ខេត្តរតនគិរី ៖ ល្បែងឆ្នោត (កន្ទុយលេខ) រីកដូចផ្សិតពេញក្រុងបានលុង ហើយមានមេឆ្នោតមួយចំនួន ធ្វើនំអត់ម្សៅ ពេលកូនចាក់ត្រូវអត់មាន លុយបើកឱ្យ ជាក់ស្តែងកាលពីថ្ងៃទី២៩ ខែសីហា ឆ្នាំ២០១៥ វេលាម៉ោង២រសៀល មានការភ្ញាក់ផ្អើលមួយបានកើតឡើងដោយសារ អ្នកចាក់ឆ្នោតម្នាក់ចាក់ត្រូវលេខធំ (លេខ៣ខ្ទង់) មួយលេខចំនួន១ម៉ឺនរៀល ត្រូវបានចំនួន៦លានរៀល បើកលុយអត់បានគ្រប់ចំនួន ក៏រត់មករកអ្នកកាសែតជួយចុះផ្សាយឱ្យសមត្ថកិច្ច មូលដ្ឋានបានដឹង និងជូនដំណឹងដល់អ្នកនិយមលេង កន្ទុយលេខឱ្យមានការប្រុងប្រយ័ត្ន ។
ទាក់ទិនករណីខាងលើ ស្ត្រីម្នាក់មានឈ្មោះ ស្រីម៉ាប់ មានលំទីនៅក្រុងបានលុង បានរៀបរាប់ប្រាប់អ្នកយកពត៌មានយើងថា ល្បែងកន្ទុយលេខមាន២ពេល គឺនៅម៉ោង៤និង៣០នាទីល្ងាច ចេញលេខឆ្នោតម្តង ហើយម៉ោង៦ និង៣០នាទីល្ងាច ចេញលេខឆ្នោតម្តងទៀត ។
ស្ត្រីរូបនោះបានបញ្ជាក់ថា គាត់បានចាក់លេខឆ្នោត នៅពេលម៉ោង៦ និង៣០នាទីល្ងាច ចំនួន៩លេខ ដោយមានអ្នកដើរកត់លេខ ឆ្នោតមានឈ្មោះ ស្រីចិន ហើយស្ត្រីឈ្មោះ ម៉ាប់ នេះបានចាក់ត្រូវលេខធំមួយលេខ គឺលេខ៥៧៩ ពេលចាក់ត្រូវបែបនេះ មានការសប្បាយចិត្ត យ៉ាងខ្លាំងបានទៅបើកលុយពីឈ្មោះ ស្រីចិន ពេលទៅដល់ស្រាប់តែឈ្មោះ ស្រីចិន ប្រាប់គាត់វិញថា មេធំអត់លុយបើកឱ្យទេ មានតែ១លាន៦ម៉ឺនរៀល សល់ប៉ុន្មានទៀតគាត់ (ស្រីចិន) សុំបង់ជំនួសឱ្យមេធំក្នុង ១ថ្ងៃ១០ម៉ឺនរៀល ។
ដោយមើលឃើញទង្វើ ស្រីចិន ធ្វើនំអត់ម្សៅជាមួយមេធំ និងគ្មានការទទួលខុសត្រូវបែបនេះ ទើបគាត់ផ្ទុះកំហឹង រត់មកប្តឹងអ្នកសែតជួយចុះផ្សាយកុំឱ្យចាញ់បោកមេកន្ទុយលេខមួយចំនួននៅក្រុងបានលុងដូចរូបគាត់ទៀត ។
សូមបញ្ជាក់ផងដែរថា បច្ចុប្បន្នល្បែងកន្ទុយលេខ នៅក្រុងបានលុងកំពុងពេញនិយមយ៉ាងខ្លាំង មិនថាអ្នកមានទ្រព្យ សម្បត្តិ ឬអ្នកក្រទេ បបួលគ្នាចាក់លេខឆ្នោតគ្រប់ៗគ្នា ហើយព្រោះតែល្បែងឆ្នោតនេះ ហើយមានក្រុមគ្រួសារខ្លះចាក់កន្ទុយលេខ ចាញ់អស់លុយ ប្តីវ៉ៃប្រពន្ធ ប្រពន្ធវ៉ៃប្តី រករឿងជេរគ្នាផ្អើលពេញភូមិ ។
ដោយឡែកប្រភពព័ត៌មានពី អ្នកដើរកត់កន្ទុយលេខម្នាក់ បានឲ្យដឹងថា កូនកញ្ច្រែងនៅក្នុងក្រុងបានលុង មានបុរស-ស្រីមិនក្រោមជាង២០នាក់ទេ និងមេធំប្រហែលជាង១០នាក់ ក្នុងក្រុងបានលុង ដែលសមត្ថកិច្ចមិនដែលធ្វើការបង្ក្រាបទេ គាត់បានបញ្ជាក់ទៀតថា មេឆ្នោតធំៗជាង១០នាក់នោះបាន បង់លុយប្រចាំខែដល់សមត្ថកិច្ចមូលដ្ឋានជា រៀងរាល់ខែអស់ហើយ ទើបសមត្ថកិច្ចមិនធ្វើការបង្ក្រាប ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
