ខេត្តបាត់ដំបង ៖ ស្ត្រីម្នាក់ដែលស្រវឹងស្រាជោក ហើយបើករថយន្តស៊េរីទំនើបម៉ាកអូឌី ទៅបុកស្ត្រីជិះកង់ម្នាក់បណ្តាលឱ្យរងរបួស កាលពីវេលាម៉ោង០៥ និង២៩នាទីល្ងាចថ្ងៃទី១៩ កញ្ញា កន្លងមក ស្ថិតនៅចំណុចត្រាវជូ ភូមិអូរចំណិប ឃុំតាស្តា ស្រុកសំពៅលូន ត្រូវបានស្គាល់អត្តសញ្ញាណហើយ ដោយសមត្ថកិច្ចកំពុងស្រាវជ្រាវឃាត់ខ្លួនផងដែរ ។
ប្រភពបានឱ្យដឹងថា ស្ត្រីខាងលើឈ្មោះសូ ដាម៉ុន ហៅមុំ អាយុ៤១ឆ្នាំ ជាអ្នកខេត្តកំពង់ចាម តែមកបើកសម្អាងការនៅភូមិត្រពាំងព្រលិត ឃុំសន្តិភាព ស្រុកសំពៅលូន រយៈពេល៥-៦ខែ ជិះរថយន្តម៉ាកអូឌី ពណ៌.ស ពាក់ស្លាកលេខភ្នំពេញ 2AG-7576 ។ ចំណែកឯស្ត្រីរងគ្រោះឈ្មោះសុខ ឃាត អាយុ៤៣ឆ្នាំ មានទីលំនៅក្នុងភូមិកើតហេតុខាងលើ ។
ប្រភពបន្តថា នៅមុនពេលកើតហេតុ គេឃើញស្ត្រីខាងលើបើករថយន្តពីទិសខាងលិច ទៅខាងកើតក្នុងស្ថានភាពស្រវឹងស្រាជោកដោយបើករេពេញផ្លូវ ។ ពេលនោះស្រាប់តែគាត់បានជ្រុលទៅបុកស្ត្រីម្នាក់កំពុងជិះកង់ស្របទិសគ្នាបណ្តាលឱ្យរងរបួស តែគាត់មិនបានឈប់រថយន្តមើលនោះទេ ក៏បន្ថែមល្បឿនព្យាយាមបើកគេចខ្លួន តែត្រូវសមត្ថកិច្ចធ្វើការកាក់រថយន្តនោះបានភ្លាមៗ ។ ខណៈនោះ គេឃើញស្ត្រីខាងលើចុះពីលើរថយន្តទាំងទ្រេតទ្រោត និងប្រើពាក្យសម្តីជេរប្រមាថដោយប្រទាញប្រទង់ជាមួយសមត្ថកិច្ចយ៉ាងចាស់ដៃ ។
បច្ចុប្បន្ន ស្ត្រីខាងលើត្រូវសមត្ថកិច្ចទាក់ទងតាមទូរស័ព្ទដៃឱ្យចូលខ្លួនមកបំភ្លឺ តែត្រូវស្ត្រីនោះនិយាយថា ថ្ងៃនេះឡើងទៅថៃ ដើម្បីព្យាបាលជំងឺ មិនបានមកទេ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
