រាជធានីភ្នំពេញ ៖ ស្ត្រី២នាក់បើករថយន្តប្រញាប់ទៅចូលរួមពិធីជប់លៀងក្មួយនៅ ក្នុងក្លឹបជ្រុលទៅបុកម៉ូតូពីក្រោយ បណ្តាលឱ្យដួលរងរបួសធ្ងន់២នាក់ ស្រាលម្នាក់ កាលពីវេលាម៉ោង១០និង៤០នាទីយប់ថ្ងៃទី២៤ កក្កដា តាមបណ្តោយផ្លូវលេខ៧០ ស្ថិតក្នុងសង្កាត់ស្រះចក ខណ្ឌដូនពេញ ហើយរថយន្តព្យាយាមបើករត់គេចទៅដល់មុខក្រសួងធម្មការ និងសាសនា ក្នុងសង្កាត់ចតុមុខ ខណ្ឌដូនពេញ ត្រូវសមត្ថកិច្ចឃាត់ខ្លួន ។
ប្រភពព័ត៌មានឱ្យដឹងថា មុនពេលកើតហេតុរថយន្តកូរ៉ូឡា ស៊េរី៩៥ ពណ៌ឈាមជ្រូក ជិះគ្នា២នាក់ ជាស្ត្រីក្នុងទិសដៅពីលិចទៅកើត ស្របទិសគ្នាជាមួយម៉ូតូឌ្រីមសេ១២៥ ស៊េរី២០១២ ពណ៌ខ្មៅ ជិះគ្នា៣នាក់ជាយុវជន ខណៈមកដល់ចំណុចខាងលើរថយន្តក៏ជ្រុលទៅបុកម៉ូតូពីក្រោយ បណ្តាលឱ្យដួលរងរបួសធ្ងន់២នាក់ ស្រាលម្នាក់។ ជនរងគ្រោះរបួសធ្ងន់ត្រូវបានបញ្ជូនទៅព្យាបាលនៅមន្ទីរពេទ្យកាល់ ម៉ែត ។
ក្រោយពេលសមត្ថកិច្ចឃាត់ខ្លួនជាប់ស្ត្រី ទាំង២នាក់នោះមិនព្រមសារភាពថា រថយន្តរបស់គេបង្កគ្រោះថ្នាក់ចរាចរណ៍ទេ ថែមទាំងប្រើពាក្យមិនសមរម្យដាក់សមត្ថកិច្ច ហើយបានទូរស័ព្ទហៅអ្នកជួយអន្តរាគមន៍ម្នាក់ដែលអះអាងថា ជាសមត្ថកិច្ច និងជាអ្នកសារព័ត៌មានដែលមិនមានអង្គភាពច្បាស់លាស់បានដកកាត មកគំរាមសមត្ថកិច្ច និងអ្នកសារព័ត៌មានដែលចុះទៅថតទៀតផង ។ ទោះបីជាយ៉ាងណារថយន្តបង្កហេតុ និងស្ត្រីទាំង២នាក់នោះត្រូវសមត្ថកិច្ចយកទៅរក្សាទុកនៅការិយា ល័យចរាចរណ៍ផ្លូវគោករង់ចាំធ្វើការដោះស្រាយតាមនីតិវិធី ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]