ខេត្តកំពង់ឆ្នាំង ៖ ការជ្រើសរើសគូស្រករមិនមែនជាការងាយ និងអាចលេងសើចបានឡើយ ដូចពាក្យចាស់លោកថា ធ្វើស្រែខុសមួយឆ្នាំ នៅមួយឆ្នាំទៀត ប៉ុន្តែបើយកប្រពន្ធខុសគឺខុសមួយជីវិត ។ យ៉ាងណាមិញ បុរសពោះម៉ាយ អាយុ៣៥ឆ្នាំម្នាក់ បានរៀបការពេញច្បាប់ជាមួយនាងក្រមុំដ៏ស្រស់ស្អាត អាយុ១៨ឆ្នាំម្នាក់ និងបានរួមរស់ក្រេបទឹកឃ្មុំបានតែ១០ថ្ងៃ ស្រាប់តែនាងជាភរិយាក្មេងបានរត់ចោលប្រុសថ្លៃដែលស្រឡាញ់ ស្មោះអស់ពីដួងចិត្ត ពុំដឹងថានាងទៅទីណា ? គេបានដាក់ការសង្ស័យថា នាងទំនងជារត់ទៅជាមួយនិងអន្ទិតម្នាក់ដែលទើបលាចាកសិក្ខាបទ ។
នេះមិនមែនជាការលេងសើច ឬមានចេតនាបង្អោនបង្អាប់លើគូស្នេហ៍មួយគូនេះ ឬតួអង្គណាម្នាក់របស់គូស្នេហ៍នេះឡើយ ប៉ុន្តែវាជារឿងពិតមួយបានកើតឡើងរវាងកូនកំលោះពោះម៉ាយ អាយុ៣៥ឆ្នាំ រៀបការ និងកូនក្រមុំអាយុ១៨ឆ្នាំ នៅភូមិភ្នៀត ឃុំផ្សារ ស្រុកបរិបូណ៍ ដែលក្រោយរៀបការរួមរស់ជាមួយគ្នាបាន១០ថ្ងៃ ស្រីថ្លៃបានចុះចោលដោយគ្មានការអាឡោះអាល័យ ឱ្យដេកឱបរូបថតមង្គលការមមើមមាយជារៀងរាល់យប់ ។ ពិតណាស់ទស្សនៈមួយបាននិយាយថា យើងគប្បីរៀបការជាមួយនរណាដែលស្រលាញ់យើង ជាជាងរៀបការជាមួយអ្នកដែលមិនស្រលាញ់យើង។
ជួបជាមួយកូនកំលោះអភ័ព្វស្នេហ៍វ័យ៣០ ប្លាយឆ្នាំ បាននិយាយរៀបរាប់ពីដំណើររឿងរហូតដល់ចុងបញ្ចប់ កើតក្តីឈឺចាប់ប្រាប់កោះសន្តិភាពថា រូបគេឈ្មោះ ញង់ ជឿន អាយុ៣៥ឆ្នាំ រស់នៅជាមួយម្តាយជាស្ត្រីមេម៉ាយ ឈ្មោះ កុក រីន អាយុ៥៥ឆ្នាំ ក្នុងភូមិភ្នៀត ឃុំផ្សារ ក្រុងកំពង់ឆ្នាំង បានស្រលាញ់នារីម្នាក់ឈ្មោះ ស៊ុន ស៊ីថៃ អាយុ១៨ឆ្នាំ ដែលមានផ្ទះនៅក្នុងភូមិជាមួយគ្នា ។ ដោយការស្រលាញ់ទប់ចិត្តមិនបានក៏ឱ្យម្តាយនាំចាស់ទុំទៅចូលស្តី ដណ្តឹងតាមប្រពៃណី និងបានរៀបការកាលពីដើមខែកក្កដា នេះ ។ បុរសរូបនោះបានបន្តថា នៅពេលចូលស្តីដណ្តឹង នាងឈ្មោះ ស៊ុន ស៊ីថៃ ហាក់មានការអល់អែកខ្លះដែរ ដោយសុំពេលមួយថ្ងៃដើម្បីគិត ។ លុះស្អែកឡើងក៏បានទៅរកគ្រូទស្សន៍ទាយដឹងថាល្អ ក៏ត្រឡប់មកវិញ ក៏យល់ព្រមរៀបការ ហើយពិធីរៀបការក៏បានចាប់ផ្តើមឡើងយ៉ាងឆាប់រហ័សដោយមិនបង្អង់ យូរទេ ដោយខាងប្រុស គឺរូបគាត់ជាអ្នកចេញថ្លៃរៀបមង្គលការទាំងអស់ ។ ការចំណាយអស់ប្រហែលជាង៨លានរៀល គឺស្មើនឹង២.០០០ដុល្លារ ដោយមានភ្ញៀវចូលរួមយ៉ាងច្រើនកុះករទៀតផង ។ ក្រោយពេលរៀបការហើយកូនក្រមុំបានមករស់នៅលើផ្ទះរបស់គាត់ជា ប្តី ព្រោះតែគាត់មានតែ២នាក់ម្តាយចំណាស់ ។
