ខេត្តស្ទឹងត្រែង ៖ ស្ពានឆ្លងកាត់ទន្លេ មេគង្គលើមកដល់បច្ចុប្បន្នស្ថាបនាសម្រេចបាន២០%ហើយ ចំណែកស្ពានបេតុងចំនួន២កន្លែងទៀតនៅក្នុងទីរួមខេត្តស្ទឹងត្រែង ក៏នឹងសាងសង់រួចរាល់នៅក្នុងខែវិច្ឆិកា ខាងមុខនេះដែរ ។
ដោយសារចក្ខុវិស័យរបស់ប្រមុខរាជរដ្ឋាភិបាលកម្ពុជា ប្រព័ន្ធហេដ្ឋារចនាសម្ព័ន្ធបានអភិវឌ្ឍផ្នែកជាច្រើនក្នុងនោះក៏មាន ផ្លូវថ្នល់ ស្ពានដែលជាសរសៃឈាមសេដ្ឋកិច្ចរបស់ជាតិ និងជាតម្រូវការចាំបាច់បំផុតរបស់ប្រជាពលរដ្ឋកម្ពុជា ។ បច្ចុប្បន្នរដ្ឋាភិបាលបានជំរុញឱ្យក្រសួងក៏ដូច ជាមន្ទីរសាធារណការនិងដឹកជញ្ជូនខេត្ត ត្រូវអភិវឌ្ឍន៍ផ្លូវ ស្ពានគ្រប់ទីកន្លែងជាបន្តបន្ទាប់ ដើម្បីឆ្លើយតបទៅនឹងតម្រូវការនេះ។
ជាក់ស្តែង បន្ទាប់ពីស្ពានសេកុងបានដាក់ឱ្យ ប្រើប្រាស់ជាផ្លូវការរួចមកខេត្តស្ទឹងត្រែងបានទទួលនូវផ្លូវមួយខ្សែមាន ចម្ងាយជាង១៤៣គីឡូម៉ែត្រពីផ្លូវជាតិលេខ៧ ភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ទៅដល់ផ្លូវជាតិលេខ៦២ ភូមិស្ថាពរ សង្កាត់ប៉ាលហាល ក្រុងព្រះវិហារ ខេត្តព្រះវិហារ និងស្ពានមួយទៀតប្រវែង១.៧៣១ម៉ែត្រ ទទឹង១៣,៥ម៉ែត្រ ឈ្មោះថា ស្ពានទន្លេមេគង្គស្ទឹងត្រែង ។ ស្ពាននេះសាងសង់ឆ្លងកាត់ទន្លេមេគង្គលើ ដែលបាននិងកំពុងសាងសង់ដោយក្រុមហ៊ុនសៀងហៃគ្រុប ខូអិលធីឌី ក្រោមកម្ចីឥណទានពីរដ្ឋាភិបាលនៃសាធារណរដ្ឋប្រជាមានិតចិន ដោយចំណាយលើថវិកាសាងសង់១១៦,៥លានដុល្លារអាមេរិក ចាប់ផ្តើមសាងសង់ក្នុងខែសីហា ឆ្នាំ២០១១ និងបញ្ចប់ការសាងសង់ជាស្ថាពរក្នុងរយៈពេល៤៥ខែ ។
លោក ស គឹមណាត ប្រធានមន្ទីរសាធារណការនិងដឹកជញ្ជូនខេត្តមានប្រសាសន៍ថា បច្ចុប្បន្នផ្លូវថ្នល់និងស្ពានដែលកំពុងសាងសង់សម្រេចជាលទ្ធផលបាន ២០%ហើយ ។ ជាមួយគ្នានេះ មន្ទីរសាធារណការនិងដឹកជញ្ជូនខេត្តបានរុះរើស្ពានឈើចាស់ឌ្រុទទ្រោម ចំនួនពីរកន្លែងក្នុងខេត្តនិងសាងសង់ជាស្ពានថ្មីអំពីបេតុងឡើងវិញ គឺស្ពានអូរដំណាក់ ស្ថិតក្នុងភូមិព្រែក សង្កាត់ស្ទឹងត្រែង ក្រុងស្ទឹងត្រែង មានទទឹង១១ម៉ែត្រ បណ្តោយ៣៦ម៉ែត្រ និងស្ពានមួយកន្លែងទៀតស្ថិតក្នុងភូមិស្រះឫស្សី សង្កាត់ស្រះឫស្សី ក្រុងស្ទឹងត្រែង មានទទឹង៨ម៉ែត្រ បណ្តោយ៣៦ម៉ែត្រ ។
លោក ស គឹមណាត បញ្ជាក់ថា ស្ពានទាំងពីរនេះសាងសង់ឡើងវិញដោយមន្ទីរសាធារណការនិង ដឹកជញ្ជូនខេត្ត ចាប់ផ្តើមសាងសង់ក្នុងខែមេសា ឆ្នាំ២០១២ និងបញ្ចប់នៅខែវិច្ឆិកា ២០១២ខាងមុខ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]