រាជធានីភ្នំពេញ ៖ លោកម៉ូវ មានិត អភិបាលរង ខណ្ឌសែនសុខ កាលពីវេលាម៉ោង ១០ និង៣០នាទីថ្ងៃទី៤ កក្កដា ២០១៥ នេះ បានដឹកនាំកម្លាំងប្រជាការពារ និងប៉ូលិសបង្ក្រាបទីតាំងបើកហ្គេម បាញ់ត្រីមួយកន្លែង ស្ថិតនៅតាមបណ្តោយផ្លូវ២០១១ ក្នុងភូមិគោកឃ្លាង សង្កាត់ភ្នំពេញថ្មី ដោយដកហូតបាន ចំនួន២ទូ មករក្សាទុកនៅសាលាខណ្ឌ ។
ជាមួយនោះ អាជ្ញាធរក៏បាននាំខ្លួនអ្នកមើលការខុសត្រូវទូហ្គេមម្នាក់ រួមទាំង អ្នកលេងម្នាក់ផងដែរ ។ ចំពោះការបង្ក្រាបទូហ្គេមរបស់អាជ្ញាធរនេះ មហាជនមិនបានសាទរ នោះទេពីព្រោះគេយល់ថា ជាការបង្ក្រាបរបៀបរើសអើង ។ អ្នកភូមិរស់នៅ ខណ្ឌសែនសុខជាច្រើននាក់ ដោយសុំមិនបញ្ចេញឈ្មោះថា ទីតាំងហ្គេមចំនួន២កន្លែងនៅតាមបណ្តោយផ្លូវ៥៩៨ ក្នុងភូមិទំនប់សង្កាត់ភ្នំពេញថ្មីដដែលនេះ បានបើកដំណើរការយ៉ាងរលូនទាំងយប់ថ្ងៃ ដោយគ្រាន់តែគេប្រើល្បិចស្ពិនភ្នែកបិទទ្វារមុខ ចំហរទ្វារក្រោយប៉ុណ្ណោះ។
អ្នកភូមិបន្តថា ទីតាំងបើកលេងហ្គេមបាញ់ត្រី ចំនួន២កន្លែងខាងលើនេះ គឺ១កន្លែងបើក ដំណើរការ២៤ម៉ោង លើ២៤ម៉ោង មានខ្នងមន្ត្រីប៉ូលិសម្នាក់ នៅការិយាល័យ ប្រឆាំងគ្រឿងញៀន រាជធានីភ្នំពេញ ។ ឯទីតាំង១កន្លែងទៀត គេបើកដំណើរការនៅ ពេលយប់ចាប់ពី៦ល្ងាច ទល់ភ្លឺតែម្តង ដោយទីតាំងនេះ មានអភិបាលរង ខណ្ឌសែនសុខម្នាក់ ជាអ្នកនៅពីក្រោយ ។
អ្នកភូមិបានចោទសួរថា មូលហេតុអ្វីបានជាអាជ្ញាធរ មិនបង្ក្រាបទីតាំងល្បែង ស៊ីសងទាំង២ ទីតាំង ? ដែលកំពុង បង្វក់ស្មារតីយុវជន រាល់ថ្ងៃដោយខ្លះភ្លេច សាលាភ្លេច ផ្ទះ និងជាពិសេសបង្កភាព អសន្តិសុខដូចជា ចោរលួចឆក់ប្លន់ និងឆក់ជាដើម? ។
ទោះបីយ៉ាងណា បើតាមដឹងទីតាំង២កន្លែងខាងលើនេះ គឺត្រូវបានអាជ្ញាធរ សង្កាត់ភ្នំពេញថ្មី និងសមត្ថកិច្ចកងរាជ អាវុធហត្ថរាជធានីភ្នំពេញ បង្ក្រាបម្តង មកហើយ មិនដឹងយ៉ាងម៉េចបាន ជាបើកឡើងវិញបាននោះ ។ ជុំវិញករណីទីតាំងបើកហ្គេមបាញ់ត្រី ខាងលើនេះលោកលី សាវ៉េត ធ្លាប់ប្រាប់ កោះសន្តិភាពតាមទូរស័ព្ទ កាលពីសហ្តហ៍មុនថា មន្ត្រីថ្នាក់ក្រោម ទៅបង្ក្រាប ក៏ប៉ុន្តែស្ងាត់ជ្រាបដូច ចោរលួចសេះតែម្តង ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]