ខេត្តបាត់ដំបង ៖ កម្លាំងកងរាជអាវុធហត្ថ បានធ្វើការឃាត់ខ្លួនបុរសម្នាក់ កាលពីវេលាព្រឹកថ្ងៃទី៣១ សីហា ២០១៥ ស្ថិតនៅចំណុចភូមិពោធិ៍២ ឃុំគារ ស្រុកមោងប្ញស្សី បន្ទាប់ពីធ្វើសកម្មភាពប្រើកាំបិតកាប់ទៅ លើបុរសម្នាក់ទៀត បណ្ដាលឱ្យ រងរបួសធ្ងន់ដោយសារតែ ខឹងជនរងគ្រោះតែងតែ ប្រើហិង្សាវាយដំទៅលើ អតីតប្រពន្ធដើមរបស់ខ្លួន មិនទំនេរដៃ ។
មន្ត្រីកងរាជអាវុធហត្ថ ស្រុកមោងប្ញស្សីឱ្យដឹងថា ជនសង្ស័យឈ្មោះផាន់ រដ្ឋា ហៅស៊ីស អាយុ២៤ឆ្នាំ មានទីលំនៅភូមិព្រែកជីក ឃុំព្រែកជីក ស្រុករុក្ខគិរី ។ រីឯជនរងគ្រោះឈ្មោះគៀន ណៃ អាយុ២៨ឆ្នាំ នៅភូមិតាតុក២ ឃុំមោង ស្រុកមោងប្ញស្សី ។
មន្ត្រីដដែលបន្តថា ជនសង្ស័យបានប្រើ កាំបិតប៉័ងតោ កាប់ទៅលើជនរងគ្រោះ ចំនួន៣កាំបិត កាលពីវេលាយប់ថ្ងៃទី២៩ សីហា នៅភូមិតាតុក២ ឃុំមោង ស្រុកមោងប្ញស្សី ដោយសារតែជននេះ ខឹងជនរងគ្រោះវាយដំប្រពន្ធ ដែលជាអតីតប្រពន្ធដើមរបស់ខ្លួន។ ប៉ុន្តែក្រោយបង្កហិង្សា ជនដៃដល់បានរត់គេចខ្លួន លុះនៅព្រឹកថ្ងៃទី៣១ សីហា ទើបត្រូវសមត្ថកិច្ចឃាត់ខ្លួនតែម្ដង ។
សាក្សីនានាបាន និយាយអំពីមូលហេតុ ដែលនាំឱ្យមានអំពើហិង្សាថា ជនសង្ស័យឈ្មោះផាន់ រដ្ឋា ហៅស៊ីស មានប្រពន្ធដល់ទៅ២ តែក្រោយមក ជននេះបានលែងលះប្រពន្ធដើម ហើយប្រពន្ធដើម ក៏បានទៅស្រលាញ់ជនរងគ្រោះឈ្មោះគៀន ណៃ រហូតបានគ្នាជាប្ដីប្រពន្ធ។ សាក្សីបន្តថា ក្រោយពីបានគ្នាជាប្ដីប្រពន្ធឈ្មោះគៀន ណៃ តែងវាយដំទៅលើប្រពន្ធមិនសូវលស់ពេលទេ រហូតធ្វើឲ្យឈ្មោះរដ្ឋា ហៅស៊ីស ជាប្ដីដើម មានការឈឺឆ្អាលក្ដៅក្រហាយ យ៉ាងខ្លាំង៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]