រាជធានីភ្នំពេញ ៖ យុវជនម្នាក់កាលពី ព្រឹកថ្ងៃទី៥កក្កដា ត្រូវបានសមត្ថកិច្ច នគរបាលប្រឆាំង ការជួញដូរមនុស្ស និងការពារអនីតិជន រាជធានីភ្នំពេញ ចាប់ឃាត់ខ្លួនបញ្ជួន ទៅកាន់សាលាដំបូង រាជធានីភ្នំពេញ ដោយជាប់ពាក់ព័ន្ធលើបណ្តឹងសំណុំរឿងព្រហ្មទណ្ឌមួយ ពីបទចែកចាយរូបភាពអាសអាភាស និងគំរាមកំហែងដោយមានបញ្ជាឱ្យបំពេញលក្ខខណ្ឌអ្វីមួយ ។
យុវជនរងនូវការចោទប្រកាន់នេះឈ្មោះឈាង អេងលី អាយុ២៥ឆ្នាំ ស្នាក់នៅផ្ទះជួលសង្កាត់បឹងសាឡាង ខណ្ឌ ទួលគោក រាជធានីភ្នំពេញ និងមានស្រុកកំណើតនៅ ភូមិវាលរីកើត ឃុំស្វាយទាប ស្រុកចំការលើ ខេត្តកំពង់ចាម មុខរបរជានិស្សិត និងធ្វើការឲ្យក្រុមហ៊ុនមួយ ។
ទាក់ទិននឹងការឃាត់ខ្លួន យុវជននោះទៅកាន់ សាលាដំបូងរាជធានីភ្នំពេញ ត្រូវបានសមត្ថកិច្ចនគរបាលការិយាល័យប្រឆាំង ការជួញដូរមនុស្ស និងការពារអនីតិជន រាជធានីភ្នំពេញឲ្យដឹងថា សមត្ថកិច្ច ដែលជាមន្ត្រីនគរបាលយុត្តិធម៌ គ្រាន់តែជាការ អនុវត្តតាមដីកាបញ្ជាឲ្យ ចូលខ្លួនរបស់ តំណាងអយ្យការតែ ប៉ុណ្ណោះ រឿងអ្វីៗពាក់ព័ន្ធនឹងដីកាបញ្ជា ឲ្យចូលខ្លួន សមត្ថកិច្ចមិនស៊ីជំរៅនោះទេ ។
ទោះជាយ៉ាងណានៅសាលាដំបូងរាជធានីភ្នំពេញត្រូវគេបង្ហើបឲ្យដឹងថា ដើមចម បណ្តាលឲ្យមានការ នាំខ្លួនយុវជនឈ្មោះឈាង អេងលី នេះ នៅថ្ងៃទី១កក្កដា លោកអ៊ុំ សុភក្តិ ព្រះរាជអាជ្ញារងអម សាលាដំបូងបានចេញដីកាបញ្ជាឲ្យចូលខ្លួនលេខ ១១៣អយ ឍ ឲ្យឈ្មោះឈាង អេងលី ចូលខ្លួនមុនថ្ងៃទី ១៥ កក្កដា ២០១៥ ដើម្បីសាកសួរលើបណ្តឹងព្រហ្មពីបទចែកចាយ រូបភាពអាសអាភាស និងគំរាមកំហែង ដោយមានបញ្ជាឱ្យបំពេញលក្ខខណ្ឌអ្វីមួយតាមបណ្តឹង របស់ ឈ្មោះ ណ ស ភ ភេទស្រី អាយុ២១ឆ្នាំ ដែលបានប្តឹង កាលពីថ្ងៃទី១០តុលា ២០១៤ ។
ប្រភពព័ត៌មានបន្តថា ក្នុងអំឡុងឆ្នាំ២០១៤ ឈ្មោះឈាង អេងលី បានមានការទំនាក់ទំនងស្រឡាញ់នារីម្នាក់ចាត់ទុកជាសង្សារ ពេលដែលខ្លួន កំពុងសិក្សានៅភ្នំពេញ ហើយនារីនោះក៏ បានមករៀនអ៊ុតសក់នៅភ្នំពេញដែរ ដែលពួកគេមាន ស្រុកកំណើតជាមួយគ្នា ។ ការស្រឡាញ់ធ្វើជា សង្សាច្រើនខែថ្ងៃកន្លងទៅ ទាំង២នាក់បានជ្រុលជ្រួសជាមួយគ្នាទៀតផង ហើយនៅពេលដេករួមរ័ក ខាងប្រុសបានប្រើប្រាស់ ទូរស័ព្ទដៃថតទុកមើលលេង ។
ប៉ុន្មានខែក្រោយមកនេះចូលឆ្នាំ២០១៥ ពួកគេ២នាក់បានបែកបាក់គ្នា ដោយខាងស្រី ត្រូវបានប្រុសផ្សេងចូលស្តីដណ្តឹងតាម ប្រពៃណីដើម្បី ធ្វើជាភរិយាពេញច្បាប់ ។ ក្រោយពីបុរសដទៃ ចូលស្តីដណ្តឹងគូរសង្សារយុវជនឈ្មោះឈាង អេងលី គេ(ឈាង អេងលី) មានការខឹងសម្បា ហើយបានយករូបភាពដែលដេករួមរ័កជាមួយគ្នា បង្ហោះតាមសង្គមហ្វេសប៊ុកជា ការបង្អាប់កិត្តិយស គូសង្សារនោះដើម្បីឲ្យគេ ងាកមករកខ្លួនវិញ ។
