ខេត្តបាត់ដំបង ៖ បុរសម្នាក់បែកពពុះមាត់ និងចេញឈាមតាមរោម ដោយសារតែពុលពងគីង្គក់ ត្រូវបានក្រុមគ្រួសារ និងសមត្ថកិច្ចជួយដឹក ទៅកាន់មន្ទីរពេទ្យភ្លាមៗដែរ តែអកុសល គាត់បានស្លាប់នៅ ពាក់កណ្ដាលផ្លូវ កាលពីព្រឹកថ្ងៃទី២៦ សីហា នៅភូមិស្រះគុយ ឃុំមុខរាហ៍ ស្រុករុក្ខគិរី ។
បុរសរងគ្រោះឈ្មោះ សង អឿន អាយុ៣៥ឆ្នាំ នៅភូមិឃុំកើតហេតុខាងលើ ។ សមត្ថកិច្ច បានឱ្យដឹងថា បុរសរងគ្រោះស្លាប់ដោយសារតែពុលពងគីង្គក់ ដែលគាត់ចាប់យកទៅធ្វើម្ហូប ក្រោយពីភ្លក្សរួចក៏បែកពពុះមាត់ និងមានឈាមចេញតាមរោម ដែលមិនអាចដឹកទៅសង្គ្រោះ នៅមន្ទីរពេទ្យទាន់ពេលវេលា ។
អ្នកភូមិបាននិយាយថា គេឃើញ សង អឿន ចេញទៅរកចាប់គីង្គក់ ពេលមេឃកំពុងរលឹមតិចៗ ហើយក្រោយមកគាត់បានយកទៅធ្វើម្ហូប ឃើញគាត់ចម្អិនបណ្ដើរ ភ្លក្សបណ្ដើរ លុះបន្តិចក្រោយមក ក៏មានការភ្ញាក់ផ្អើលថា គាត់មានអាការៈមិនស្រូល ស្រាប់តែបែកពពុះមាត់ ថែមទាំងមានឈាមចេញ តាមរោមតិចៗផងនោះ អ្នកភូមិបានហៅសមត្ថកិច្ចឲ្យជួយអន្តរាគមន៏ ដឹកគាត់ទៅសង្គ្រោះនៅមន្ទីរពេទ្យ តែពេលបញ្ជូនដល់ ពាក់កណ្ដាលផ្លូវគាត់បានដាច់ខ្យល់ស្លាប់ទៅហើយ ។
សមត្ថកិច្ចដែលបានចុះទៅពិនិត្យ បាននិយាយថា សមាជិកក្នុងក្រុមគ្រួសារ មិនទាន់មាននរណាម្នាក់បាន ហូបសម្លគីង្គក់នេះទេ បុរសរងគ្រោះទើបតែ បានភ្លក្សម្នាក់ឯងប៉ុណ្ណោះ ក៏ពុលបែកពពុះមាត់ រហូតដល់ស្លាប់តែម្ដង ។
មន្ត្រីដដែលបញ្ជាក់ថា គេឃើញមានពងគីង្គក់ ជាច្រើននៅក្នុងសម្ល បុរសរងគ្រោះអាចពុល ដោយពងគីង្គក់នេះ បើហូបសាច់មិនអីនោះទេ តែគាត់ហូបដោយទាំងពង ទើបបណ្តាលឱ្យពុលស្លាប់បែបនេះ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
