ខេត្តកណ្តាល ៖ មន្ត្រីកងរាជអាវុធហត្ថក្រុងតាខ្មៅម្នាក់ បានត្រូវប៉ូលិសឃាត់ខ្លួន កាលពីព្រឹកថ្ងៃទី៣១ កក្កដា បន្ទាប់ពីទទួលពាក្យបណ្តឹងពីនារីបម្រើការងារនៅហាងខារ៉ាអូខេយីហោហុងកុង ក្រុងតាខ្មៅ ប្តឹងចោទប្រកាន់ថា មន្ត្រីប៉េអឹមរូបនេះ និងមិត្តភក្តិម្នាក់ទៀតបានចាប់បង្ខំនាងរំលោភសេពសន្ថវៈម្តងម្នាក់ កាលពីវេលារំលងអធ្រាត្រឈានចូលថ្ងៃទី៣១ កក្កដា នៅក្នុងបន្ទប់ផ្ទះជួលរបស់នាងនៅសង្កាត់តាខ្មៅ ក្រុងតាខ្មៅ ។
ប្រភពពីមន្ត្រីប៉ូលិសឱ្យដឹងថា ជនដែលត្រូវចាប់ខ្លួនឈ្មោះ អឿន សំអុល ភេទប្រុស អាយុ២៨ឆ្នាំ ជាមន្ត្រីកងរាជអាវុធហត្ថក្រុងតាខ្មៅ ស្នាក់នៅផ្ទះជួលជាប់ជាមួយនារីរងគ្រោះដែរ ។ ចំណែកបុរសម្នាក់ទៀតដែលបានរត់គេចខ្លួនមិនទាន់ស្គាល់អត្តសញ្ញាណច្បាស់លាស់ តែគេស្គាល់ថា ឈ្មោះម៉ៅ អាយុប្រហែល២៨ឆ្នាំ ជាកម្មករ និងស្នាក់នៅផ្ទះជួលជាមួយឈ្មោះ អឿន សំអុល។
តាមពាក្យបណ្តឹងរបស់នារីរងគ្រោះឱ្យដឹងថា បន្ទាប់ពីត្រឡប់មកពីបម្រើការងារវិញ មកដល់ផ្ទះនាវេលារំលងអធ្រាត្រឈានចូលថ្ងៃទី៣១ កក្កដា នាងបានជ្រុុះបាត់កូនសោបន្ទប់ផ្ទះ ពេលនោះក៏បានស្រែកហៅឈ្មោះ អឿន សំអុល និងឈ្មោះ ម៉ៅ ដែលស្នាក់នៅបន្ទប់ជាប់គ្នាឱ្យមកជួយគាស់ទ្វារផ្ទះដើម្បីចូល ។ ក្រោយពីគាស់ទ្វារផ្ទះរួចហើយ នាងបានចូលក្នុងបន្ទប់ តែមិនទាន់បានដាក់គន្លឹះទ្វារផង ស្រាប់តែឈ្មោះម៉ៅ ចូលមកតាមក្រោយ ហើយធ្វើសកម្មភាពចាប់នាងរំលោភទាំងកំរោល ។ ពេលនោះគ្មានកម្លាំងរើបម្រះទេព្រោះនាងស្រវឹង និងបានស្រែកហៅឱ្យគេជួយដែរតែគ្មានអ្នកជិតខាងណាឮមកជួយឡើយ ទើបឈ្មោះម៉ៅ រំលោភនាងបានសម្រេច រួចចេញពីបន្ទប់នាងបាត់ទៅ ។ លុះបន្តិចក្រោយមកស្រាប់តែឈ្មោះ អឿន សំអុល ចូលមកក្នុងបន្ទប់របស់នាងម្តង ហើយធ្វើសកម្មភាពចាប់បង្ខំនាងរំលោភរហូតបានសម្រេច ទើបចេញទៅបាត់ ។ មួយសន្ទុះក្រោយមកឈ្មោះ អឿន សំអុល ក៏ចូលមកចាប់នាងរំលោភម្តងទៀតរួចហើយក៏ចេញទៅបាត់ដែរ ។
នារីរងគ្រោះបានឱ្យដឹងថា ភ្លាមៗនោះនាងមិនហ៊ានមកប្តឹងសមត្ថកិច្ចទេព្រោះជាពេលយប់ ម្យ៉ាងទៀតឈ្មោះ ម៉ៅ បានវាយនាង២ទៅ៣ដៃ និងគំរាមមិនឱ្យស្រែកព្រមទាំងយកទូរស័ព្ទដៃរបស់នាងមួយគ្រឿងទៀតផង លុះព្រឹកឡើងទើបនាងសម្រេចចិត្តមកប្តឹងប៉ូលិសឱ្យជួយរកយុត្តិធម៌ឱ្យ។ នារីរងគ្រោះបញ្ជាក់ថា កន្លងមកឈ្មោះ ម៉ៅ នេះធ្លាប់និយាយឌឺដងជាមួយនាងញឹកញាប់ក្នុងន័យសុំនាងរួមរ័ក ប៉ុន្តែនាងមិនយល់ព្រម ។
ចំពោះការចោទប្រកាន់នេះបុរសឈ្មោះអឿន សំអុល ដែលត្រូវឃាត់ខ្លួនបានឆ្លើយបដិសេធថា ពុំបានប្រព្រឹត្តដូចការចោទប្រកាន់នោះទេ ប៉ុន្តែចំពោះឈ្មោះ ម៉ៅដែលស្នាក់នៅបន្ទប់ជាមួយខ្លួននោះប្រព្រឹត្តយ៉ាងណាខ្លួនមិនដឹងទេ គឺក្រោយពីខ្លួនជួយគាស់ទ្វាផ្ទះនាងរួចហើយ ខ្លួនបានចូលក្នុងបន្ទប់សម្រាកមិនចេញទៅណាឡើយ ។ ឯឈ្មោះ ម៉ៅ ក្រោយពីជួយគាស់ទ្វារផ្ទះនាងមួយសន្ទុះក្រោយមកទើបចូលមកដេកដែរ ។
បើទោះជាបែបណាក្តីប៉ូលិសសន្និដ្ឋានថា ឈ្មោះ ម៉ៅ ពិតជាបានប្រព្រឹត្តដូចការចោទប្រកាន់របស់នារីរងគ្រោះមែនព្រោះក្រោយពីប្រព្រឹត្តហើយបានព្យាយាមរត់គេចខ្លួន ។ រីឯឈ្មោះ អឿន សំអុលត្រូវបានកសាងសំណុំរឿងចាត់ការតាមផ្លូវច្បាប់ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]