រាជធានីភ្នំពេញ ៖ ស្ត្រីម្នាក់បានរងរបួសប៉ោងមុខ ហើយអង្គុយយំតែម្នាក់ឯង នៅលើចិញ្ចើមផ្លូវ ខណៈពេលតាមទាន់ប្តីនាំស្រីចូល ផឹកស៊ីក្នុងក្លិបកម្សាន្តមួយកន្លែង ក៏បានដោះស្បែកជើង វាយប្តី៣ស្បែកជើង ក៏ត្រូវប្តីទាត់១ជើង ហើយថែម១ដៃវិញ បណ្តាលឱ្យប៉ោងមុខដួលអុកគូទ កាលពីវេលាម៉ោង២រំលងអធ្រាត្រឈានចូលថ្ងៃ២៨ សីហា ២០១៥ ស្ថិតនៅចំណុចក្លិបអាវ៉ាឡូន តាមបណ្តោយមហាវិថីសហព័ន្ធរុស្ស៊ី ក្នុងសង្កាត់ទឹកថ្លា ខណ្ឌសែនសុខ ។
នៅកន្លែងកើតហេតុ ស្ត្រីរងគ្រោះមានអាយុប្រហែល៣០ឆ្នាំ មិនបានប្រាប់ឈ្មោះខ្លួន និងប្តីឱ្យអ្នកសារព័ត៌មានដឹងឡើយ តែគាត់បានរៀបរាប់ទាំងទឹកភ្នែកថា មុនពេលនាងត្រូវប្តីវាយប៉ោងមុខបែបនេះ គឺគាត់បានតាមដានប្តីគាត់ជាយូរមកហើយ ព្រោះសង្ស័យប្តីគាត់លួចទាក់ទង ស្នេហាជាមួយស្ត្រីម្នាក់ទៀត ជាមិត្តភក្តិរបស់គាត់ផ្ទាល់ ដែលមានផ្ទះជួលម្តុំចោមចៅយូរហើយ ។ ព្រោះរយៈពេលជាង២ ទៅ៣ខែនេះ គាត់ឃើញប្តីគាត់ត្រឡប់មកដេកផ្ទះវិញយប់ជ្រៅៗរាល់ថ្ងៃ។
លុះដល់យប់កើតហេតុនេះ នៅវេលាម៉ោង១រំលងអធ្រាត្រ ក៏មានស្ត្រីម្នាក់បានទូរស័ព្ទ ហៅប្តីគាត់ចេញក្រៅ ពេលនោះប្តីគាត់ក៏បានជិះរ៉ឺម៉ក់កងបីទៅបាត់ ដោយឃើញដូច្នោះគាត់ ក៏បានជិះម៉ូតូឌុបតាមពីក្រោយ ស្រាប់តែឃើញប្តីគាត់ជិះទៅយកស្ត្រីម្នាក់ជាមិត្តភក្តិគាត់ នៅផ្ទះជួលម្តុំចោមចៅមែន ។ តែពេលនោះគាត់មិនទាន់រករឿងទេ ព្រោះគាត់ចង់ដឹងថា ប្តីគាត់យកស្ត្រីម្នាក់នោះទៅណារហូតដល់ម៉ោង២យប់ ក៏បានឃើញប្តីគាត់ និងស្ត្រីម្នាក់នោះ បានចូលផឹកស៊ីសប្បាយក្នុង ក្លិបកម្សាន្តអាវ៉ាឡូននៅម្តុំអ៊ែតវូត តាមបណ្តោយមហាវិថី សហព័ន្ធរុស្ស៊ីបាត់ទៅ ។
ពេលនោះ ដោយខឹងខ្លាំងពេក គាត់ក៏បានដោះស្បែកជើង ដេញវាយប្តីគាត់បង្កឱ្យមាន ការភ្ញាក់ផ្អើលពេញក្នុងក្លិបអាវ៉ាឡូននោះទៅ ហើយពេលនោះប្តីគាត់ក៏បានរត់ចេញមកក្រៅក្លឹប ក៏បានតាមពីក្រោយ និងបានវាយក្បាលប្តីគាត់៣ស្បែកជើង រួចក៏ត្រូវប្តីគាត់វាយបកវិញ ដោយទាត់គាត់១ជើងចំក្បាលពោះ ហើយថែម១ដៃចំកណ្តាលមុខ បណ្តាលឱ្យប៉ោងមុខដួលអុកគូទរួច ហើយប្តីគាត់ក៏បានរត់គេចបាត់ទៅ ។
ក្រោយពេលអង្គុយយំ នឹងរៀបរាប់ប្រាប់ ក្រុមអ្នកការសែតបាន១សន្ទុះ ក៏បានឡើងជិះម៉ូតូត្រលប់ ទៅផ្ទះបាត់ទៅ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