បុរសពោះម៉ាយប៉ះប្រពន្ធក្មេងខ្ចី បានតែមួយរយៈពេលខ្លីរូបនោះ បានបន្តរៀបរាប់ដោយក្តីឈឺចាប់ថា ក្រោយពេលរៀបការហើយគឺបានរួមរស់នៅជាមួយគ្នាជាធម្មតាដូចប្តី -ប្រពន្ធរៀបការថ្មីថ្មោងឯទៀតដែរ គ្រាន់តែនាងក្មេងមានភាពខ្មាស់អៀនបន្តិចបន្តួចជាទម្លាប់ របស់នារីខ្មែរ ។ ប៉ុន្តែបានត្រឹមតែ១០ថ្ងៃប៉ុណ្ណោះគឺនៅថ្ងៃចន្ទទី១៨ ខែកក្កដា ប្រពន្ធជាទីស្រលាញ់ដែលទើបបានរួមរស់ជាមួយគ្នា១០ថ្ងៃ បានរត់ចោលរូបគាត់ដោយគ្មានអាល័យ និងគ្មានកំហុស ។
នៅព្រឹកថ្ងៃនោះគឺនាងបានទៅផ្សារទិញត្រី សាច់មកធ្វើម្ហូបជាធម្មតា ប៉ុន្តែរហូតដល់ម៉ោងជាង១១ថ្ងៃត្រង់ទៅហើយ នៅតែមិនឃើញនាងត្រឡប់មកផ្ទះវិញទៀត រូបគាត់ក៏ទៅរក ហើយក៏បានប្រទះឃើញតែកង់ដែលនាងជិះទៅផ្សារ ដែលកង់នោះនាងបានដាក់ផ្ញើនៅផ្ទះគេជិតផ្សារបរិបូរណ៍ ដោយមានកន្ត្រកមួយភ្ជួរនៅដៃកង់ និងមានត្រីប្រា១ក្បាល ផ្លែត្រឡាច១ ដាក់ក្នុងកន្ត្រកសម្រាប់ធ្វើម្ហូប ។ ចំពោះស្រមោលប្រពន្ធបានបាត់ទៅហើយមិនដឹងទៅទីណាទេ ។ គាត់បានយល់ថា ប្រពន្ធគាត់គឺពិតជារត់ចោលគាត់ទៅហើយ ។ ប្រភពដដែលបានបន្តថា ប៉ុន្មានថ្ងៃមុនពេលនាងចាកចេញទៅ ពេលយប់ៗប្រពន្ធគាត់តែងបានទទួលទូរស័ព្ទដែលគាត់ជាប្តីមិន បានស្គាល់ ព្រោះពេលទទួលទូរស័ព្ទនាងតែងរត់ចុះដីទៅនិយាយឆ្លងឆ្លើយគ្នា ហើយពេលនាងឡើងមកលើផ្ទះវិញនាងប្រាប់ថា ទៅបត់ជើង ។ បុរសរូបនេះបានកត់សម្គាល់ថា នៅយប់ថ្ងៃទី១៧ កក្កដា ប្រពន្ធគាត់បានចុះដីទៅនិយាយទូរស័ព្ទមានរយៈពេលជិត២ម៉ោង ទើបឡើងមកលើផ្ទះវិញ លុះស្អែកឡើងស្រាប់តែនាងរត់ចោលគាត់តែម្តង។
បុរសរូបនោះបានដាក់ការសង្ស័យថា គាត់មានការសង្ស័យលើប្រពន្ធថ្មីរបស់គាត់បានរត់ទៅតាមប្រុស ម្នាក់ដែលធ្វើជាមេជាងសំណង់ នៅវត្តព្រះឥន្ធទេព ក្នុងឃុំមេលុំ ស្រុកបរិបូរណ៍ ដែលអន្ទិតរូបនោះជាអតីតភិក្ខុបួសរៀននៅវត្តនេះ និងពេលសឹកវិញធ្វើជាជាងសំណង់ និងរស់នៅក្នុងវត្តនេះទៀត ហើយធ្លាប់ជួបគ្នាជាមួយប្រពន្ធគាត់ ។ លុះបាត់ប្រពន្ធ អន្ទិតរូបនោះក៏បាត់ពីវត្តដែរ ។ ទោះជាយ៉ាងណាគាត់គ្រាន់តែដាក់ការសង្ស័យតែប៉ុណ្ណោះ ហើយបើទុកណាពេលនេះរូបគាត់ស្រឡាញ់ផ្កាប់មុខ ដេករវើរវាយជាមួយរូបថតមង្គលការ យ៉ាងណាក៏ដោយចុះ តែប្រសិននាងជាប្រពន្ធត្រឡប់មកវិញក៏គាត់មិនទទួលយកធ្វើជា ប្រពន្ធទៀតដែរ សុំតែថ្លៃបណ្ណាការជាង២ពាន់ដុល្លារមកវិញតែប៉ុណ្ណោះ ។
