រាជធានីភ្នំពេញ ៖ រដ្ឋមន្ត្រីក្រសួងទេសចរណ៍បានឱ្យដឹងថា ពិធីបុណ្យសមុទ្រឆ្នាំនេះ នឹងត្រូវរៀបចំធ្វើនៅខេត្តកែប បន្ទាប់ពីធ្វើនៅខេត្តព្រះសីហនុកាលពីឆ្នាំមុនទទួលបានជោគជ័យ ។ ពិធីបុណ្យដ៏អធិកធមនេះ នឹងត្រូវរៀបចំធ្វើនៅអំឡុងថ្ងៃទី៧ដល់ទី៩ ខែធ្នូ ឆ្នាំ២០១២ ។
លោកថោង ខុន រដ្ឋមន្ត្រីក្រសួងទេសចរណ៍មានប្រសាសន៍បែបនេះនៅក្នុងអង្គប្រជុំ អន្តរក្រសួងនៅសាលាខេត្តកែបកាលពីថ្ងៃទី២៤ កក្កដា ២០១២ ។លោករដ្ឋមន្ត្រីថ្លែងថា ខេត្តកែប គឺមានស្ថានភាពល្អ និងមានលទ្ធភាពគ្រប់គ្រាន់ក្នុងការរៀបចំពិធីបុណ្យសមុទ្រ ប៉ុន្តែអ្វីដែលជាបញ្ហាប្រឈមខ្លាំងនោះ គឺកន្លែងស្នាក់នៅ ព្រោះសណ្ឋាគារ និងផ្ទះសំណាក់ទាំងខេត្តកែប និងកំពត គឺមិនអាចគ្រប់គ្រាន់សម្រាប់ភ្ញៀវស្នាក់នៅទេ ។
លោករដ្ឋមន្ត្រីបញ្ជាក់ថា បុណ្យសមុទ្រនាឆ្នាំនេះ ក៏មានការរៀបចំពិព័រណ៍ពាណិជ្ជកម្មរបស់ក្រសួងពាណិជ្ជកម្មផងដែ រ ។ ប្រធានបទនៃការរៀបចំបុណ្យសមុទ្រនាឆ្នាំនេះគឺ «សមុទ្រទីក្រុងបៃតង» ។ ហេតុដែលលើកប្រធានបទនេះឡើង ព្រោះវាមានប្រព័ន្ធប្រតិសកម្មជាមួយគ្នារវាងសមុទ្រនិងទីក្រុង ។លោក ថោង ខុន បន្ថែមថា ក្រៅពីការរៀបចំកីឡាគ្រប់ប្រភេទដូចជា អុំទូកមារ៉ាតុង និងជិះម៉ូតូលើទឹកជាដើមនោះ បុណ្យសមុទ្រឆ្នាំនេះក៏មានរៀបចំពិធីមួយទៀតគឺព្យុហយាត្រា ដែលកាលពីឆ្នាំមុនមិនមានទេ ។ ព្យុហយាត្រានេះ គឺដើម្បីជាការបង្ហាញនូវសក្តានុពលវិស័យទេសចរណ៍នៅមាត់សមុទ្រ កម្ពុជា រួមទាំងការតាំងពិព័រណ៍ស្តីពីការអភិរក្សនៅបាតសមុទ្រផងដែរ ។
លោក ណេប សាមុត អគ្គលេខាធិការនៃគណៈកម្មការជាតិវាយតម្លៃទីក្រុងស្អាត នៃក្រសួងទេសចរណ៍ បានលើកឡើងអំពីកម្មវិធី និងសកម្មភាពត្រៀមចូលរួមបុណ្យសមុទ្រ រួមមានការរំលឹកឱ្យភ្ញៀវទេសចរដាំកូនឈើមួយដើមម្នាក់ក្នុង ទីតាំងដែលកំណត់ដោយអាជ្ញាធរ ហើយដើមឈើទាំងនោះជាប្រភេទដែលមានអាយុវែង ។ ការរៀបចំធុងសម្រាប់ដាក់សំរាម ការសម្អាតផ្លូវថ្នល់ សម្អាតឆ្នេរ និងការផ្សព្វផ្សាយឱ្យប្រជាពលរដ្ឋចូលរួមថែរក្សាអនាម័យ សណ្តាប់ធ្នាប់ របៀបរៀបរយ រួមទាំងទំនាក់ទំនងដ៏ល្អជាមួយភ្ញៀវទេសចរដោយប្រកាន់ខ្ជាប់ សីលធម៌ ប្រពៃណី និងទំនៀមទម្លាប់ដ៏ល្អផូរផង់របស់ជនជាតិខ្មែរ ។
លោក ហាស់ សារ៉េត អភិបាលខេត្តកែប ក្នុងនាមជាម្ចាស់ផ្ទះបានបង្ហាញនូវមោទនភាពយ៉ាងខ្លាំងក្នុង ពេលដែលពិធីបុណ្យសមុទ្រត្រូវរៀបចំនៅខេត្តកែប ។ លោកបញ្ជាក់ថា តាមការប៉ាន់ស្មាន ភ្ញៀវទេសចរដែលនឹងចូលរួមក្នុងពិធីបុណ្យសមុទ្រនេះ មានរហូតដល់ជាង៥ម៉ឺននាក់ឯណោះ ដូច្នេះខេត្តត្រូវទទួលបន្ទុកយ៉ាងធ្ងន់លើការងារជាច្រើន រួមមានការធ្វើចរាចរណ៍ សណ្តាប់ធ្នាប់ សន្តិសុខ ការរៀបចំកន្លែងស្នាក់នៅ ការតុបតែងកែលម្អសោភ័ណភាព អនាម័យ និងបរិស្ថានជាដើម ។
លោកអភិបាលខេត្តកែប សន្យាថា នឹងប្រើប្រាស់កម្លាំងសរុប វិធានការសរុបដើម្បីសម្រេចកិច្ចការនេះឱ្យបានដើម្បីលើកកម្ពស់មុខ មាត់ និងកិត្តិយសនៃព្រះរាជាណាចក្រកម្ពុជា ។គេរំពឹងថាបុណ្យសមុទ្រឆ្នាំនេះនឹងទទួលបានការចូលរួមពីភ្ញៀវ ទេសចរជាតិ អន្តរជាតិយ៉ាងច្រើនកុះករដូចកាលពីឆ្នាំមុន បើទោះជាការប្រារព្ធពិធីបុណ្យមិនចំថ្ងៃចូលឆ្នាំសាកលក៏ ដោយ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]