ខេត្តបន្ទាយមានជ័យ ៖ ស្ត្រីម្នាក់ដោយសារខឹងប្រាប់ប្តីឱ្យទៅបង់ត្រីមិនព្រមទៅ ក៏កើតមានការប្រទូស្តរ៉ាយគ្នា ហើយត្រូវម្តាយបង្កើតស្តីបន្ទោសទៀត ក៏តូចចិត្តលួចផឹកថ្នាំសម្លាប់សត្វកណ្តៀរ បណ្តាលឱ្យស្លាប់នៅកណ្តាលវាលស្រែចោលកូនតូចៗចំនួន២នាក់ឱ្យ រស់នៅកំព្រាម្តាយ។ ក្រោយពីផឹកថ្នាំសម្លាប់ខ្លួនសពស្ត្រីម្នាក់នេះ ត្រូវគេប្រទះឃើញនាវេលាម៉ោង៤និង២៣នាទីរសៀលថ្ងៃទី២២ កក្កដា នៅកណ្តាលវាលស្រែ ចម្ងាយជាង៣០០ម៉ែត្រ ពីភូមិស្រះលិច ឃុំព្រះនេត្រព្រះ ស្រុកព្រះនេត្រព្រះ ។
លោកវរសេនីយ៍ត្រី កែវ ប៊ុនយឿន អធិការនគរបាលស្រុកព្រះនេត្រព្រះឱ្យដឹងថា ស្ត្រីដែលសម្លាប់ខ្លួននេះ ឈ្មោះ ម៉ក់ ចាន់ទី អាយុ២៥ឆ្នាំ មានទីលំនៅក្នុងភូមិ-ឃុំខាងលើ ។ តាមការស្រាវជ្រាវជុំវិញករណីធ្វើអត្តឃាតនេះឱ្យដឹងថា នៅវេលាម៉ោង៤និង៣០នាទីទៀបភ្លឺថ្ងៃទី២២ កក្កដា នាងបានប្រាប់ប្តីឱ្យទៅបង់ត្រី តែប្តីប្រកែកមិនទៅព្រោះគាត់ឈឺពោះ ។ បន្ទាប់មកក៏មានការប្រវាយប្រតប់គ្នាជាមួយប្តី ហើយត្រូវបានអ្នកជិតខាងជួយអន្តរាគមន៍បំបែកពួកគេទាំង២នាក់ ស្របពេលនោះម្តាយរបស់នាងក៏ស្តីបន្ទោសបនិ្តចបន្តួចធ្វើឱ្យនាង ខឹង ក៏ជេរប្តី និងម្តាយបង្កើតរបស់ខ្លួនយ៉ាងចាស់ដៃផងដែរ ។
ប្រភពដដែលបន្តទៀតថា បន្ទាប់មកនាងក៏ជិះម៉ូតូយកទៅលក់នៅផ្សារចក្រី ឃុំជប់វ៉ារី ស្រុកព្រះនេត្រព្រះ ។ នៅវេលាម៉ោង៨ព្រឹក ពេលនាងត្រឡប់មកផ្ទះវិញមួយភ្លែតក៏គេចខ្លួនបាត់រហូតប្តីដើរ រកមិនឃើញ លុះដល់វេលាម៉ោង៤និង២៣នាទីរសៀលថ្ងៃដដែល មានក្មេងឃ្វាលគោរត់មកប្រាប់ថា ឃើញសពស្ត្រីម្នាក់នៅកណ្តាលវាលស្រែ ។ បើតាមបុរសជាប្តីនិយាយប្រាប់សមត្ថកិច្ចថា ក្រោយពេលដឹងថា នាងសម្លាប់ខ្លួន គាត់បានដើរមកមើលថ្នាំសម្លាប់សត្វកណ្តៀរដែលព្យួរទុកនៅនឹង ទ្រុងជ្រូក ស្រាប់តែបាត់១កញ្ចប់ ។
លោកអធិការបញ្ជាក់ថា តាមការសន្និដ្ឋានទាក់ទិននឹងករណីធ្វើអត្តឃាតនេះ គឺស្ត្រីរូបនេះបានផឹកថ្នាំកណ្តៀរ តាមការអះអាងពីប្តីថា គាត់បាត់ថ្នាំសម្លាប់សត្វកណ្តៀរ១កញ្ចប់ ។ ក្រោយពីសមត្ថកិច្ចពិនិត្យរួចក៏បានប្រគល់សពជូនក្រុមគ្រួសារ ចាត់ចែងធ្វើបុណ្យតាមប្រពៃណី ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
