រាជធានីភ្នំពេញ ៖ មន្ត្រីអង្គរក្សម្នាក់ បានប្រើប្រាស់កាំភ្លើងរបស់ខ្លួន បាញ់ប្រហារដូចរន្ទះស្រោច ទៅលើបុរសម្នាក់អង្គុយជាប់គ្នា ដោយកាំភ្លើងខ្លីម៉ាក CF-98-9 ខណៈពេលកំពុងផឹកស៊ី នៅក្នុងពិធីខួបកំណើតកូន របស់សាច់ញាតិមួយនៅក្នុងភូមិជាមួយគ្នា បណ្តាលឱ្យគ្រាប់កាំភ្លើងនោះ ត្រូវជនរងគ្រោះសុសសាច់ គ្មានខុសមួយគ្រាប់សោះ ដួលដេកនៅនឹងកន្លែង ។
សាក្សីនិយាយថា បាញ់ស្រោចទៅលើ ដេកស្តូកហើយ មិនព្រមឈប់បាញ់ទេ គឺបានឈរបាញ់ស្រោច ថែមទៅលើជនរងគ្រោះ ដែលកំពុងដេកដួល នោះរហូតអស់ទាំង១៥គ្រាប់តែម្តង។ បន្ទាប់មក ជននោះប៉ងដោះដូរបង់គ្រាប់បាញ់ប្រហារថែមទៀត ប៉ុន្តែត្រូវអ្នកនៅផឹកស៊ីជាមួយគ្នានោះ ស្ទុះទៅចាប់ដណ្តើមយកកាំភ្លើង ពីដៃនិងចាប់ជននោះដែរ តែចាប់មិនជាប់ ហើយជននោះបានរត់គេច ខ្លួនទៅបាត់ដោយសុវត្ថិភាព ។
ហេតុការណ៍នេះបានកើតទ្បើងកាលពីវេលាម៉ោង១០យប់ថ្ងៃទី៤ កក្កដា នៅកន្លែងប្រារព្ធពិធីខួបកំណើត ស្ថិតក្នុងភូមិគោកពពេល ឃុំលំហាច ស្រុកអង្គស្នួល ខេត្តកណ្តាល ។
ជនដៃដល់ត្រូវ បានគេស្គាល់ឈ្មោះ ទឹម សារី អាយុ៣៥ឆ្នាំ ជាមន្ត្រីអង្គរក្សនៅនាយកដ្ឋាន អង្គរក្សក្រសួងមហាផ្ទៃ មានស្រុកកំណើត នៅក្នុងភូមិកាន់នឹម ឃុំខ្វាវ ស្រុកសំរោង ខេត្តតាកែវ មានប្រពន្ធឈ្មោះ ឈឺន ចាន់គ្រឹស្នា អាយុ២៨ឆ្នាំ ជាគ្រូបង្រៀន ស្នាក់នៅក្នុងភូមិឃុំខាងលើ ។ មន្ត្រីអង្គរក្សរូបនេះ ប្រើប្រាស់កាំភ្លើងខ្លីម៉ាក CF-98-9 លេខ ០១៥០៧២៣៦ ។ ចំណែកជនរងគ្រោះដែល ត្រូវបាញ់សម្លាប់ឈ្មោះ ស្រី ចាន់វុទ្ធី អាយុ៤៣ឆ្នាំ ជាកសិករ មានទីលំនៅក្នុងភូមិកើតហេតុ ខាងលើជាមួយគ្នា ។
ជុំវិញហេតុការណ៍បាញ់ប្រហារ សុសសាច់ក្នុងចម្ងាយ ១ម៉ែត្រពីគ្នានេះ ត្រូវបានសាក្សីឱ្យដឹងថា សាច់ញាតិឈ្មោះ ស៊ឹម ចន្ធី បានរៀបចំធ្វើ ពិធីខួបកំណើតកូន ដោយបានអញ្ជើញភ្ញៀវ ប្រមាណជាង៣០នាក់ ក្នុងនោះក៏មានជនរងគ្រោះ និងជនដៃដល់នោះដែរ ដោយកម្មវិធីនោះបានចាប់ផ្តើម ទ្បើងតាំងពីវេលាម៉ោង៥ល្ងាច ។ ខណៈនោះអ្នកទាំង២ គឺជនរងគ្រោះពាក់អាវឆ្នូត និងជនជាឃាតករ ពាក់អាវពណ៌ខៀវបានអង្គុយផឹកស៊ី កៅអីជាប់គ្នា ហើយមានភាពល្អូកល្អឺន នឹងគ្នាខ្លាំងណាស់ មិនមានទំនាស់គ្នាទ្បើយ ព្រមទាំងបានទ្បើងរាំលេង កម្សាន្តសប្បាយរីករាយជាមួយគ្នាផងដែរ ។
