ខេត្តត្បូងឃ្មុំ ៖ រថយន្ត១គ្រឿង ម៉ាកសាំយ៉ុង ពណ៌ស្លែ មានដឹកឈើពេញ បានបង្កគ្រោះថ្នាក់ ចរាចរណ៍ដ៏រន្ធត់ ដោយបានទៅបុកជាមួយ នឹងម៉ូតូចំនួន២គ្រឿង កាលពីវេលាម៉ោង ០៧ និង៤៥នាទីព្រឹកថ្ងៃទី០១ សីហា ២០១៥ ស្ថិតនៅកំណាត់ផ្លូវជាតិលេខ៧ ត្រង់ចំណុចមុខ ស្ថានីយប្រេងឥន្ធនៈរបស់ ឈ្មោះស៊ីវ យាំង ភេទប្រុស ក្នុងភូមិដារកណ្តាល ឃុំដារ ស្រុកមេមត់ បណ្តាលឱ្យមនុស្ស ៣នាក់ស្លាប់ និងរបួសធ្ងន់-ស្រាល៦នាក់ ហើយត្រូវបាន គេបញ្ជូនទៅសង្គ្រោះនៅមន្ទីរពេទ្យជាបន្ទាន់ ចំណែកអ្នកបើកបរ រថយន្តដឹកឈើ ត្រូវបានសមត្ថកិច្ចឃាត់ខ្លួន ។
លោកវរសេនីយ៍ត្រីសូ សារ៉ាត់ នាយការិយាល័យនគរបាលចរាចរ ផ្លូវគោកខេត្តប្រាប់ឱ្យដឹងថា រថយន្តដឹកឈើបានបើកចេញពីកើតមកលិច តាមបណ្តោយផ្លូវជាតិ មានផ្ទុកឈើពេញបើកបរ ដោយឈ្មោះឡុង វិត ភេទប្រុស អាយុ៣០ឆ្នាំ មានទីលំនៅភូមិសន្ទៃទី២ ឃុំកក់ ស្រុកពញាក្រែក ដឹកមនុស្ស២នាក់ ក្នុងនោះមាន១-ឈ្មោះជុន វត្តី ភេទស្រី អាយុ២៤ឆ្នាំ ជាប្រពន្ធ (ស្លាប់) ២-ឈ្មោះកុយ ភ័ស ភេទប្រុស អាយុ៣៥ឆ្នាំ ជាព្រូ (របួសធ្ងន់) នៅភូមិ-ឃុំជាមួយគ្នា ។
លោកវរសេនីយ៍ត្រី សូ សារ៉ាត់ នាយការិយាល័យ ចរាចរផ្លូវគោកខេត្តបន្តថា ស្របពេលដែល រថយន្តនេះដឹកឈើបើកមកដល់ត្រង់ភូមិដារ កណ្តាល ឃុំដារ ដោយបានប្រើប្រាស់ ល្បឿនលឿន ក៏ជ្រុលទៅបុកម៉ូតូ ចំនួន២គ្រឿង ដែលបើកបញ្ច្រាសទិសគ្នា គឺម៉ូតូទី១ម៉ាកC 100 កូរ៉េពណ៌ក្រហម គ្មានស្លាកលេខ បើកបរដោយឈ្មោះប៉ា ណាក់ ភេទប្រុស អាយុ៣០ឆ្នាំ ភូមិទ្រៀក ឃុំដារ ស្រុកមេមត់ (ស្លាប់) ភ្លាមៗឌុបគ្នា ២នាក់ទៀត មានឈ្មោះភន់ ខ្ញិល ភេទស្រី អាយុ២៥ឆ្នាំ ជាប្រពន្ធរបួសធ្ងន់ និងឈ្មោះណាក់ វណ្ណា ភេទប្រុស អាយុ៣ឆ្នាំ ជាកូនស្លាប់នៅនឹងកន្លែង ។ រួចបានបានជ្រុលមកបុកម៉ូតូទី២ ម៉ាកគុបមូលពណ៌ ស្លែពាក់ស្លាកលេខកំពង់ចាម1i-0854 បើកបរដោយឈ្មោះតុង ស្រស់ ភេទប្រុស អាយុ២៩ឆ្នាំ នៅភូមិឆ្ងជើង ឃុំដារ ស្រុកមេមត់ រងរបួសធ្ងន់ឌុបគ្នាពីរនាក់ ក្នុងនោះមានឈ្មោះទួន ស៊ីម ភេទស្រី អាយុ៣០ឆ្នាំ របួសធ្ងន់ និងឈ្មោះតុង ថារី ភេទស្រី អាយុ២១ឆ្នាំ នៅភូមិឃុំជាមួយអ្នកឌុបទាំងអស់គ្នារបួសស្រាល ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
