ជិះម៉ូតូមកលោត​ ទឹកពីលើស្ពាន ជ្រោយចង្វារ សំណាងល្អ សមត្ថកិច្ច ជួយស្រង់ទាន់

ភ្នំពេញ ៖ បុរសម្នាក់ បានជិះម៉ូតូ ម៉ាកសេ ១០០ ពណ៌ខ្មៅ ស៊េរី៩៣ ពាក់ស្លាកលេខ ខ.៧៣៨៩កច១ តែម្នាក់ឯង មកលោតទឹក ពីលើស្ពានជ្រោយចង្វារ ដើម្បីផ្ដាច់សង្ខា កាលពីវេលាម៉ោង៣និង៣០នាទីរសៀលថ្ងៃ ទី៣១ ខែកក្កដានេះ ប៉ុន្ដែសំណាងល្អ ត្រូវ បានសមត្ថកិច្ចដែលប្រចាំការនៅគោលដៅ ស្ពានជ្រោយចង្វារ ជួយសង្គ្រោះទាន់ពេល វេលា ។

យ៉ាងណាក៏ដោយ ជនរងគ្រោះឈ្មោះ កែវ ប៊ុនតុល អាយុ២២ឆ្នាំ មានស្រុកកំណើតនៅភូមិ៦ ឃុំវាលវង់ ខេត្ដកំពង់ចាម ហើយបច្ចុប្បន្នស្នាក់នៅផ្ទះលេខ៨៩ ផ្លូវលេខ៦៣ សង្កាត់បឹងរាំង ខណ្ឌដូនពេញ មិននិយាយពីមូលហេតុនោះឡើយ ហើយបច្ចុប្បន្នកំពុងជួយសង្គ្រោះនៅមន្ទីរពេទ្យកាល់ម៉ែត ។

ប្រភពព័ត៌មានពីសមត្ថកិច្ចប្រចាំគោលដៅស្ពានជ្រោយចង្វារ បានឱ្យដឹងថា ជនរងគ្រោះជិះម៉ូតូតែម្នាក់ឯង មកលោតទឹក ស្រាប់តែភ្លាមៗនោះ សមត្ថកិច្ចបានជួយអន្ដរាគមន៍ជួយស្រង់ជនរងគ្រោះ ដឹកយកទៅសង្គ្រោះនៅមន្ទីរពេទ្យកាល់ម៉ែត ។

ដោយ ៖ គឹម ចន្ថា

ផ្តល់សិទ្ធដោយ ដើមអម្ពិល