ស្ត្រីឈ្មោះ សឹង ឃា អាយុ៤៥ ឆ្នាំ ដែលត្រូវជាម្តាយនាងប្រពន្ធក្មេង បាននិយាយថា គាត់មិនបានដឹងថាកូនស្រីគាត់រត់ទៅទីណាទេ។ នៅពេលគេចូលស្តីដណ្តឹង កូនស្រីប្រាប់ថាសុំពេលមួយយប់គិតមើលសិន លុះស្អែកឡើងក៏បានមកសុំប្រាក់គាត់៥ពាន់រៀលទៅឱ្យគ្រូទស្សន៍ ទាយ ហើយពេលត្រឡប់មកវិញក៏ប្រាប់ថា យល់ព្រម ទើបគាត់ប្រាប់ទៅដន្លងខាងប្រុសថា ព្រមលើកឱ្យហើយ ដោយខាងប្រុសជាអ្នកចាត់ចែងចេញថ្លៃមង្គលការទាំងអស់ ។ ប៉ុន្តែការហើយបាន១០ថ្ងៃកូនស្រីគាត់ស្រាប់តែរត់ចោលគេ គាត់ក៏មិនដឹងដែរ មិនដឹងជាកូនស្រីអាក់អន់ស្រពន់ចិត្តរឿងអ្វី ឬក៏ដូចគេសង្ស័យមែនក៏មិនដឹង ព្រោះពេលការហើយកូនទៅនៅខាងប្រុសរហូតដល់ពេលបាត់ខ្លួន ។ ចំពោះរឿងខាងប្រុសទារថ្លៃបណ្ណាការនោះ គាត់ថាគ្មានទេ គាត់សព្វថ្ងៃក្រណាស់ រកអង្ករច្រកឆ្នាំងសឹងមិនបាន ដូចដន្លងខាងប្រុសឃើញស្រាប់ហើយ ទើបគេយកទៅរៀបការខ្លួនគេ ។ សព្វថ្ងៃគាត់មានប្តីដូចស្រីមេម៉ាយ ព្រោះប្តីទៅធ្វើការនៅថៃបាត់ស្រមោលឈឹងតែម្តង ។
ដោយឡែកស្រ្តីឈ្មោះ កុក រីន អាយុ៥៥ឆ្នាំ ដែលត្រូវជាម្តាយខាងប្រុសវិញ បាននិយាយថា គាត់បានប្តឹងទៅនគរបាលប៉ុស្តិ៍រួចហើយ គឺសុំទារថ្លៃបណ្តាការវិញចំនួន២ពាន់ដុល្លារ ។ ព្រោះតែខាងស្រីធ្វើនេះដូចមកបោកកូនប្រុសគាត់ និងគាត់ទាំងភ្នែកស្រស់ ។ គាត់មិនបានទៅបង្ខិតបង្ខំនោះទេ គឺទៅដណ្តឹងតាមប្រពៃណី តាមច្បាប់ បើមិនពេញចិត្តម៉េចមិនប្រកែក ។ លុះដល់ការហើយម៉េចចាំរត់ចោលគ្នា នេះមិនដូចជាបោកទេឬ ។
ទោះយ៉ាងណាក៏ដោយចុះ ភាពមិនចុះសម្រុងគ្នាក្រោយពេលរៀបការនេះ តែងកើតមានហូរហែដែរ ប៉ុន្តែការសម្រេចឈ្នះចាញ់មានតែផ្លូវច្បាប់នោះទេដែលអាចកាត់ សេចក្តីបែបណានោះ ។
គួររំលឹកដែរថា ការបរាជ័យជីវិតគូស្រករសម្រាប់លោក ញង់ ជឿន ជាលើកទី២នេះ មិនដឹងថាធ្វើឱ្យលោកចុះចាញ់ចំពោះព្រហ្មលិខិតនេះ ឬបែបណាទេ ដែលស្នេហ៍ទី១របស់លោកគឺបានបញ្ចប់គ្នាដោយការលែងលះ ដោយសារតែការរស់នៅជាមួយប្រពន្ធមុននោះ១ឆ្នាំគ្មានកូន។ លោកបានលែងលះប្រពន្ធទី១មកដល់ពេលនេះមានរយៈពេល៤ឆ្នាំហើយ ៕
រូបភាពនៅថ្ងៃរៀបអាពាហ៍ពិពាហ៍រវាងកូនកំលោះ និងកូនក្រមុំ
ស្ត្រីជាម្តាយខាងកូនក្រមុំ
ម្តាយខាងកូនកំលោះ
រូបភាពនៅថ្ងៃរៀបអាពាហ៍ពិពាហ៍រវាងកូនកំលោះ និងកូនក្រមុំ
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]