ប្រភពដដែលបន្តថា បន្ទាប់ពីទឹកប្តូរនិស្ស័យហូរ ចូលពេញខ្លួនហើយ ស្រាប់តែជនជា ឃាតករដកកាំភ្លើងខ្លីបាញ់ប្រហារទៅលើជនរងគ្រោះ ក្នុងចម្ងាយកន្លះម៉ែត្រពីគ្នា បណ្តាលឱ្យដួលដេកនៅនឹងកន្លែង ហើយជនដៃដល់នោះមិនបានរត់ទេ គឺនៅក្នុងពេលដែល ជនរងគ្រោះដួលដេកហើយ ជននោះបានឈរបង់ ជំទែងបាញ់ប្រហាររហូតអស់គ្រាប់ពី ក្នុងបង់ចំនួន១៥គ្រាប់ ដែលគ្រាប់កាំភ្លើង ទាំង១៥គ្រាប់នោះ បានទំលុះធ្លុះធ្លាយ សុសសាច់ស្លាប់ភ្លាមៗនៅនឹងកន្លែង ។
បន្ទាប់មកជនជាឃាតករនោះ បានប្រុងដោះដូរបង់គ្រាប់ថ្មី ដើម្បីបាញ់បន្តទៀត ប៉ុន្តែត្រូវបានអ្នកផឹកស៊ីជាមួយនាំគ្នាស្ទុះទៅចាប់ ដណ្តើមយកបានកាំភ្លើងពីដៃ និងចាប់ជននោះដែរ ប៉ុន្តែចាប់មិនឈ្នះ ។ ម្យ៉ាងទៀត ម្តាយជននោះបានស្រែកមិនឱ្យ ចាប់កូនរបស់គាត់ទេ ដោយគាត់ធានាថា ចាំគាត់ចេញមុខដោះស្រាយ តាមក្រោយបណ្តាលឱ្យឃាតករដ៏កំណាចនោះ គេចខ្លួនបាត់ដោយ សុវត្ថិភាពទៅ ។
ប្រភពដដែលបន្តទៀតថា កន្លងមក រវាងជនរងគ្រោះ និងឃាតករកំណាច មិនធ្លាប់មានទំនាស់គ្នាទ្បើយ គឺពេលមានកម្មវិធីផឹកស៊ីម្តងៗ តែងតែបានហៅប្រមូលគ្នាទៅ ផឹកស៊ីជុំគ្នាមិនដែលខកខានម្តងណាទេ ។ ដោយទ្បែក នៅក្នុងពេលកើតហេតុ ក៏អត់មានទំនាស់គ្នាកើតទ្បើងដែរ គឺបានអង្គុយនៅជាប់គ្នាថែមទៀត ទង្គិចកែវជាមួយគ្នាជាធម្មតា ។
ក្រោយមក ស្រាប់តែជនដៃដល់បាន ដកកាំភ្លើងខ្លីបាញ់ប្រហារតែម្តង ហាក់ដូចជាមានគំនុំនឹងគ្នារឿងអ្វីមួយ ដែលលាក់ទុកគឺ បាញ់មិនឱ្យរស់ទ្បើយ ធ្វើយ៉ាងណាត្រូវតែផ្តាច់ជីវិត ព្រោះបាញ់រហូត ដល់ទៅ១៥គ្រាប់ត្រូវសុសសាច់ ។
ពេលនេះកម្លាំង សមត្ថកិច្ចកងរាជអាវុធហត្ថស្រុកអង្គស្នួល បានចុះទៅកាន់កន្លែងកើតហេតុ ធ្វើការសាកសួរសាក្សីនិងស្រាវជ្រាវជុំវិញ កន្លែងកើតហេតុនោះ ដើម្បីកសាងសំណុំរឿងឈានទៅស្វែងរក ចាប់ខ្លួនជនជាឃាតកររូបនេះ ដែលពេលនេះដូរដីបាត់ទៅហើយ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
