសារព័ត៌មាន ពិសេសសារព័ត៌មាន«កោះសន្តិភាព» ដែលបានជ្រោមជ្រែងឱ្យមានកិច្ចសម្របសម្រួលរវាងភាគីទាំង២ ។ លោកបន្តថា ក្រោយពីការប្រកាសសាលក្រមរបស់តុលាការកំពូលកាលពីថ្ងៃទី២ តុលា ២០១៥ ដែលសម្រចរឹបអូសដីទំហំ៧អា ៤៣សង្ទីអា ដែលរូបលោកកំពុងរស់នៅសព្វថ្ងៃទៅឲ្យម្តាយមីង ឈ្មោះ តាន់ សុខុម និងប្តីឈ្មោះ ស៊ា ឆយ រួចមក លោកបានជំទាស់មិនព្រមជាដាច់ខាត ព្រោះលោកបានមករស់នៅលើដីនេះតាំងពីឆ្នាំ១៩៧៩ ។
ពេលនោះដែរ មានអាជ្ញាធរស្រុក និងអ្នកសារព័ត៌មាន ពិសេសភ្នាក់ងារសារព័ត៌មាន«កោះសន្តិភាព»បានទៅបញ្ចុះបញ្ចូលសម្របសម្រួល ពីម្តាយមីង និងឪពុកមា ដោយលើកហេតុផលផ្សេងៗ ធ្វើឱ្យពួកគាត់បន្ទាន់ឥរិយាបថសុខចិត្តចែករំលែកដីមួយចំណែកក្នុង ទំហំដីទាំងអស់ឲ្យគ្រួសារគាត់បានរស់នៅបន្តទៀត ព្រោះសុទ្ធតែម្តាយមីង និងក្មួយ គ្រាន់តែមានលក្ខខណ្ឌបន្តិចបន្តួច គឺឱ្យគាត់ជាកូនក្មួយទៅអង្វរម្តាយមីងសុំដីរស់នៅផង ។
ក្រោយមកនៅថ្ងៃទី៣ តុលា រូបគាត់បានទៅដល់ផ្ទះម្តាយមីង គ្រាន់តែឃើញរូបគាត់ទៅដល់ភ្លាមទាំងម្តាយមីង ទាំងគាត់បានឱបគ្នាយំ ព្រោះតែជាង១០ឆ្នាំកន្លងទៅនេះដោយសារតែរឿងដីធ្លី ពួកគាត់ទាំង២បានក្លាយជាសត្រូវ មិនដែលរាប់រកគ្នាម្តងណាឡើយ ។ ពេលនោះ ម្តាយមីងគ្រាន់តែស្តីបន្ទោសថា អញឈឺ ម៉េចអ្ហែងមិនមកមើលអញផង គាត់គ្រាន់តែឆ្លើយថា អ្នកណាហ៊ានមក បើមីងកំពុងខឹងខ្ញុំហើយ ខ្ញុំគិតថាមីងបោះបង់ខ្ញុំចោលហើយ ។ ម្តាយមីងបាននិយាយថា អញឱ្យដីនៅខ្លះ ហើយនៅថ្ងៃចន្ទដើមសប្តាហ៍នេះ យើងទៅជួបគ្នានៅសាលាស្រុក ដើម្បីធ្វើកំណត់ហេតុតាមផ្លូវច្បាប់ ។
លោក ឃួន សៅរុំ អភិបាលស្រុកបរិបូណ៌ បាននិយាយថា ម្តាយមីងនិងក្មួយត្រូវគ្នាវិញហើយ ដោយម្តាយមីង យល់ព្រមចែកក្បាលដី ប្រវែងទទឹង៥ម៉ែត្រ បណ្តោយទៅក្រោយ តាមទំហំដី ឱ្យក្មួយឈ្មោះ កង ហុង រស់នៅបន្តទៀត ។ ក្នុងនាមលោកជាអាជ្ញាធរ លោកសប្បាយចិត្តណាស់បានឃើញពួកគាត់ត្រូវគា្នវិញ មិនខុសពីក្រោយពេលភ្លៀង មេឃស្រឡះឡើយ ។ ចំណែក ម្តាយមីង តាន់ សុខអេង ក្រោយពីបានប្រគល់ដីឱ្យក្មួយរស់នៅហើយ បានផ្តាំថា សុំជួយថែរក្សាដីដែលជាចំណែកនៅសល់ផង ព្រោះទុកឱ្យប្អូនៗឯង គេមកសង់ផ្ទះរស់នៅជិតគ្នា និងជួយមើលគ្នាផង ព្រោះឯងជាមនុស្សចាស់ត្រូវមើលថែជំនួសមីងផង មីងកាន់តែចាស់ណាស់ទៅហើយ ។
សូមរំឭកថា ទំនាស់ដីធ្លីដ៏រ៉ាំរ៉ៃរវាងម្តាយមីង និងក្មួយបង្កើតនេះ បានអូសបន្លាយជាង១០ឆ្នាំ ប្តឹងគ្នាតាំងពីសាលាដំបូង ដល់កំពូល ទីបំផុត អ្នកឈ្នះនៅតែកាត់ទឹកមិនដាច់ កាត់សាច់មិនបាន ហើយទំនាស់ក្តីក្តាំគ្នារវាងម្តាយមីងនិងក្មួយនេះ អាចជាគំរូដល់មនុស្សទូទៅ បើអាចចៀសបាន គួរចៀសឱ្យឆ្ងាយ ព្រោះថា ទម្រាំដឹងចាញ់ឈ្នះប៉ុណ្ណេះ ម្នាក់ៗអស់ទ្រព្យសម្បត្តិមិនតិចទេ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]