ខេត្តបាត់ដំបង ៖ បុរសម្នាក់ត្រូវរថយន្តកាមរី បុកបាក់ជើងម្ខាងរបួសធ្ងន់ ខណៈកំពុងជិះម៉ូតូ ហើយលើកដៃស្វាគមន៍ មិត្តភក្ដិធ្វើឱ្យរេចង្កូត ចូលទៅកណ្ដាលថ្នល់ ស្របពេលដែលរថយន្ត កំពុងបើកមកពីមុខ ក៏បុកពេញទំហឹង កាលពីវេលាម៉ោង១១ និង៥០នាទីថ្ងៃត្រង់ ថ្ងៃទី២៨ សីហា នៅលើកំណាត់ផ្លូវមួយកន្លែង ត្រង់ចំណុចភូមិអូរប្រយុទ្ធ ឃុំអូររំដួល ស្រុកភ្នំព្រឹក។
មន្ត្រីស្រុកភ្នំព្រឹកបានប្រាប់ថា ជនរងគ្រោះឈ្មោះសឿន សីហា ភេទប្រុស អាយុ៣១ឆ្នាំ នៅភូមិថ្នល់បត់ ឃុំអូររំដួល ជិះម៉ូតូម៉ាកស្មាស់ ពណ៌ខ្មៅ ពាក់ស្លាកលេខបាត់ដំបង1A-6426 រីឯរថយន្តម៉ាកកាមរី ពណ៌ស្លែស៊េរីឆ្នាំ៩៦ ពាក់ស្លាកលេខភ្នំពេញ2C-5435 បើកបរដោយបុរសម្នាក់ ឈ្មោះឯម សឿត អាយុ២៧ឆ្នាំ នៅភូមិសាមគ្គី ឃុំពេជ្រចិន្តា ស្រុកភ្នំព្រឹក។
មន្ត្រីដដែលបញ្ជាក់ថា ភាគីទាំង២បានធ្វើដំណើរ បញ្ច្រាសទិសគ្នា ពីកើតទៅលិច ហើយពេលដល់ចំណុច ខាងលើភាគីម៉ូតូបានលើកដៃ ស្វាគមន៍មិត្តភក្ដិរបស់ខ្លួន ជាហេតុធ្វើឲ្យជ្រុលចង្កូត ទៅខាងឆ្វេងដៃក៏ត្រូវរថយន្ត មកពីមុខបុកតែម្ដង។
សាក្សីនៅកន្លែង កើតហេតុបាននិយាយដែរថា ចំណុចគ្រោះថ្នាក់ជាកន្លែងផ្លូវកោង។ ពេលជិះដល់ចំណុចផ្លូវកោងបែបនេះ គេឃើញជនរងគ្រោះ បានលើកដៃជាសញ្ញា ដើម្បីស្វាគមន៏មិត្តភក្ដិ ដែលជិះច្រាសទិសគ្នា។ ប្រភពដដែលបញ្ជាក់ថា ពេលនោះស្រាប់តែម៉ូតូ ជនរងគ្រោះហាក់បានរេចង្កូត ជ្រុលទៅកណ្ដាលថ្នល់ ស្របពេលរថយន្តកាមរីមួយគ្រឿង មើកមកពីខាងមុខ ក្នុងល្បឿនលឿនគួរសមផង ជាន់ហ្វ្រាំងមិនទាន់ ក៏បុកម៉ូតូជនរងគ្រោះ ពេញទំហឹងបណ្ដាលឲ្យ របួសបាក់ជើងខាងឆ្វេង ធ្ងន់ធ្ងរតែម្ដង៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
