រាជធានីភ្នំពេញ៖ មកទល់ពេលនេះ លោកសាយ សៀរ៉ា មានអារម្មណ៍ល្អ ដូចមុនវិញហើយ បន្ទាប់ពីមានការបញ្ជាក់ថា លោកមិនពាក់ព័ន្ធស្នេហា ភេទដូចគ្នា ជាមួយលោកយ៉ែម សំអូនទេ។ អ្នកនាងយ៉ាន លីនដា បានអះអាងថា លោកសាយ សៀរ៉ា មិនមែនជាមនុស្សប្រុស ដែលនាងចោទថា ស្រឡាញ់ភេទដូចគ្នា ជាមួយលោកយ៉ែម សំអូនទេ ។
លោកសាយ សៀរ៉ា កាលពីពេល ថ្មីៗនេះនិយាយថា លោកត្រូវបានគេសង្ស័យថាជាគូស្នេហ៍ ភេទដូចគ្នាជាមួយស្វាមីអ្នកនាងយ៉ាន លីនដា បង្កទៅជារឿងរំជួលពេញពិភពសិល្បៈ។ តាំងពីមានរឿងយល់ច្រឡំនោះមក លោកសៀរ៉ាល្វីងមុខហើយ អ្នកណាៗក៏ស្អប់លោកដែរ ។ គេគិតថាលោកអាត្មានិយម យកក្រុមគ្រួសារគេមកលេងសើច បង្កឲ្យបែកបាក់គ្នាទាំងក្រុមគ្រួសារគេមានកូន និងនៅជាមួយគ្នារាប់ឆ្នាំ។ «កាលពីគេមិនទាន់ដឹងរឿងពិត ខ្ញុំស្ទើរតែអស់ផ្លូវដើរនៅលើវិថីសិល្បៈ គ្មានអ្នកណាចង់និយាយរកខ្ញុំទេ សូម្បីតែមិត្តសិល្បករដែលធ្លាប់តែរាប់អានទៅណាមកណាសួរនាំខ្ញុំ និងធ្លាប់និយាយលេង ព្រមទាំងរួមគ្នាថតរូបទុកជាអនុស្សាវរីយ៍ដែរនោះ ក៏គេពេបជ្រាយនិយាយចុងមាត់ ចុងក មើលមកខ្ញុំជាមនុស្សអាក្រក់ដែរ ។ ពេលដែលជួបរឿងនោះខ្ញុំគ្មានលទ្ធភាពពន្យល់ប្រាប់គេទេ ទោះប្រឹងបកស្រាយយ៉ាងណា វិធីបែបណា ហើយឈានដល់ការស្បថដាក់ជីវិតក៏គ្មានអ្នកណាជឿដែរ បើរឿងនោះ១០០%គេថាខ្ញុំ ។ ជាសំណាងល្អដែលអ្នកនាងយ៉ាន លីនដា បានចេញមុខការពារ លាងជម្រះរាល់ការសង្ស័យលើខ្ញុំ ។ បើសិនជាមិនមានការបកស្រាយពីសាមីខ្លួនទេនោះ ខ្ញុំច្បាស់ជាមិនអាចចាប់អាជីពសិល្បៈតទៅទៀតបានទេ ។ បានអ្នកនាងលីនដាបកស្រាយទើបរឿងខ្ញុំហាក់ស្ងប់វិញ ។ បើខ្ញុំនិយាយតែឯងគ្មានអ្នកណាជឿទេ ។
ក្រោយចប់បញ្ហាមួយនេះ ខ្ញុំនៅទទួលបានការងារសិល្បៈជាបន្តបន្ទាប់ ខ្ញុំទទួលបានការងារថតរឿងពី២ទៅ៣រឿងក្នុងពេលតែមួយ ព្រមទាំងទទួលការងារចេញទៅសម្តែងតាមពិធីជប់លៀងអាពាហ៍ពិពាហ៍ ខួបកំណើតដូចមុន ។ ប្រសិនគ្មានការបកស្រាយច្បាស់លាស់ទេនោះខ្ញុំអាចជាមនុស្សមិនល្អដែលជាភាពអយុត្តិធម៌ ហើយស្អុយឈ្មោះពេញពិភពសិល្បៈ» ។ លោកសាយ សៀរ៉ា និយាយបែបនេះ ។
ក្រៅពីលោកសាយ សៀរ៉ា ដែលត្រូវគេសង្ស័យពាក់ព័ន្ធស្នេហ៍ភេទដូចគ្នានោះលោកអ៊ុន សុធា ក៏ត្រូវគេសង្ស័យដែរ ។ លោកសាយ សៀរ៉ា និយាយថា លោកគ្មានបំណងចង់យកឈ្នះជាមួយអ្នកណាដែលចោទរូបលោកទេ ដ្បិតលោកមិនបានធ្វើបែបនោះ ។ លោកសៀរ៉ា តែងតែទប់ចិត្តមិនតបតទៅរករឿងគេវិញដោយសម្តីធ្ងន់ទេ ក្រៅពីសួរនាំក្នុងសភាពទន់ភ្លន់ ។
ពេលនេះលោកសៀរ៉ាមិនចង់ជួបព័ត៌មានមិនល្អណាមួយទៀតឡើយ ។ បើមានបញ្ហាអ្វីលោកសៀរ៉ាចង់ឱ្យអ្នកពាក់ព័ន្ធសួររកឫសគល់សិនដើម្បីចៀសវាងខុស ម្ខាងៗនាំឱ្យគេយល់ច្រឡំ ។
លោកសាយ សៀរ៉ា ជាអ្នកខេត្តកំពង់ចាមបានដើរលើវិថីសិល្បៈជិត១០ឆ្នាំមកហើយ ។ តស៊ូជាមួយការងារតាំងពីតួអង្គរាយរងទម្រាំលោកសៀរ៉ាបានក្លាយជាតួអង្គសំខាន់ ប៉ុន្មានឆ្នាំចុងក្រោយនេះ ។
លោកសាយ សៀរ៉ា ថតចម្រៀងកាយវិការខារ៉ាអូខេបានច្រើនឱ្យផលិតកម្មក្រៅប្រទេសដូចជាផលិតកម្មរៃមាស តោមាស និងផលិតកម្មបុប្ផាជាដើម ។ ក្រៅពីនេះលោកសៀរ៉ាត្រូវមហាជនទទួលស្គាល់បន្ទាប់ពីចាប់ដៃគូសម្តែងជាមួយនាងនី មុនីនាថ ក្នុងខ្សែភាពយន្តមួយចំនួន ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]