ខេត្តព្រះសីហនុ ៖ កម្លាំងអាវុធហត្ថខេត្ត ដឹកនាំសម្របសម្រួល ដោយលោក ហួត វិចិត្រ ព្រះរាជអាជ្ញារង អមសាលាដំបូងខេត្ត និងបញ្ជាផ្ទាល់ដោយ លោកឧត្តមសេនីយ៍ត្រី ហេង ប៊ុនទី មេបញ្ជាការ កងរាជអាវុធហត្ថ ខេត្តព្រះសីហនុ បានបើកប្រតិបត្តិការ ឡោមព័ទ្ធ និងឆែកឆេរលំនៅដ្ឋានជនសង្ស័យ ជាមេខ្លោងក្រុមចោរប្លន់ អាជីវករលក់មាស-ដូរលុយនៅផ្សារចិន ក្រុងព្រះសីហនុ ។
ប្រតិបត្តិការនេះ ធ្វើឡើងកាលពីរសៀល ថ្ងៃទី០៣ សីហា ២០១៥ នៅភូមិវាលមាស ឃុំវាលរេញ ស្រុកព្រៃនប់ ខេត្តព្រះសីហនុ ។
សមត្ថកិច្ចបានឱ្យដឹងថា ប្រតិបត្តិការបង្ក្រាបនេះ ជាលទ្ធផលគឺ ឃាត់ខ្លួនបាន ជនសង្ស័យម្នាក់ឈ្មោះ ណាំ វ៉ន ហៅ អួង ភេទប្រុស អាយុ៣៥ឆ្នាំ រស់នៅភូមិកើតហេតុ ជាមេខ្លោងនៃអំពើប្លន់អាជីវករ លក់មាស-ដូរលុយ នៅផ្សារចិន ក្រុងព្រះសីហនុកាល ពីវេលាម៉ោង៦ និង៥០នាទីព្រឹកថ្ងៃទី១៤ មិថុនា ២០១៥ កន្លងទៅនេះ និងអំពើលួច-ប្លន់ជាច្រើនករណីទៀតនៅ ខេត្តព្រះសីហនុ និងបណ្តាខេត្តក្បែរៗនេះ ។
សមត្ថកិច្ចបានឱ្យដឹងទៀតថា ក្រោយពេលចាប់ខ្លួនជនសង្ស័យ សមត្ថកិច្ចដកហូតបាន វត្ថុតាងមួយចំនួនធំ ដែលសង្ស័យ ពាក់ព័ន្ធនឹងអំពើចោរកម្មផងដែរ ។ ជនសង្ស័យ និងវត្ថុតាងត្រូវបាន បញ្ជូនទៅស្នងការដ្ឋាន ខេត្តធ្វើការសាក សួរ និងស្រាវជ្រាវបន្តដើម្បី ចាប់បក្ខពួកបន្ថែមទៀត ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