ប្រភពបន្តថា មានការបង្ហោះរូបភាពអាសអាភាសនោះហើយ បានជាខាងស្រី អតីតជាសង្សារ កើតទុក្ខមិនសុខចិត្តដាក់ពាក្យ បណ្តឹងដល់សមត្ថកិច្ច ឲ្យចាត់ការលើ យុវជននោះ ។ ក្រោយពីមានពាក្យបណ្តឹងសមត្តកិច្ចនគរបាលការិយាល័យប្រឆាំងការជួញដូរ មនុស្ស និងការពារអនិតិជនរាជធានីភ្នំពេញ បានធ្វើលិខិត អញ្ជើញយុវជនឈ្មោះឈាង អេងលី ទៅសាកសួរអមដោយ មេធាវីម្នាក់ការពារក្តីផងដែរ ។ ក្រោយពីសាកសួរសមត្តកិច្ចបានអនុញ្ញាតឲ្យយុវជននោះវិលទៅវិញ ដោយមិនមានការឃាត់ខ្លួនទេ ។
លុះរយៈពេលមុននេះ២ទៅ៣ខែ ខាងស្រីត្រូវដល់ពេល ចូលរោងការជាមួយអ្នកថ្មី ពេលនោះព័ត៌មានបាន លេចឮ ដល់យុវជនឈាង អេងលី ជាសង្សារចាស់ ។ ពេលឈាង អេងលី ដឹងថា នារីអតីត ជាសង្សាត្រូវរៀបការហើយ គេ (អេងលី) បានទាក់ទងទៅសង្សារចាស់ នោះណាត់ជួបនិយាយគ្នា តែនារីអតីតសង្សារ គេមិនធ្វើតាមអ្វី ដែលអេងលីចង់បាននោះទេ ។
ប្រភពព័ត៌មានបន្តថា នៅពេលអតីតនាងជា សង្សារ បដិសេធមិនជួប យុវជនឈាង អេងលី បានគំរាមថាគេនឹងបង្ហោះរូបភាពរួមរ័ក កាលពីនៅស្រឡាញ់គ្នា តាមសង្គមហ្វេសប៊ុកឲ្យគេ បានដឹងឮគ្រប់គ្នា ព្រមទាំងគំរាម ថានៅថ្ងៃនារីនោះរៀបមង្គលការ គេនឹងផ្តិតរូបថតឲ្យ បានច្រើនយកទៅ បាចមុខរោងការទៀតផង ។
ទង្វើនេះបានធ្វើឲ្យភាគីខាងស្រីរិតតែមិនអាចទទួលយកបាន និងរិតតែខឹងយុវជននោះ ខ្លាំងទៀតផង ដែលភាសាមួយនិយាយថា (បានស៊ីបានចុកហើយ ម៉េចមិនស្ងាត់ទៅ) នៅ បង្កើតរឿងចង់ឲ្យជាប់គុក ។ ប្រភព័ត៌មានពីអ្នកស្និទ្ធយុវជនឈាង អេងលី បានរៀបរាប់ឲ្យដឹងនៅ សាលាដំបូងរាជធានីភ្នំពេញថា ការចោទប្រកាន់ខាងលើ នេះជារឿង ប្រឌិតទាំងអស់ ខាងប្រុសមិនបានធ្វើយ៉ាងដូច្នោះទេ ហើយក៏គ្មានភស្តុតាង ណាមួយ (វីដេអូរួមរ័ក) យកទៅបង្ហោះដូច ការចោទប្រកាន់ នោះដែរ ពាក់ព័ន្ធរឿងតិចតួច សមត្ថកិច្ចបានហៅទៅ និយាយគ្នារួចអស់ហើយ ការចោទ ប្រកាន់ នោះសំដៅលើប្រយោជន៍ អ្វីមួយទេ មិនមែនជាការ គំរាមកំហែង ឬបានបង្ហោះរូបភាព អាសអាភាសនោះឡើយ។
សមត្ថកិច្ចបានឲ្យដឹងថា យុវជនឈ្មោះឈង អេងលី ត្រូវបានឃាត់ខ្លួនកាលពី ថ្ងៃទី៣ កក្កដា ដែលការឃាត់ខ្លួននោះគឺអនុវត្តតាមដីកា បញ្ជាឲ្យចូលខ្លួនរបស់តំណាង អយ្យការ ។ សមត្ថកិច្ចអះអាង ថាក្រោយពីមានពាក្យបណ្តឹងសមត្ថកិច្ចបាន ចេញលិខិតឲ្យ គេចូលខ្លួនច្រើនដងដែរ តែគេមិនចូល ឲ្យតែមេធាវីមកជំនួស ដូច្នោះបទល្មើសព្រហ្មទណ្ឌមិនអាចមាន អ្នកក្រៅពីសាម៉ីខ្លួន ចូលបំភ្លឺ បានទេ ទើបបានជាតំណាងអយ្យការ ឲ្យចាត់ការតាមនិតិវិធី ពោលឃើញពេលណា នាំខ្លួនពេលនោះ ។
នៅព្រឹកថ្ងៃទី៥ កក្កដា លោកស្រី តំណាងអយ្យការ បានសាកសួរយក ចម្លើយឈ្មោះឈាង អេងលី ចប់សព្វគ្រប់ហើយ ហើយបានផ្ញើទៅ សមត្ថកិច្ចវិញ និងតម្រូវឲ្យម៉ោង៣ថ្ងៃ ដដែលនាំទៅម្តងទៀត ដើម្បីធ្វើការ ចោទប្រកាន់ដាក់ជួនទៅខាងចៅក្រម សម្រេចឃុំខ្លួន ឬមិនឃុំខ្លួនជាឆន្ទានុសិទ្ធិ របស់ចៅក្រមស៊ើបសួរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]