រាជធានីភ្នំពេញ ៖ តាមសេចក្តីរាយការណ៍បានឱ្យដឹងថា និស្សិតផ្នែកអគ្គិសនីម្នាក់ ត្រូវចរន្តអគ្គិសនីឆក់ស្លាប់ ខណៈពេលរៀបចំ តបណ្តាញភ្លើងនៅក្នុងបន្ទប់ជួល ដើម្បីស្នាក់នៅជាមួយគូដណ្តឹង។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៩យប់ ថ្ងៃទី២៧ សីហា ២០១៥ នៅចំណុចផ្ទះជួលលេខ២ ផ្លូវ៣១៣ សង្កាត់បឹងកក់ទី១ ខណ្ឌទួលគោក។
ជនរងគ្រោះឈ្មោះសាន់ សុវភ័ណ្ឌ ភេទប្រុស អាយុ២៣ឆ្នាំ ជានិស្សិតផ្នែកអគ្កីសនីឆ្នាំទី១ នៃវិទ្យាស្ថានបច្ចេកទេស(NTI) មានស្រុកកំណើតភូមិប្ញស្សីថ្មី ឃុំចំប៉ា ស្រុកព្រៃកប្បាស ខេត្តតាកែវ ចំណែកនារីជាគូដណ្តឹងឈ្មោះជា ណារី អាយុ២៥ឆ្នាំ ជានិស្សិតផ្នែកពេទ្យឆ្នាំទី៣ នៅសាលាIU ។
ប្រភពបានឱ្យដឹងថា មុនពេលកើតហេតុនិស្សិតរងគ្រោះ បានទៅស្នាក់នៅផ្ទះជួល អ្នកស្គាល់គ្នាតាំងពីថ្ងៃអង្គារ ហើយនៅយប់មិញនេះ ក៏បានរៀបចំតបណ្តាញខ្សែភ្លើង ក្នុងបន្ទប់ឡៅតឿក្នុងផ្ទះជួល។ ខណៈកំពុងតសុខៗស្រាប់តែរអិលជណ្តើរ ហើយដៃកាន់ខ្សែភ្លើងជាប់ ធ្វើឱ្យឆក់ដួលមកដីសន្លប់បាត់ស្មារតីតែម្តង។
ភ្លាមៗនោះត្រូវបានគូដណ្តឹង និងមិត្តភក្តិបញ្ជូនទៅសង្គ្រោះ នៅគ្លីនិកឯកជន តែគ្លីនិកមិនទទួលក៏បញ្ជូនបន្ត មកមន្ទីរពេទ្យកាល់ម៉ែតទៀត តែពេលទៅដល់គ្រូពេទ្យប្រាប់ថា ជនរងគ្រោះស្លាប់បាត់ទៅហើយ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
