ខេត្តស្វាយរៀង ៖ អ្នកលេង២ក្រុមដេញវាយកាប់ចាក់គ្នាតាមផ្លូវដូចក្នុងកុនចិន ចុងក្រោយ២នាក់របួសធ្ងន់ចូលមន្ទីរពេទ្យ និង២នាក់ទៀតត្រូវចាប់ខ្លួន ដោយពួកគេប្រើដាវសាំមូរ៉ៃ និងកាំបិតដេញកាប់ប្រហារគ្នាយ៉ាងសាហាវ នៅត្រង់ចំណុចផ្លូវលំមួយកន្លែង ស្ថិតក្នុងភូមិធ្មល់ សង្កាត់ចេក ក្រុងស្វាយរៀង កាលពីវេលាម៉ោង៧និង៣០នាទីយប់ថ្ងៃទី៣០ កក្កដា ២០១២ ។
យុវជនចិន សុភ័ក្រ អាយុ២៥ឆ្នាំ មានទីលំនៅក្នុងភូមិកើតហេតុដែលត្រូវគេកាប់ចំនួន២ដាវសាំមូរ៉ៃ បណ្តាលឱ្យរយះក្បាល២កន្លែង និងដាច់មេដៃខាងឆ្វេង ហើយបាតដៃដាច់នៅសល់តែស្បែកបន្តិចប៉ុណ្ណោះ បាននិយាយថា នៅយប់កើតហេតុរូបគេឃើញមិត្ត ភក្តិឈ្មោះអូន និងបក្សពួក២នាក់ទៀតប្រកែកគ្នាជាមួយមនុស្ស២-៣នាក់ដែលជា អ្នកនៅក្នុងភូមិជាមួយគ្នារឿងហៅ «អា» ដោយចេះតែហៅមិនដឹងគេបងគេប្អូន ហើយការប្រកែកគ្នាកាន់តែខ្លាំងឡើងៗ ។ ដោយឃើញបែបនេះរូបគេក៏ចូលទៅឃាត់ ហើយហៅមិត្តភក្តិឈ្មោះអូន និងបក្សពួកឡើងជិះម៉ូតូត្រឡប់ទៅផ្ទះវិញ ដើម្បីកុំឱ្យមានរឿង។ យុវជនដដែលបន្តទៀតថា បន្ទាប់ពីពួកគេទាំង៤នាក់ជិះម៉ូតូ២គ្រឿងចេញពីកន្លែងប្រកែក គ្នានោះស្រាប់តែមកដល់ចំណុចកើតហេតុខាងលើក៏ត្រូវឈ្មោះឌាក់ និងបក្សពួក២នាក់ទៀតជិះម៉ូតូមកពី ក្រោយតាមស្ទាក់ពីមុខម៉ូតូ ហើយដកដាវសាំមូរ៉ៃ និងកាំបិតពីក្នុងខ្លួនស្ទុះមកកាប់ប្រហារលើពួកគេតែម្តង ទើបពួកគេវាយតបទៅវិញ បណ្តាលឱ្យមានរបួសទាំងសងខាង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]