ខេត្តបាត់ដំបង ៖ មន្រ្តីនគរបាលព្រហ្មទណ្ឌកម្រិតធ្ងន់មួយរូប ត្រូវអ្នករត់តាក់ស៊ីដែលស្រវឹងជោកទះកំផ្លៀង កាលពីវេលាម៉ោង១០និង២០នាទីយប់ថ្ងៃទី២៤កក្កដា នៅចុងស្ពានថ្មត្រើយខាងកើត(ស្ពានដែកចាស់) ក្នុងភូមិរំចេក៤ សង្កាត់រតនៈ ក្រុងបាត់ដំបង ដោយសារខឹងមន្រ្តីនគរបាលរូបនេះបត់ម៉ូតូពីមុខរថយន្តរបស់ខ្លួន ប៉ុន្តែបុរសនេះក៏ត្រូវសមត្ថកិច្ចឃាត់ខ្លួនភា្លមៗដែរបញ្ជូនទៅ ស្នងការដ្ឋានខេត្ត ។
មន្ត្រីសមត្ថកិច្ចនិយាយថា អ្នករត់តាក់ស៊ីដែលថ្លើមធំហ៊ានទះកំផ្លៀងមន្រ្តីនគរបាលនេះឈ្មោះ ណាក់ ហុងគ្រី អាយុ៣១ឆ្នាំ នៅភូមិរំចេក៤ សង្កាត់រតនៈ ក្រុងបាត់ដំបង ជិះរថយន្តម៉ាកកាមរីឆ្លាម ពណ៌ស្លែ ពាក់ស្លាកលេខ បាត់ដំបង 2A-0467 ។ រីឯមន្ត្រីនគរបាលដែលត្រូវគេទះកំផ្លៀងឈ្មោះឈឿត ជិះម៉ូតូអង្គភាព ពាក់ស្លាកលេខនគរបាល និងពាក់មួកនគរបាលបង្ការបង្រ្កាប (មួកសុវត្ថិភាព)។ សមត្ថកិច្ចបញ្ជាក់ថា មន្រ្តីរូបនេះត្រូវបុរសអ្នករត់តាក់ស៊ីចុះពីរថយន្តទះកំផ្លៀង ក្នុងខណៈគាត់ឈប់ម៉ូតូចាក់សាំង ។
មន្រ្តីនគរបាលរងគ្រោះនិយាយថា នាយប់នោះ លោកបានទៅប្រចាំការនៅការិយាល័យដោយជិះម៉ូតូពីខាងកើតទៅលិច តែបានបត់មកក្រោយវិញដើម្បីចាក់សាំង ហើយលោកបានឃើញរថយន្តនោះបើកមកពីលិចលឿនស្លេវ។ លោកបានឈប់នៅកន្លែងចាក់សាំងចុងស្ពាន តែពេលឈប់ភ្លាមបុរសនោះក៏បើករថយន្តមកឈប់ក្បែររួចចុះមកទះកំផ្លៀងលោក ទាំងកំរោលជាច្រើនដៃធ្វើឲ្យធ្លាក់មួកពីក្បាល ទោះជាយ៉ាងណាលោកគេចផុត តែត្រូវ១ដៃពេញទំហឹងដែរ។ ខណៈនោះលោកមិនតបតទេ ផ្ទុយទៅវិញលោកបានអង្វរករអ្នករត់តាក់ស៊ីនោះ ពេលដែលបុរសនោះតិះដៀលថា លោកជិះម៉ូតូភ្លើៗ បត់ពីមុខរថយន្តគ្មានដឹងអី ។ លោកបានប្រាប់ទៅវិញថា លោកបត់ម៉ូតូឆ្ងាយពីរថយន្តនោះ តែដោយអ្នករត់តាក់ស៊ីនេះស្រវឹងហើយបើកលឿនផង ទើបខឹងនឹងរូបលោកហើយបង្កហិង្សាតែម្ដង រីឯកម្លាំងបង្រ្កាបរបស់ស្នងការដ្ឋានខេត្តក៏មកជួយអន្តរាគមនភ្លាមៗ ដែរ ។
ដោយឡែកអ្នករត់តាក់ស៊ីឈ្មោះណាក់ ហុងគ្រី វិញសារភាពថា ខ្លួនពិតជាបានទះកំផ្លៀងមន្រ្តីនគរបាលនោះមែន ព្រោះក្ដៅក្រហាយជិះម៉ូតូបត់ពីមុខរថយន្តរបស់ខ្លួន ។ អ្នករត់តាក់ស៊ីម្នាក់នេះ បានសារភាពទាំងអស់នូវអី្វដែលរូបគេបានធ្វើ ។ សាក្សីនៅកន្លែងកើតហេតុក៏បាននិយាយដែរថា មន្រ្តីនគរបាលរូបនោះមិនតបតទេ តែបានព្យាយាមអង្វរករបុរសប្រមឹកនោះវិញដែលប្រើហិង្សាទះកំផ្លៀង គាត់មិនប្រណីដៃ តែសំណាងហើយត្រូវតែ១ដៃ ព្រោះគេចផុត ។
សមត្ថកិច្ចបញ្ជាក់ដែរថា ពេលនាំដល់ស្នងការដ្ឋានខេត្តបុរសនេះនៅតែអួតថា ខ្លួនគ្រាន់បើទៀត និងនិយាយលែងដឹងខុសត្រូវ មិនតែប៉ុណ្ណោះជននេះបបួលសមត្ថកិច្ចទិញស្រាបៀរ២កេសផឹកជុំគ្នាក្នុង ស្នងការដ្ឋានទៀត ដើម្បីបញ្ចប់រឿងដោយខ្លួនជាអ្នកចេញលុយ។ នៅព្រឹកថ្ងៃទី២៥ កក្កដា ពេលស្វាងស្រាអ្នករត់តាក់ស៊ីរូបនេះបានយល់ព្រមបង់ប្រាក់ ចំនួន៨០ម៉ឺនរៀលឲ្យភាគីរងគ្រោះដើម្បីបញ្ចប់រឿង និងមិនអួតក្អេងក្អាងដូចកាលពីយប់នោះទេ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]