រាជធានីភ្នំពេញ ៖ បុរសម្នាក់ត្រូវបានប្រជាពលរដ្ឋ ជាង៥០នាក់ឡោមព័ទ្ ធវាយទ្រមខ្លួន ព្រោះស្មានថាជាចោរ ចូលមកលួចយកទ្រព្យសម្បត្តិ បង្កឲ្យមានការភ្ញាក់ផ្អើល ពេញមួយភូមិផ្លូវរទះភ្លើងទាំងយប់ កាលពីវេលាម៉ោង១០ និង៣០នាទីយប់ ថ្ងៃទី០៥ តុលា២០១០ ស្ថិតក្នុងម្តុំបន្ទប់ជួលភូមិរទះភ្លើង សង្កាត់បឹងកក់២ ខណ្ឌទួលគោក ។
បុរសដែលត្រូវគេច្រឡំថា ជាចោរនោះមាន ឈ្មោះ អ៊ុំយុន ហៅម៉ៅ ភេទប្រុស អាយុ២៧ឆ្នាំ ស្នាក់នៅជិតម្តុំរទះភ្លើងក្បែរកន្លែងកើតហេតុខាងលើផងដែរ ។
យោង តាមប្រភពព័ត៌មានពីប្រជាពលរដ្ឋនៅកន្លែងកើតហេតុបាននិយាយថា មុនពេលកើតហេតុ ពួកគាត់បានឃើញបុរសម្នាក់ខាងលើនេះមកអើតឡើមមិនដឹងរកអ្វីតាំងពី ថ្ងៃមកម្ល៉េះ លុះនៅម៉ោងកើតហេតុបុរសម្នាក់នេះមកកន្លែងដដែលម្តងទៀត ហើយដើរសំដៅមកបន្ទប់ជួលដោយមិនដឹងមានបំណងអ្វី បន្ទាប់មកបុរសនោះក៏ស្ទុះទៅទាញបន្ទប់គេស្នាក់នៅធ្វើឱ្យអ្នកនៅ ក្នុងបន្ទប់ស្រែកឆោឡោបង្កឲ្យមានការភ្ញាក់ផ្អើលដល់ប្រជាពលរដ្ឋក្បែរ ខាងជិតមួយភូមិចេញមកដេញវាយបុរសដែលគេមិនស្គាល់នោះធ្វើឱ្យរូបគេ ភ័យពេកក៏រត់ទៅលោតចូលបឹងកំប្លោកសម្ងំក្នុងទឹកជាង១ម៉ោង ទាល់តែសមត្ថកិច្ចមកដល់ទើបបុរសនោះងើបឡើងមកវិញ ។
ក្រោយពី ការសួរនាំរបស់សមត្ថកិច្ច បុរសដែលត្រូវគេសង្ស័យថា ជាចោរនោះបានឆ្លើយប្រាប់ទាំងឈាមហូរស្រោចមុខថា រូបគាត់មិនមែនជាចោរលួចប្លន់អ្នកណាឡើយ គឺគាត់មករកប្រពន្ធ និងកូនដែលមិនទៅផ្ទះជាង៦ថ្ងៃហើយ ដោយគាត់ឭគេប្រាប់ថា ឃើញប្រពន្ធ និងកូនរបស់គាត់ស្នាក់នៅម្តុំបន្ទប់ជួលនោះ គាត់ដើរមករកទៅ ស្រាប់តែគាត់បានឃើញប្រពន្ធរបស់គាត់ស្នាក់នៅបន្ទប់ជួលម្តុំនោះ ពិតមែន តែមិនដឹងយ៉ាងម៉េចស្រាប់តែប្រជាពលរដ្ឋក្បែរនោះស្រែកថា គាត់ជាចោរក៏ដេញវាយ និងធាក់គាត់ដោយមិនបានសួរនាំអ្វីទាំងអស់ ព្រោះតែភ័យពេកគាត់ក៏រត់គេចខ្លួនទៅហក់ចូលទៅបឹងកប្លោកសម្ងំ ក្នុងទឹកនោះតែម្តងទៅដើម្បីការពារសុវត្ថិភាពរបស់ខ្លួន។
ទោះ យ៉ាងសមត្ថកិច្ចនៅតែយកបុរសដែលត្រូវគេសង្ស័យជាចោរលួចនោះទៅ សួរនាំនៅប៉ុស្តិ៍នគរបាលបឹងកក់សិន ដើម្បីឱ្យដឹងរឿងកាន់តែច្បាស់ ហើយបើសិនជាបុរសដែលគេសង្ស័យនោះមិនមានជាប់ពាក់ពន្ធ័នឹងរឿងមែន សមត្ថកិច្ចនឹងដោះលែងគាត់វិញ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]