ខេត្តកំពត ៖ ស្ត្រីមេម៉ាយកូន២ម្នាក់ បានស្រែកយំ ហើយរត់ទៅប្តឹងសមត្ថកិច្ចនគរបាលក្រុងកំពតឱ្យជួយអន្តរាគមន៍ ដោយសារខ្លួនចាញ់បោកស្ត្រី២នាក់ក្នុងផ្សារសាមគ្គី ទីរួមខេត្តកំពត នាំទៅដោះយកខ្សែក ចិញ្ចៀន កងដៃ ជាមាស និងប្លាទីន ព្រមទាំងប្រាក់១លានរៀលអស់រលីងពីខ្លួន ដោយស្ត្រី២នាក់នោះកុហកថា រើសលុយបាន៣ម៉ឺនដុល្លារ ហើយហៅស្ត្រីរូបនេះទៅចែកគ្នានៅកន្លែងស្ងាត់ ។ ហេតុការណ៍នេះកើតឡើងកាលពីវេលាម៉ោង៩និង៣០នាទីព្រឹកថ្ងៃទី២១ កក្កដា នៅក្នុងផ្សារសាមគ្គី ទីរួមខេត្ត ។
ស្ត្រីដែលចាញ់បោកគេនេះ ឈ្មោះចិន ចន្ថា ហៅដា អាយុ៣០ឆ្នាំ មានទីលំនៅក្នុងភូមិដំណាក់ចំបក់ សង្កាត់អូរក្រសារ ក្រុងកែប ។ ស្ត្រីរូបនេះបានរៀបរាប់ប្រាប់សមត្ថកិច្ចថា នៅវេលាម៉ោងជាង៩ព្រឹកនោះគាត់បានមកផ្សារទីរួមខេត្ត ហើយក្រោយពីផ្ញើម៉ូតូរួចក៏ចូលផ្សារក្នុងគោលបំណងទៅទិញខោអាវយកទៅលក់នៅក្រុងកែប ។ ពេលដើរចូលបានមួយសន្ទុះពុំទាន់បានទិញខោអាវនៅឡើយទេ ស្រាប់តែមានស្ត្រី២នាក់ អាយុប្រហាក់ប្រហែលនឹងគាត់ដែរ មកខ្សឹបប្រាប់ថា ពួកគេរើសបានប្រាក់៣ម៉ឺនដុល្លារ ដែលប្រាក់នេះច្រើនណាស់គួរទៅចែកគ្នាឱ្យឆ្ងាយពីគេ ក្រែងម្នាក់ដែលជ្រុះនោះគេដឹងរួចក៏ដឹកដៃគាត់ចេញមកខាងជើងផ្សារសាមគ្គី ។
ស្ត្រីឈ្មោះចិន ចន្ថា រៀបរាប់ទៀតថា ពេលនាំមកដល់ខាងជើងផ្សារក៏ឱ្យគាត់ឡើងជិះម៉ូតូសេ១២៥ ពណ៌ខ្មៅមួយគ្រឿង មិនចាំស៊េរី បើកបរដោយបុរសម្នាក់ស្លៀកពាក់ឯកសណ្ឋានឈុតខ្មៅ ដូចឯកសណ្ឋានអង្គរក្ស ពាក់មួកសុវត្ថិភាព តែមិនបើកកញ្ចក់ឱ្យស្គាល់មុខទេ ។ រីឯស្ត្រី២នាក់នោះជិះម៉ូតូបុរសម្នាក់ផ្សេងទៀត ម៉ាកដូចគ្នា រួចឌុបតាមបណ្តោយផ្លូវជាតិលេខ៣ ទៅទិសខាងជើងផ្សារ ។ លុះពេលចេញមកបានចម្ងាយប្រហែលជាង៣គីឡូម៉ែត្រ ហួសស្ពានស្រះប៉ោងបន្តិច មានចម្ការស្វាយមួយពួកគេក៏ឈប់នៅកន្លែងនោះរួចហើយនិយាយថា ឥឡូវនេះលុយយើងដល់ទៅ៣ម៉ឺនដុល្លារ ត្រូវចែកឱ្យស្មើគ្នា ដូច្នេះដើម្បីស្តែងចេញពីការទុកចិត្តគ្នាត្រូវដោះខ្សែដៃ កងដៃ ចិញ្ចៀន និងលុយកាក់ឱ្យអស់រលីងពីខ្លួនដូចគ្នា ហើយឱ្យគ្នាគេម្នាក់ធ្វើមេចំណែកចែកឱ្យស្មើគ្នា ។
ប្រភពដដែលបន្តថា ពួកនោះនិយាយបណ្តើរ ម្នាក់ទៀតជាអ្នកដោះកងចេញពីដៃ និងគ្រឿងអលង្ការផ្សេងទៀតបណ្តើរ ក្នុងនោះមានខ្សែ.កមាស៣ជី កងដៃប្លាទីនឈុត១កង ចិញ្ចៀនប្លាទីនដាំត្បូងមួយវង់ទម្ងន់៥ហ៊ុន ទូរស័ព្ទដៃម៉ាកសាំស៊ុងចិនមួយគ្រឿង កាបូបស្ពាយមួយ និងប្រាក់១លានរៀល ។ ក្រោយពេលពួកគេដោះគ្រឿងអលង្ការអស់ និងយកប្រាក់អស់ពីខ្លួនហើយ ក៏ធ្វើរបៀបជាខ្លាចប៉ូលិសមកទាន់ ហើយគេចខ្លួនឡើងជិះម៉ូតូនាំគ្នាទៅអស់ ដោយទុកគាត់ជាអ្នករងគ្រោះចោលម្នាក់ឯងនៅកន្លែងដោះគ្រឿងអលង្ការនោះ ។
ក្រោយពីពួកគេទៅបាត់ទើបគាត់ជិះម៉ូតូឌុបមកកន្លែងផ្ញើម៉ូតូនៅផ្សារសាមគ្គីទីរួមខេត្តកំពតវិញ ព្រមទាំងប្តឹងសមត្ថកិច្ចឱ្យជួយអន្តរាគមន៍ ប៉ុន្តែអ្វីៗហួសពេលអស់ទៅហើយ មិនខុសពីប្រាក់ក៏បង់ថង់ក៏ដាចនោះទេ ដែលទាំងអស់នេះមកតែពីការចង់បានអ្វីក្រៅពីទ្រព្យដែលខ្លួនមាន ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]